قازاقستاندىق عالىمدار بىرەگەي ءفيبريندى گيدروگەل ازىرلەدى. ونى قولدانۋ ارقىلى 15 قازاقستاندىققا تىزە بۋىنىنىڭ شەمىرشەگىن قالپىنا كەلتىرۋ وپەراتسياسى جاسالدى.
وپەراتسيا جاسالعان جانداردىڭ كوبى – بۋىن اۋرۋلارىمەن اۋىراتىن 50 جاستان اسقان ادامدار. العاشقى پاتسيەنت وڭ جاق تىزە بۋىنىنىڭ ارتروزى بار 28 جاستاعى ازامات بولدى. عالىمداردىڭ ايتۋىنشا, ۇقساس دياگنوزدارمەن ەمدەۋدىڭ بىرنەشە ءادىسى بار, بىراق گيدروگەلدى قولدانۋ – زاقىمدالعان بۋىندار مەن شەمىرشەكتى تولىعىمەن قالپىنا كەلتىرۋگە مۇمكىندىك بەرەتىن جالعىز ءادىس.
جاڭا تەحنيكانىڭ نەگىزگى ازىرلەۋشىسى – ۇلتتىق بيوتەحنولوگيالىق ورتالىق جانىنداعى ءدىڭ جاسۋشالارى زەرتحاناسىنىڭ مەڭگەرۋشىسى ۆياچەسلاۆ وگاي.
ء«ۇش اي ىشىندە ءفيبريندى گيدروگەلدىڭ كلينيكالىق سىناقتارىندا 15 ەرىكتىگە وپەراتسيا جاسادىق. پاتسيەنتتەردىڭ باسىم بولىگى – جاسىنا بايلانىستى بۋىندارىندا وزگەرىستەرى بار ادامدار. وپەراتسيا 15-25 مينۋتقا دەيىن سوزىلادى. سونداي-اق بارلىق وپەراتسيا شتاتتىق رەجىمدە جاسالدى. ناۋقاستار التى ايدا ساۋىعىپ كەتەدى, بىراق ەگدە جاستاعىلاردىڭ وڭالۋىنا ۇزاعىراق ۋاقىت كەتۋى مۇمكىن. وسى كەزەڭ وتكەننەن كەيىن العاشقى ناتيجەلەردى جاريالاي الامىز», دەدى عالىم ۆ.وگاي.
كلينيكالىق سىناقتار اكادەميك ن.باتپەنوۆ اتىنداعى تراۆماتولوگيا جانە ورتوپەديا ۇلتتىق عىلىمي ورتالىعىندا ناۋرىز ايىندا باستالدى. زەرتتەۋدىڭ العاشقى ەكى كەزەڭى وسى جىلدىڭ سوڭىنا دەيىن جالعاسادى. كەيىن بىرنەشە ورتالىقتا كلينيكالىق سىناقتار وتكىزىلەدى. ونىڭ ناتيجەسىندە بيومەديتسينالىق پرەپاراتتى تىركەۋ, ونى جاپپاي ءوندىرۋ جانە بۋىن اۋرۋلارى بار ادامدارعا كەڭىنەن قولدانۋ جوسپارلانىپ وتىر. پروتسەدۋرانى اقىلى دا, كۆوتا بويىنشا تەگىن دە الۋعا بولادى.
ايتا كەتۋ كەرەك, ادىستەمە ءبىلىم جانە عىلىم مينيسترلىگىنىڭ قارجىلاي قولداۋىمەن جاسالعان. عىلىمي جوباعا ۇلىبريتانيا ەلشىلىگى قىزىعۋشىلىق تانىتىپ وتىر.
ارۋجان ناعاشىباي,
ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ 2-كۋرس ستۋدەنتى