پارلامەنت ءماجىلىسىنىڭ ءبىر توپ دەپۋتاتتارى ۇكىمەتكە ۇلى وتان سوعىسىنىڭ ارداگەرلەرىن كوممۋنالدىق قىزمەت تولەمدەرىنەن بوساتۋ تۋرالى ساۋال جولداعان ەدىك. ءسىزدىڭ قولىڭىز قويىلعان جاۋاپتا سول قاھارمان قاريالارعا بەرىلەتىن ورتاشا زەينەتاقى, بازالىق زەينەتاقى جانە ارناۋلى مەملەكەتتىك جاردەماقى ەسەپتەلىپ, وسىنى قاناعات ەتسىن دەگەن ەمەۋرىن ءبىلدىرىلىپتى.
ماسەلە وندا ەمەس قوي. سوعىس ارداگەرلەرىنە ءار ايدا جيىپ-تەرىپ بەرەتىن 60-70 مىڭداي قارجى ولارعا ەل بولىپ, مەملەكەت بولىپ كورسەتىلۋگە ءتيىس قۇرمەتتىڭ ساداعاسىنا دا جارامايدى. ماسەلە – شىنايى ءىلتيپاتتا. ادامزاتقا قاسىرەت بولىپ تونگەن فاشيزمنەن جەر-جاھاندى قۇتقارىپ قالعان ەرلەردى, بۇگىنگى توقسانداعى قاريالاردى ۇلى جەڭىستىڭ 70 جىلدىعى قارساڭىندا تۋعان حالقى مەن مەملەكەتتىڭ جۇرەك جىلۋىنا بولەيىك دەگەنبىز. سونى تۇسىنە الماپسىزدار.
قۇدايعا شۇكىر, پاراساتتى ازاماتتار بار ەكەن. قاراعاندى جانە باتىس قازاقستان وبلىستارىنىڭ اكىمدەرى ارداگەرلەردى الگى تولەمدەردەن بوساتتى. شىمكەنت تە سولاي جاساپ وتىر, اللا ريزا بولسىن.
وسى يگى قادامدى ەلىمىزدىڭ وزگە وبلىستارى قوستاپ اكەتسە, قانداي عانيبەت. رەسپۋبليكادا بۇگىندە ۇلى وتان سوعىسىنىڭ 4282 ارداگەرى بار, ءار وڭىرگە 300-دەن كەلەدى ەكەن. ەكونوميكاسى دامۋ ۇستىندەگى ايماقتار ءۇشىن 200-300 قاريانىڭ كوممۋنالدىق مۇقتاجىن شەشىپ بەرۋ ماسەلە بولىپ پا؟ ءسىزدىڭ تاراپىڭىزدان ءبىر اۋىز ءسوز ايتىلسا جەتكىلىكتى عوي.
اۋليە سىندى قاريالار قان مايداندا ەرلىكپەن شايقاستى. ءبىزدىڭ ەرلىگىمىز سول بولسىن, ارداگەرلەردى ۇلى جەڭىستىڭ 70 جىلدىعى قارساڭىندا ازاماتتىعىمىزبەن, ەلدىگىمىزبەن قۋانتايىق. ورىندى تىلەككە ءاتۇستى قاراماڭىزدار.
الدان سمايىل,
ءماجىلىس دەپۋتاتى.