مەملەكەت باسشىسى «م. شاحانوۆقا جوعارى دارەجەلى ەرەكشەلىك بەلگىسى – «قازاقستاننىڭ ەڭبەك ەرى» اتاعىن بەرۋ تۋرالى» جارلىققا قول قويدى, دەپ حابارلايدى Egemen.kz.
بۇل جايىندا پرەزيدەنت قاسىم-جومارت توقاەۆ ۇلىتاۋدا وتكەن ۇلتتىق قۇرىلتاي كەزىندە مالىمدەدى.
«قادىرلى اعايىن, قۇرىلتايدى بارشا جۇرتىمىز ءۇشىن جاعىمدى جاڭالىقپەن اياقتاعىم كەلىپ وتىر. كەشە داڭقتى كومپوزيتور ءشامشى قالداياقوۆقا «قازاقستاننىڭ ەڭبەك ەرى» اتاعى بەرىلگەنىن بىلەسىزدەر. ول – ءانۇرانىمىزدىڭ اۆتورى, ۇلت رۋحانياتىندا ەرەكشە ورنى بار اسا كورنەكتى تۇلعا. ءبىرتۋار سازگەرگە قۇرمەت كورسەتۋ – پەرزەنتتىك پارىزىمىز. ءشامشىنى حالقىمىز «قازاق ءۆالسىنىڭ كورولى» دەپ قادىرلەيدى. ءشامشىنىڭ اندەرى قاشاندا حالىقتىڭ جۇرەگىندە, ەشقاشان قۇندىلىعىن جويمايدى. ونىڭ اقىن مۇحتار شاحانوۆپەن بىرلەسىپ جازعان اندەرى ەلگە كەڭىنەن تانىمال. ايگىلى كومپوزيتور مەن اتاقتى اقىننىڭ دوستىعى – بارشا جۇرتقا ۇلگى. جاقىندا ءشامشىنىڭ ءىنى-دوسى مۇحتار شاحانوۆ سەكسەن جاسقا تولادى. ونىڭ شىعارماشىلىق ەڭبەگى قانداي قۇرمەتكە دە لايىقتى. ول – وتە شىنشىل, ادال, ۇلتجاندى ادام. مەن بۇگىن مۇحتار شاحانوۆقا «قازاقستاننىڭ ەڭبەك ەرى» اتاعىن بەرۋ تۋرالى جارلىققا قول قويدىم. ەلىمىزدىڭ ەڭ جوعارى ماراپاتىن اقىنعا ۇلت ۇياسى – ۇلىتاۋدىڭ تورىندە تاپسىرعاندى ءجون كوردىم», دەدى قاسىم-جومارت كەمەل ۇلى.