بۇقارالىق اقپارات قۇرالدارى قىزمەتكەرلەرى كۇنى قارساڭىندا «استانا وپەرا» تەاترىندا مادەنيەت پەن ونەردى ناسيحاتتاپ جۇرگەن جۋرناليستەر «التىن توميريس» سىيلىعىمەن ماراپاتتالدى. مەرەكەلىك جيىنعا مادەنيەت جانە سپورت ءمينيسترى داۋرەن اباەۆ قاتىستى.
جۋرناليستەردى كاسىبي مەرەكەسىمەن قۇتتىقتاعان مينيستر, ەڭ الدىمەن اقپارات سالاسىنىڭ ەل دامۋى جولىنداعى ماڭىزدىلىعىنا توقتالدى.
«مەديا, تەك جاڭالىق تاراتاتىن قۇرال ەمەس, ول – ەلىمىزدىڭ قاۋىپسىزدىگى مەن يدەولوگياسىنىڭ دا وزەگى. وزدەرىڭىزدى بەينەلەپ ايتقاندا, قوعامنىڭ بارومەترى دەسەك جاراسادى. بيلىك پەن حالىقتىڭ اراسىن جالعاپ, اقيقاتتىڭ اشىق الاڭىندا جۇرگەن ارقايسىڭىزدىڭ ەڭبەكتەرىڭىز باعالى. مەملەكەتتىك ساياساتتى قالىڭ بۇقاراعا تۇسىندىرۋدە, الەۋمەتتىك ماسەلەلەردى دەر كەزىندە قوزعاۋدا بۇقارالىق اقپارات قۇرالدارىنىڭ ماڭىزى زور. سىزدەرگە ارتىلعان جاۋاپكەرشىلىك ۇلكەن. سول جۇكتى اۋىرسىنباي ارقالاي الاتىن كۇش-جىگەر تىلەيمىن», دەدى داۋرەن اباەۆ.
ماراپاتتالعاندار قاتارىندا Egemen Qazaqstan, «كازاحستانسكايا پراۆدا», «حابار 24», «قازاق تۆ», Qazaqstan, «مير» تەلەارنالارى, «ۆەچەرنيايا استانا», «نوۆوە پوكولەنيە» گازەتتەرى, قازاقپارات, Baigenews.kz اقپاراتتىق اگەنتتىكتەرىنىڭ تىلشىلەرى بار.
سالتاناتتى ءراسىم اياسىندا وپەرا ترۋپپاسىنىڭ سوليستەرى ونەر كورسەتىپ, مەرەكەلىك كونتسەرت ۇسىنىلدى.
ايتا كەتەيىك, اتالعان سىيلىق بيىل ەكىنشى رەت بەرىلىپ وتىر.