پرەزيدەنت جارلىعىمەن جاڭادان قۇرىلعان اباي وبلىسىنىڭ قۇرامىنا بۇرىنعى سەمەي وڭىرىنە قاراستى اۋداندار ەنگەنى ءمالىم. وسىعان وراي, بۇرىنعى ماقانشى, تاسكەسكەن, شار اۋداندارىن بەس ساۋساعىمداي جاقسى بىلگەندىكتەن وي ءبولىسۋدى ءجون سانادىم.
ءيا, اباي وبلىسى «شاڭىراق كوتەرىپ», اكىمشىلىك شەكارالارى بەلگىلەندى. وبلىستىق ءماسليحات دەپۋتاتتارى دا, ءوڭىر باسشىسى دا بەكىتىلدى. بۇل رەتتە بۇرىنعى سەمەي وبلىسى اۋماعىنا كىرگەن اباي, بەسقاراعاي, بورودۋليحا, شار, اياگوز, ءۇرجار, ماقانشى, تاسكەسكەن, شۇبارتاۋ اۋداندارىنىڭ اكىمشىلىك قۇرىلىمىن جاڭعىرتۋ جونىندە ويلانعانىمىز ءجون. ماسەلەن, قازىرگى جارما اۋدانى ءبولىنىپ, شار اۋدانى قايتا اشىلسا دۇرىس بولار ەدى. وعان جارما ستانساسىنان باستاپ جاڭعىزتوبە, كۇنشۋاق كەنتى, بەلتەرەك اۋىلدىق وكرۋگتەرى, بىرلىك اۋىلىنان سەمەيگە قاراي شىعاتىن جولداعى اۋىلداردى, سۋىقبۇلاق, كارپوۆكا, تەرىستاڭبالى, اۋەزوۆ كەنتى, شالاباي اۋىلدىق وكرۋگى, ارقالىق, ارقارلى, قاراسۋ, ۇلكەن قاراسۋ, ت.ب وكرۋگتەر كىرگىزىلسە دەگەن ۇسىنىس بار. سەمەي قالاسى ماڭايىنان جاڭاسەمەي اۋدانى ۇيىمداستىرىلىپ, وعان ورتالىعى – جاڭا-ءشۇلبى كەنتى ماڭايىنداعى شاعىن اۋىلدار: جاڭا باجەنوۆكا, كليمەنتەۆكا, پريرەچنوە, ۋتينكا, جارقىن, وزەننىڭ ەكى جاعىنداعى شاعىن جاقىن اۋىلدار قاراتىلسا كوپتىڭ كوڭىلىنەن شىعار ەدى. ابىرالى ءوڭىرى اۋدان بولىپ, قايتا ۇيىمداستىرىلىپ, دەگەلەڭ اۋدانى دەپ اتالسا, ورتالىعى – كۋرچاتوۆتا بولسا, ونىڭ اتاۋىن دەگەلەڭ دەپ وزگەرتسە ءيىسى قازاققا ساۋاپتى ءىس بولماي ما؟! ويتكەنى 40 جىل قازاق توپىراعىندا جويقىن جارىلىس جاساعان كۋرچاتوۆتى تورىمىزگە ەسكەرتكىش ەتىپ قويدىق. بۇل قۇندىلىقتاردى وزگەرتەتىن ۋاقىت جەتتى. كۋرچاتوۆتان بەرگى سەمەيگە دەيىن, بودەنە, شاعان, شاقامان سىقىلدى ارالارى 10 شاقىرىمنان بولاتىن اۋىلداردى دا جاڭا اۋدانعا قاراتقان ءجون سياقتى.
اباي وبلىسى قۇرامىندا بولاتىن اۋدانداردىڭ بيۋدجەتتەرى 2022 جىلى بەكىتىلىپ, قارجى جولدارى قاراستىرىلعان. سوندا جاڭادان قۇرىلاتىن – 4 ء(تورت) اۋدانعا عانا شىعىن قاراستىرۋ قاجەتتىگى تۋادى.
وسىدان ءبىراز بۇرىن ەلىمىزدىڭ باس گازەتى «ەگەمەن قازاقستانعا» ماقالاسى جاريالانىپ, ءۇرجار اۋدانىن ەكىگە ءبولىپ, ماقانشى ءوڭىرىن جەكە اۋدان ەتۋدى, وعان ۇرجارلىقتار كەلىسپەگەن جاعدايدا – اۋدان ورتالىعىن ماقانشى, ال اۋدان اتىن ء«ۇرجار» دەپ اتاۋعا ۇسىنىس ايتىلعان ەدى. ءۇرجار ءوڭىرىنىڭ ءبىرتالاي زيالى ازاماتتارى سودان كەيىن تەلەفون شالىپ, كوپشىلىگى قۋاتتاپ, قوسىمشا ۇسىنىستارىن دا ءبىلدىردى. بۇل ۇسىنىستاردىڭ نەگىزى – ماقانشى اۋدان ورتالىعى بولسا, وعان – ءۇرجاردىڭ كولدەنەڭ, اكساكوۆكا, ناۋالى, ەلتاي اۋىلدىق وكرۋگتەرى جانە ماقانشىنىڭ بۇرىنعى اۋدان كەزىندەگى تەرريتورياسىنا كىرەتىن ەلدى مەكەندەر كىرگىزىلسە دەگەن تىلەك ايتادى. اۋدان اتاۋىن «قابانباي اۋدانى» دەپ جاڭاشا قويسا وتە دۇرىس قابىلدانادى دەگەن پىكىردى ءجيى ەستىدىك. ويتكەنى بۇل ءوڭىردىڭ جەرگىلىكتى تاريحى دارابوز, حان باتىر اتانعان قاراكەرەي قابانباي باتىردىڭ ەسىمىمەن تىعىز بايلانىستى, سونىمەن قاتار شەكارالىق ءوڭىر, ەلىمىزدەگى ەڭ ەڭسەلى قابانباي ەسكەرتكىشى دە وسى ماقانشىدا تۇر.
ال ءۇرجار اۋدانى – بارقىتبەل اۋدانى دەپ وزگەرتىلسە, ورتالىعى ءۇرجار كەنتى بولىپ بەلگىلەنىپ, وعان تاۋ ەتەگىندەگى, تاۋ القىمىنداعى بارلىق اۋىلدار, بۇرىنعى تاسكەسكەن اۋدانىنىڭ اۋىلدىق وكرۋگتەرى ەنگىزىلىپ, تاڭسىق, قولا اۋىلدارى, اقتوعاي كەنتتەرى قاراتىلسا, اۋدانداعى ەگىنسۋ, قاراقول سۋ قويمالارىنىڭ توڭىرەگىندەگى ەگىستىكتەرگە قىزىلشا وتىرعىزىلىپ, تالدىقورعان وبلىسىنداعى كوكسۋ قانت زاۋىتتارىن ونىممەن قامتىپ وتىرسا, بۇكىل رەسپۋبليكاعا ءتيىمدى بولار ەدى. سونداي-اق تاسكەسكەن, شولپان, قاراقول اۋىلدىق وكرۋگتەرى جاستارىنا دا جۇمىس ورىندارى اشىلۋعا مۇمكىندىك تۋادى دەگەن ويدى ايتادى.
سۇيەۋباي بايقادي ۇلى,
قازاقستاننىڭ قۇرمەتتى ءجۋرناليسى,
مادەنيەت قايراتكەرى
اباي وبلىسى