28 ماۋسىم كۇنى ساعات 11:30-دا الەمگە تانىلعان «تۇركسوي» ۇيىمىنىڭ باس حاتشىسى سۇلتان راەۆ پەن «روزا باعلانوۆا اتىنداعى «قازاقكونتسەرت» ۇيىمىنىڭ ديرەكتورى اقتوتى رايىمقۇلوۆا رەسمي كەزدەسۋ وتكىزىپ, ىنتىماقتاستىق تۋرالى مەموراندۋمعا قول قويماق, دەپ حابارلايدى Egemen.kz.
الداعى ۋاقىتتا مەموراندۋم اياسىندا مادەني-رۋحاني باعىتتاعى جوبالار قولعا الىنىپ, وتاندىق ونەردىڭ ۇزدىك ۇلگىلەرىن كەڭىنەن ناسيحاتتاۋ مۇمكىندىگى ارتا تۇسەدى.
مادەنيەت سالاسىنداعى وسى ايتۋلى ءىس-شاراعا قر مادەنيەت جانە سپورت مينيسترلىگىنىڭ «تۇركسوي» حالىقارالىق ۇيىمىنداعى وكىلى باقىتجان وماروۆ قاتىسادى.
تۇركى حالىقتارى مادەنيەتىنىڭ وركەندەۋىنە زور ۇلەس قوسىپ جۇرگەن تۇركسوي مەن ەلىمىزدىڭ ءىرى كونتسەرتتىك ۇيىمىنا اينالعان قازاقكونتسەرت تۇركى تەكتەس ەلدەردىڭ ءوزارا ۇلتتىق-مادەني بايلانىستارىن نىعايتۋ جولىندا جاڭا باستامالاردى ۇسىنادى.
كەزدەسۋ بارىسىندا قازاقكونتسەرتتىڭ ارتىستەرى مەن شىعارماشىلىق ۇجىمدارى ارنايى كونتسەرتتىك باعدارلامامەن قۋانتادى.