كولىك جۇرگىزۋشىلەر اراسىندا VIP نومىرگە سۇرانىس كوپ. الايدا قوماقتى قارجى تولەپ, وسىنداي ءنومىردى ساتىپ العانداردىڭ قۋلىعى اشكەرە بولىپ جاتىر. سىبايلاس جەمقورلىققا قارسى ءىس-قيمىل اگەنتتىگىنىڭ اتىراۋ وبلىستىق دەپارتامەنتى ء«ساندى» مەملەكەتتىك تىركەۋ ءنومىرى بەلگىلەرىن بەرۋ ۇدەرىسىنە مونيتورينگ جۇرگىزدى. مونيتورينگ كەزىندە بيۋدجەتكە ءىرى كولەمدە مەملەكەتتىك باجدى تولەۋدەن جالتارۋ دەرەگى انىقتالدى.
ماسەلەن, 2019-2021 جىلدارى بەرىلگەن VIP نومىرلەر ءۇشىن 59 كولىك يەسىنەن 14 ملن تەڭگەدەن استام مەملەكەتتىك باج بيۋدجەتكە تۇسپەگەن. ال 78 جۇرگىزۋشى 2,7 ملن تەڭگە مولشەرىندە مەملەكەتتىك باجدى تولىق كولەمدە تولەمەگەن. بۇعان قوسا 52 قىزمەت الۋشى جالپى سوماسى 14,4 ملن تەڭگە مولشەرىندەگى مەملەكەتتىك باجدى تولەۋدەن نەگىزسىز بوساتىلىپتى. وسىلايشا, وتكەن ءۇش جىلعا جۇرگىزىلگەن مونيتورينگ قورىتىندىسىمەن مەملەكەتكە 31,5 ملن تەڭگەدەن استام زالال كەلتىرىلگەن.
قۋلىعىنا قۇرىق بويلامايتىن پىسىقايلار VIP ءنومىردى ساتىپ الۋ كەزىندە جالعان تۇبىرتەك ۇسىنىپ, جالعاندى جالپاعىنان باسپاق بولعان. بىراق ولاردىڭ بۇل قۋلىعى وزدەرىن قۇرىققا ءتۇسىردى. اتىراۋ قالالىق پروكۋراتۋراسى كوزگە تەز شالىناتىن نومىرلەردى جالعان تۇبىرتەكپەن ساتىپ العانداردى انىقتادى. كولىك جۇرگىزۋشىلەرىنە ساتىلعان نومىرلەردىڭ سوماسىن بيۋدجەتكە ناقتى تۇسىممەن سالىستىرىپ تەكسەرۋ كەزىندە 5 ملن تەڭگەدەن استام قاراجاتتىڭ تۇسپەگەنى بەلگىلى بولدى. ء«ساندى» نومىرلەردى ساتىپ الۋشىلار تولەم جاساردا جالعان تۇبىرتەكتەردى قولدانىپ, مەملەكەتكە زالال كەلتىرگەن. قازىر اتىراۋ قالالىق پروكۋراتۋراسى اتالعان دەرەككە قاتىستى قىلمىستىق كودەكستىڭ 190-بابىنىڭ 3-بولىگىمەن, 345-بابىنىڭ 3-بولىگىمەن سوتقا دەيىنگى تەرگەپ-تەكسەرۋ امالدارىن جۇرگىزىپ جاتىر.
ال اتىراۋ كولىك پروكۋراتۋراسى جەكە پايدالانۋعا ارنالعان كولىك قۇرالدارىن ەۋرازيالىق ەكونوميكالىق وداقتىڭ كەدەندىك اۋماعىنا ۋاقىتشا اكەلۋ كەزىندە زاڭدىلىقتىڭ ساقتالۋىنا تالداۋ جۇرگىزگەن. تالداۋ كەزىندە گرۋزيادان اكەلىنگەن Toyota Land سruiser كولىگى ءۇشىن كەدەندىك تولەمدى جۇرگىزبەي, زاڭسىز مەملەكەتتىك تىركەۋگە قويۋ دەرەگى اشكەرەلەندى. كولىك پروكۋراتۋراسىنىڭ اكتىسى نەگىزىندە وبلىستىق پوليتسيا دەپارتامەنتى قالالىق سوتقا تالاپ-ارىز بەردى. ونى قاراۋ ناتيجەسىندە, اۆتوكولىك يەسى مەملەكەت پايداسىنا 8 ملن تەڭگە كولەمىندە كەدەندىك باج بەن ءوسىمپۇل تولەدى.
تاعى ءبىر دەرەككە جۇگىنەر بولساق, جۇرگىزۋشى كۋالىگىن بەرۋدە دە زاڭسىزدىق بار ەكەن. ارنايى تالداۋ كەزىندە سوت ۇكىمىمەن كولىك باسقارۋ قۇقىعىنان ءومىر بويىنا ايىرىلعان ادامدارعا جۇرگىزۋشى كۋالىگى بەرىلگەنى بەلگىلى بولدى. اتىراۋ قالاسىنىڭ پروكۋرورى ارشات ءتايتۋلليننىڭ ايتۋىنشا, تالداۋدىڭ ماقساتى – جولدا قۇقىق بۇزۋشىلىقتىڭ الدىن الۋ جانە تۇرعىنداردىڭ قاۋىپسىزدىگىن قامتاماسىز ەتۋ.
– پروكۋرورلىق قاداعالاۋ اكتىسىمەن جاۋاپتى تۇلعالار تارتىپتىك جاۋاپكەرشىلىككە تارتىلدى. بۇدان باسقا سوت ۇكىمىمەن كولىك باسقارۋ قۇقىعىنان ءومىر بويىنا ايىرىلعان اتىراۋ قالاسى تۇرعىنىنىڭ الماتى قالاسىنداعى اكىمشىلىك پوليتسيا باسقارماسى ارقىلى جۇرگىزۋشى كۋالىگىن زاڭسىز العانى انىقتالدى. وسىعان بايلانىستى جيناقتالعان ءىس-قۇجاتتارى پروتسەستىك شەشىم قابىلداۋ ءۇشىن سىبايلاس جەمقورلىققا قارسى ءىس-قيمىل اگەنتتىگىنىڭ الماتى قالالىق دەپارتامەنتىنە جولداندى, – دەيدى ارشات تايتۋللين.
اتىراۋ وبلىسى