قازاقستاندا جىلىنا 80 مىڭعا جۋىق ادام قان دونورلىعىنا مۇقتاج. بۇل تۋرالى ەلوردادا دۇنيەجۇزىلىك قان دونورى كۇنىنە ارنالعان كونتسەرتتە «ترانسفۋزيولوگيا عىلىمي-وندىرىستىك ورتالىعى» شجق رمك باسقارما توراعاسى ءسانيا ءابدىراحمانوۆا ايتتى.
«بۇل كۇن 2005 جىلدان بەرى بۇكىل الەمدە ناۋقاستاردى دونورلىق قانمەن قامتاماسىز ەتۋدىڭ ماڭىزدىلىعىنا نازار اۋدارۋ ءۇشىن اتاپ وتىلەدى. ەلىمىزدە جىل سايىن 400 مىڭنان استام قان قۇيۋ پروتسەدۋراسى جاسالادى. وسى مۇمكىندىكتى پايدالانىپ, ەمدەلۋشىلەر مەن دارىگەرلەردىڭ اتىنان دونورلارعا – قىمباتتى دوستارىمىزعا, ەڭ جاقسى كومەكشىلەرىمىزگە العىس ايتامىن», دەدى س.ءابدىراحمانوۆا.
بيىل دۇنيەجۇزىلىك قان دونورى كۇنى «قان دونورلىعى – ىنتىماقتاستىق نەگىزى. دونور بولىڭىز جانە ادام ءومىرىن ساقتاۋعا ۇلەس قوسىڭىز» ۇرانىمەن وتۋدە. ۇيىمداستىرۋشىلاردىڭ ايتۋىنشا, بۇل كونتسەرت قالىڭ جۇرتشىلىقتى قان تاپسىرۋ قاجەتتىلىگى تۋرالى حاباردار ەتۋدىڭ, سونداي-اق قوعامدىق دەنساۋلىق ساقتاۋدى نىعايتۋ ءۇشىن ەرىكتىلەردىڭ وتەۋسىز قان دونورلىعىنىڭ ماڭىزىن ناسيحاتتاۋدىڭ تاعى ءبىر مۇمكىندىگى.
«دونور بولۋ – ادام ومىرىنە اراشا بولاتىن يگى ءىس دەپ ەسەپتەيمىن. وسى مىندەتتى اتقارىپ جۇرگەن بارشا دونورلارعا مىقتى دەنساۋلىق تىلەيمىن», دەدى ءانشى مەرۋەرت تۇسىپباەۆا.
ءوز كەزەگىندە دەنساۋلىق ساقتاۋ مينيسترلىگىنىڭ مەديتسينالىق كومەكتى ۇيىمداستىرۋ دەپارتامەنتى ديرەكتورىنىڭ ورىنباسارى گۇلنارا سارسەنباەۆا ءبىر قان دوناتسياسى ءۇش ادامنىڭ ءومىرىن ساقتاپ قالۋى مۇمكىن ەكەنىن اتاپ ءوتتى.
«قان قىزمەتىنىڭ ءتيىمدى جۇمىسى مەن دونورلارىمىزدىڭ قايىرىمدىلىعى مەن ىزگىلىگى ارقىلى ەلىمىزدەگى بارلىق مەديتسينالىق ۇيىم كەز كەلگەن ۋاقىتتا قان كومپونەنتتەرىمەن قامتاماسىز ەتىلەدى. بۇل قيىندىققا تاپ بولعان ءاربىر ادامنىڭ ءومىرىن ساقتاپ قالۋ مۇمكىندىگىن ارتتىرادى. قۇرمەتتى دونورلار, مەرەكە قۇتتى بولسىن جانە ادام ءومىرىن ساقتاپ قالعاندارىڭىزعا راحمەت!», دەدى ول.
ايتا كەتەيىك, كونتسەرت «AMANAT» پارتياسى مەن دەنساۋلىق ساقتاۋ مينيسترلىگىنىڭ قولداۋىمەن ۇيىمداستىرىلدى. ءىس-شاراعا ۇلتتىق وليمپيادا كوميتەتى توراعاسىنىڭ ورىنباسارى سەرىك ساپيەۆ, ءانشى دوسىمجان تاڭاتاروۆ پەن اسىلحان شالقاروۆ, بلوگەر سامال مەن ەربولات جاڭابىلوۆتار جانە تاعى دا باسقا تانىمال ادامدار قاتىستى.
دەنساۋلىق ساقتاۋ مينيسترلىگىنىڭ «دەنساۋلىق ساقتاۋ سالاسىنا قوسقان ۇلەسى ءۇشىن» توسبەلگىسىمەن 40-تان استام رەت قان تاپسىرعان دونورلار ەرنۇر تاۋىربەكوۆ پەن ازامات راحمەتوۆ ماراپاتتالدى. دونورلىققا كوپ جىل قاتىسقانى ءۇشىن سامات اعايسەنوۆ دەنساۋلىق ساقتاۋ مينيسترلىگىنىڭ قۇرمەت گراموتاسىمەن ماراپاتتالدى.