قازاقستان رەسپۋبليكاسىنىڭ مىسىر اراب رەسپۋبليكاسىنداعى ەلشىسى بەرىك ارىن مار ۋاقىفتار ءمينيسترى مۇحتار جۇمامەن جانە تۋريزم ءمينيسترى حيشام زاازۋمەن كەزدەستى.
مار ۋاقىفتار ءمينيسترى م.جۇمامەن كەزدەسۋ بارىسىندا قازاقستاندىق ديپلومات قازاقستان پارلامەنتى سەناتىنىڭ توراعاسى ق.توقاەۆتىڭ ءۇستىمىزدەگى جىلعى 18 قىركۇيەكتە استانادا وتكىزىلۋى جوسپارلانعان الەمدىك جانە ءداستۇرلى دىندەر كوشباسشىلارى سەزى حاتشىلىعىنىڭ ءحىىى وتىرىسىنا قاتىستى حاتىن تابىس ەتتى.
م.جۇما اتالعان ماڭىزدى شاراعا ءوزى باسشىلىق ەتەتىن مەكەمە وكىلىنىڭ قاتىساتىنىن قۋاتتاي وتىرىپ, قازاقستاننىڭ جاھاندىق دەڭگەيدە ءدىنارالىق جانە وركەنيەتارالىق ۇنقاتىسۋدى ىلگەرىلەتۋدەگى ۇلەسىن جوعارى باعالادى. ول مىسىردىڭ ورتالىق ازياداعى ساياسي جانە ەكونوميكالىق تۇرعىداعى جەتەكشى مۇسىلمان مەملەكەتى – قازاقستانمەن بۇل باعىتتاعى ءوزارا ءىس-قيمىلعا بەلسەندىلىكپەن اتسالىسۋعا دايىندىعىن اتاپ ءوتتى.
سونىمەن قاتار, م.جۇما ب.ارىن تاپسىرعان قازاقستان رەسپۋبليكاسى ءدىن ىستەرى اگەنتتىگىنىڭ توراعاسى م.ءازىلحانوۆتىڭ قازاقستانعا رەسمي ساپارمەن كەلۋگە شاقىرۋىن ريزاشىلىقپەن قابىل الدى.
ەكى ەل اراسىنداعى ءبىلىم جانە ءدىن سالاسىنداعى ىنتىماقتاستىقتى دامىتۋ باعىتىندا تاراپتار «نۇر-مۇباراك» بىرلەسكەن قازاق-مىسىر ۋنيۆەرسيتەتى قىزمەتىنىڭ الداعى دامۋ بولاشاعى جونىندە پىكىر الماستى. مىسىرلىق مينيستر «نۇر-مۇباراك» ۋنيۆەرسيتەتىن ۇزدىك بىتىرۋشىلەردىڭ كەلەشەكتە ءال-ازھار ۋنيۆەرسيتەتىنىڭ ماگيستراتۋراسىنا قوسىمشا تالاپتارسىز قابىلدانۋىن, سونداي-اق, ءال-ازھاردىڭ قازاقستاندىق وقۋ ورنىنىڭ ديپلومدارىن تانۋىن قامتاماسىز ەتۋ ءۇشىن اتالعان جوعارى وقۋ ورنىنداعى ءبىلىم بەرۋ ساپاسىن كوتەرۋ بويىنشا بىرقاتار ۇسىنىستار ءبىلدىردى.
مار تۋريزم ءمينيسترى ح.زاازۋمەن كەزدەسۋ كەزىندە ەلشى وعان پرەمەر-ءمينيستردىڭ ورىنباسارى, يندۋستريا جانە جاڭا تەحنولوگيالار ءمينيسترى ءا.يسەكەشەۆتىڭ 21-23 مامىردا استانادا وتەتىن VII استانا ەكونوميكالىق فورۋمى مەن ءىى ءدۇنيەجۇزىلىك داعدارىسقا قارسى كونفەرەنتسياعا قاتىسۋعا جولداعان شاقىرۋىن تابىس ەتتى.
مينيستر ح.زاازۋ ءوز كەزەگىندە مىسىردىڭ قازاقستاندىق تۋريستەردى تارتۋدى قالايتىندىعىن جەتكىزدى جانە ونى جۇزەگە اسىرۋ ماقساتىندا مار ۇكىمەتىنىڭ بيىلعى جاز مەزگىلىندە الماتى مەن شارم اش-شەيح اراسىندا تىكەلەي اۋە جولى بايلانىسىن اشۋ بويىنشا ءتيىستى شارالاردى قولعا الۋدى جوسپارلاپ وتىرعانىن حابارلادى.
«ەگەمەن-اقپارات».