پاۆلودارلىق ديقاندار كوكتەمگى ەگىس جۇمىستارىن اياقتاپ, ەندى جاۋىن-شاشىننىڭ مولىنان ءتۇسۋىن تىلەپ وتىر. سۋارمالى القابى بار شارۋالار بۇعان اسا الاڭداي قويماس. ولاردىڭ ويىندا – ەگىن بىتىك شىعىپ, ءونىمدى ءتيىمدى باعامەن ساتۋدىڭ امالى. نە دەسەك تە, مەملەكەتتىڭ شاپاعاتىن سەزىنىپ وتىرعان جەرگىلىكتى اۋىل شارۋاشىلىعى تاۋارىن وندىرۋشىلەرى ىشكى نارىقتى ساپالى ونىممەن قامتۋعا اتسالىسقانى ابزال.
وبلىستىق اۋىل شارۋاشىلىعى باسقارماسىنىڭ مالىمەتىنە سۇيەنسەك, بيىل ەگىس القابى 1 554,7 مىڭ گەكتاردى قۇراپ وتىر. وتكەن جىلمەن سالىستىرعاندا ءداندى داقىلدار القابى 19,2 مىڭ گەكتارعا, كۇنباعىس 6 مىڭ گەكتارعا, كارتوپ 1,7 مىڭ گەكتارعا, ءسابىز 0,2 مىڭ گەكتارعا, قىرىققابات 0,1 مىڭ گەكتارعا جانە پياز 0,2 مىڭ گەكتارعا ارتقان. سونىمەن قاتار, مال ازىعى داقىلدارى جوسپارداعى كورسەتكىشتەن جوعارى تۇر. وڭىردەگى بارلىق جەمشوپ داقىلدارى 102,9 مىڭ گەكتارعا تەڭ.
ەگىس ناۋقانىنا بارلىق موديفيكاتسياداعى 4 462 تراكتور جانە 245 ەگىس كەشەنى جۇمىلدىرىلعان. كوكتەمگى دالا جۇمىستارىن جۇرگىزۋگە 4,1 ملرد تەڭگە قاراجات ءبولىنىپتى. ال سۋبسيديالاۋ ىسىنە 1,8 ملرد تەڭگە قاراستىرىلعان.
ەگىس جۇمىستارى اياقتالدى ەكەن دەپ مينەرالدى تىڭايتقىشتاردى قولدانۋ توقتاپ قالمايدى. وسى رەتتە, جەرگىلىكتى ديقاندار تىڭايتقىشتاردى ساتىپ الۋ بويىنشا 17,8 مىڭ تونناعا كەلىسىمشارت جاساسقان. بۇگىندە «مينەرالدى تىڭايتقىشتاردىڭ قۇنىن سۋبسيديالاۋ» جانە «تۇقىم شارۋاشىلىعىن دامىتۋدى قولداۋ» باعدارلامالارى شەڭبەرىندە وتىنىمدەر قابىلدانىپ جاتىر.
بيىل وبلىس اكىمدىگى قولداۋىمەن ازىق-ت ۇلىك قاۋىپسىزدىگىن قامتاماسىز ەتۋ جانە اۋىلشارۋاشىلىق داقىلدارىن ءوسىرۋدىڭ تيىمدىلىگىن ارتتىرۋعا قاتىستى بىرقاتار شارانى قولعا العان بولاتىن. سايكەسىنشە, كوكونىس, باقشا جانە ءداندى داقىلدار القابى ارتىپ, ەگىنشىلىكپەن اينالىساتىن شارۋالاردى سۋبسيديالاۋعا بولىنەتىن قاراجات كولەمى دە ۇلعايىپ كەلەدى.
پاۆلودار وبلىسى