سەنات دەپۋتاتى ەدىل مامىتبەكوۆ پالاتا وتىرىسىنداعى سوزىندە بيۋدجەت قارجىسىن پايدالانۋعا قاتىستى ماسەلەلەردى اتاپ ءوتتى, دەپ حابارلايدى Egemen.kz.
«حولدينگتەر مەن بانكتەردەن جانە ەكسپورتتاۋشىلاردان مەملەكەتكە تيەسىلى بارلىق كىرىستى جيناۋدىڭ ورنىنا بولاشاق ۇرپاقتاردىڭ اقشاسىن الىپ وتىرمىز. بانكتەردى قولداۋعا بۇرىن بەرىلگەن اقشانى قايتارۋعا بەلسەندى تۇردە تىرىسىپ جاتقان جوقپىز, بۇل شامامەن ءتورت ميلليارد دوللار», دەدى سەناتور.
دەپۋتات بيۋدجەتتىك جانە بيۋدجەتتەن تىس تۇسىمدەرگە, ازىرلەنگەن ستراتەگيالارعا, مەملەكەتتىك باعدارلامالار مەن ۇلتتىق جوبالارعا قاراماستان, ەكونوميكا ءالى دە جەتكىلىكتى دەڭگەيدە جاقسارا قويماعانىن اتاپ ءوتتى. بۇل ەكونوميكانى ءارتاراپتاندىرۋ دەڭگەيىنىڭ تومەندىگىنە جانە شيكىزات ءوندىرىسى مەن ەكسپورتقا تاۋەلدى بولۋدىڭ دەڭگەيى جوعارى ەكەندىگىنە دە بايلانىستى.
«سونىڭ ناتيجەسىندە – بيۋدجەت قارجىسىن پايدالانۋعا پارمەندى باقىلاۋ جوق. بيۋدجەت قارجىسىن جوسپارلاۋ مەن يگەرۋدەگى داستۇرگە اينالعان تيىمسىزدىك سونىڭ سالدارى. مىسالى, مەملەكەتتىك باعدارلامالار بويىنشا عانا بيۋدجەت قاراجاتىن جۇمساۋدىڭ تيىمسىزدىگى 142,4 ملرد تەڭگەنى قۇراپ وتىر. بارلىق مەملەكەتتىك باعدارلامالار مەن ۇلتتىق جوبالار بويىنشا ءىس جۇزىندە 10 ملرد تەڭگەدەن 345 ملرد تەڭگەگە دەيىن اۋقىمدى قارجىنى پايدالانۋدىڭ تولىق ەمەستىگى بايقالادى», دەپ اتاپ ءوتتى ەدىل مامىتبەكوۆ.
سەناتوردىڭ پىكىرىنشە, وسىعان بايلانىستى ۇكىمەت مەملەكەتتىك جوسپارلاۋ جۇيەسىندە ءتيىستى ءتارتىپ ورناتۋى كەرەك. ونىڭ تيىمدىلىگىن ارتتىرۋ ءۇشىن باعدارلامالىق ءتاسىلدىڭ عىلىمي-ادىستەمەلىك نەگىزدەرىن جەتىلدىرۋ دە ماڭىزدى. سەناتور سونداي-اق قازاقستاندا تولىققاندى ازاماتتىق قوعامدى ودان ءارى قالىپتاستىرۋ ءۇشىن جاعداي جاساي وتىرىپ, مەملەكەتتىك ورگانداردىڭ قىزمەتىنە قوعامدىق باقىلاۋ مۇمكىندىكتەرىن كۇشەيتۋ قاجەتتىگىن دە ايتىپ كەتتى.
ايانا توعانبەك