جاڭا وقۋ جىلىندا الماتى قالاسىنىڭ 1-4 سىنىپ وقۋشىلارى تەگىن ىستىق تاماقپەن قامتىلادى. بۇل تۋرالى وقۋ-اعارتۋ ۆيتسە-ءمينيسترى عاني بەيسەمباەۆ ايتتى, دەپ حابارلايدى Egemen.kz.
«بالالار جىلىندا» باستاۋىش سىنىپ وقۋشىلارىن تەگىن ىستىق تاماقپەن قامتۋ 10 پايىزعا ءوستى. بۇل باعىتتا نۇر-سۇلتان, شىمكەنت قالالارى, اتىراۋ, باتىس قازاقستان, قاراعاندى, پاۆلودار وبلىستارىنىڭ جۇمىسىن اتاۋعا بولادى. جاڭا وقۋ جىلىنان باستاپ الماتى قالاسى دا 1-4 سىنىپ وقۋشىلارىن تەگىن ىستىق تاماقپەن قامتۋدى جوسپارلاپ وتىر», دەدى عاني بەيسەمباەۆ مينيسترلىكتىڭ اپپارات جينالىسىندا.
ۆيتسە-ءمينيستردىڭ ايتۋىنشا, «وقۋعا قۇشتار مەكتەبى» رەسپۋبليكالىق جوباسى اياسىندا بالالار اراسىندا وقىرماندار قوزعالىسى جانداندىرىلدى. مەكتەپ كىتاپحانالارىنىڭ كىتاپ قورى 2,2 ميلليون دانا جاڭا كوركەم, بالالار ادەبيەتىمەن جاڭارتىلدى.
سونداي-اق بالالاردىڭ قۇقىقتارىن قورعاۋ سالاسىنداعى ۆولونتەرلىك قوزعالىسقا سەرپىن بەرىلدى. ۇيدە وقيتىن بالالارعا كومەك كورسەتۋگە 63 مىڭنان استام ەرىكتىلەر قاتىستى.
«5-11 سىنىپتاردا جاڭا وقۋ جىلىنان باستاپ ازاماتتىقتى, ادالدىقتى, پاراساتتىلىقتى, ەتيكانى, مەدياساۋاتتىلىقتى, قارجىلىق ساۋاتتىلىقتى قامتيتىن «پاتريوتيزم جانە جاھاندىق قۇزىرەتتەر» كۋرسى ەنگىزىلەدى», دەدى ۆيتسە-مينيستر.