ىشكى ىستەر مينيسترلىگى ءوز قۇزىرەتى شەڭبەرىندە قاڭتار وقيعالارى بويىنشا قىلمىستىق ىستەردى تەرگەۋدى جالعاستىرىپ جاتىر. بۇل تۋرالى تەرگەۋ دەپارتامەنتىنىڭ باستىعى سانجار ءادىلوۆ قر پرەزيدەنتى جانىنداعى وكق-دا وتكەن بريفينگتە ايتتى, دەپ حابارلايدى Egemen.kz.
بۇگىنگى تاڭدا ىشكى ىستەر ورگاندارى تەرگەۋشىلەرىنىڭ وندىرىسىندە 56 كۇدىكتىگە قاتىستى 553 قىلمىستىق ءىس بار.
«جەكە باسىن, سيپاتتايتىن دەرەكتەردى جانە جاسالعان قىلمىسقا قاتىستىلىعىن ەسكەرە وتىرىپ, ىشكى ىستەر ورگاندارى بويىنشا 255 كۇدىكتى قاماۋدان بوساتىلدى, ولارعا قاتىستى قوعامنان وقشاۋلاۋمەن بايلانىستى ەمەس بۇلتارتپاۋ شارالارى تاڭدالدى. ودان باسقا سوتتىڭ ۇكىمى بويىنشا 332 سوتتالۋشى قاماۋتان بوساتىلدى», دەپ اتاپ ءوتتى سانجار ءادىلوۆ.
ول بۇگىنگى تاڭدا وندىرىستەگى قىلمىستىق ىستەر بويىنشا 14 ادامنىڭ قاماۋدا وتىرعانىن ايتتى. ونىڭ ىشىندە الماتى قالاسى بويىنشا – 8, الماتى وبلىسى – 3 جانە جامبىل وبلىسى بويىنشا 3 ادام اۋىر قىلمىستاردى جاسادى دەگەن كۇدىككە ىلىنگەن.
«ىشكى ىستەر ورگاندارىنىڭ تەرگەۋشىلەرى 565 ايىپتالۋشىعا قاتىستى 344 قىلمىستىق ءىستى ايىپتاۋ اكتىسىن سوتقا جولدادى. ونداي ىستەردىڭ نەگىزگى بولىگىن بوتەننىڭ مۇلكىن ۇرلاۋ جونىندەگى ىستەر قۇرايدى – 257, قارۋدى زاڭسىز ساقتاۋ – 37, قارۋدى ۇرلاۋ – 18, ايداپ كەتۋ – 5 جانە ت.ب. قۇراپ وتىر», دەدى س.ءادىلوۆ.
ونىڭ ايتۋىنشا, سوتتار 382 ادامدى سوتتادى, ونىڭ ىشىندە 46 ادام باس بوستاندىعىنان ايىرۋعا سوتتالدى, وسى ادامدار بۇرىن سوتتالعان جانە كىناسىن مويىنداماعان, كەلتىرىلگەن زالالدى وتەمەگەن.