پەتروپاۆل قالاسىنىڭ 38 جاستاعى تۇرعىنى بارار جەرى, باسار تاۋى بولماعاننان كەيىن 4 ۇل-قىزىمەن ورمان ىشىندەگى جەركەپەنى پانالاۋعا ءماجبۇر بولىپ وتىر. پاتەر جالدايىن دەسە, تاپقان-قاپقانى بالا-شاعانىڭ ناپاقاسىنان ارتىلمايدى. قۇرقىلتايدىڭ ۇياسىنداي باسپانانىڭ اۋماعى بار-جوعى 20 شارشى مەتر. ءۇيدىڭ ءىشى ەلەكتر قۋاتىمەن عانا جىلىتىلادى. بالالاردىڭ الدى 7-گە تولسا, كىشىسى ەمشەكتە. مەكتەپتە وقيتىندارى التى شاقىرىم جەرگە كۇن سايىن جاياۋ-جالپىلاپ قاتىنايدى.
اققۋ ءبايدىلدينا بىلتىر جەلتوقساندا كەنجەسى دامەلىنى دۇنيەگە اكەلىسىمەن بىردەن ۇيىنە سۇرانعان. سەبەبى, قىستىڭ كوزى قىراۋدا تەرەزەدەن قاراپ, انالارىن زارىعا كۇتىپ وتىرعان 3 بالاسىنىڭ جايى قابىرعاسىنا قاتتى باتقان. كوپبالالى انا نە پەشى, سۋى جوق, ەدەندەرى مەن قابىرعالارى جۇپ-جۇقا ءۇيدى 1 ميلليون تەڭگەگە ساتىپ الىپ, الىپساتارلاردىڭ قارماعىنا ءتۇسىپ قالسا كەرەك. وسىلايشا, سولتۇستىكتىڭ قىتىمىر قىسىن ازەر وتكەرگەن جايى بار.
اقتاۋدا وبلىستىق قارجى پوليتسياسىندا اعا لەيتەنانت بولىپ قىزمەت ەتكەن ايەل قازىر دەكرەتتىك دەمالىستا. 3 جىل بۇرىن كۇيەۋىنەن اجىراسىپ, تۋعان جەرى – پەتروپاۆلعا كەلگەن. گاراجىن ساتىپ, وعان بار جيعان-تەرگەنىن قوسىپ, قايىڭدى ورمان ىشىندەگى ساياجايعا قولىن ازەر ىلىكتىرگەنگە ۇقسايدى. جاڭبىر ءسال-ءپال سەبەلەپ وتسە, مي باتپاققا ورانعان جولمەن ءجۇرۋ – ءبىر ماشاقات. بالالار دا, ءوزى دە اۋرۋشاڭ. پاتەر كەزەگىندە 2765-ءشى بولىپ تۇر. بىلتىر بۇل كەزەك 200 ادامعا عانا جىلجىعان. بۇرىنعى كۇيەۋى تولەيتىن اليمەنت پەن بالالاردىڭ جاردەماقىسىن قوسقاندا وتباسىلىق تابىس 40 مىڭ تەڭگەدەن اسپايتىن كورىنەدى.
ءومىر ەسقالي,
«ەگەمەن قازاقستان».
سولتۇستىك قازاقستان وبلىسى.