سيريا جونىندەگى استانا پروتسەسىنىڭ بارلىق تاراپتارى 2022 جىلعى 15-16 ماۋسىمدا نۇر-سۇلتان قالاسىندا وتەتىن كەلىسسوزدەرگە قاتىساتىنىن راستادى, دەپ حابارلايدى Egemen.ءkz سىم ءباسپاسوز قىزمەتىنە سىلتەمە جاساپ.
كەلىسسوزدەرگە كەپىلگەر-مەملەكەتتەر – رەسەي, تۇركيا جانە يران, سونداي-اق سيريا ۇكىمەتى مەن سيريالىق وپپوزيتسيا دەلەگاتسيالارى قاتىسادى. كەزدەسۋگە باقىلاۋشىلار رەتىندە بۇۇ باس حاتشىسىنىڭ سيريا جونىندەگى ارنايى وكىلى كەڭسەسىنىڭ ساياسي ماسەلەلەر جونىندەگى باس قىزمەتكەرى روبەرت دانن, يوردانيا دەلەگاتسياسى, بۇۇ بوسقىندار ىستەرى جونىندەگى جوعارعى كوميسسارى باسقارماسىنىڭ جانە حالىقارالىق قىزىل كرەست كوميتەتىنىڭ وكىلدەرى قاتىسادى.
سونىمەن قاتار رەسەي دەلەگاتسياسى رف پرەزيدەنتىنىڭ سيريا جونىندەگى ارنايى وكىلى الەكساندر لاۆرەنتەۆ, تۇركيا دەلەگاتسياسى ءسىم كوپجاقتى دەپارتامەنتىنىڭ باس ديرەكتورى سەلدجۋك ۋنال, يران دەلەگاتسياسى ءسىم ساياسي ماسەلەلەر جونىندەگى اعا كومەكشىسى الي اسگار حادجي دە قاتىسادى.
كەلىسسوزدەردىڭ كۇن تارتىبىنە سيرياداعى جاعداي, ونىڭ ىشىندە گۋمانيتارلىق جانە الەۋمەتتىك-ەكونوميكالىق احۋال, جەنەۆاداعى سيريالىق كونستيتۋتسيالىق كوميتەت جۇمىسىنىڭ جاندانۋ پەرسپەكتيۆالارى, تاراپتار اراسىنداعى سەنىمدى نىعايتۋ, كەپىلگە الىنعانداردى بوساتۋ جانە ءىز-ءتۇسسىز جوعالعانداردى ىزدەۋ ماسەلەلەرى ەنەدى.
2022 جىلعى 15 ماۋسىمدا كەپىلگەر-ەلدەر ساراپشىلار دەڭگەيىندە ەكىجاقتى جانە ۇشجاقتى كونسۋلتاتسيالار وتكىزۋگە نيەتتى, 16 ماۋسىمدا بارلىق تاراپتاردىڭ قاتىسۋىمەن جالپى وتىرىس وتەدى.