مۋزەي عىلىمي, مادەني-تاريحي ورتالىق سانالاتىندىقتان وتكەنگە ونەگە, كەلەشەككە ساباق ەكەنى انىق. ءبىزدىڭ بايزاق اۋداندىق تاريح-ولكەتانۋ مۋزەيى بەس ەكسپوزيتسيالىق زالدان تۇرادى. اتاپ ايتقاندا, ارحەولوگيا زالىندا ورتاعاسىرلىق ارحيتەكتۋرالىق جادىگەرلەر قويىلسا, ەتنوگرافيا زالىندا قازاق حالقىنىڭ ءداستۇرلى قولونەر بۇيىمدارى, كوشپەندى قازاق حالقى قولدانعان اس ءۇي بۇيىمدارى ورنالاسقان. ءۇشىنشى زال اۋدان تاريحىنا ارنالعان.
ال داڭق زالىندا, ۇلى وتان سوعىسىنىڭ باتىرى اقادىل سۋحانباەۆقا پانوراما جاسالسا, مادەنيەت جانە ونەر زالىندا بايزاق اۋدانىنان شىققان قازاقتىڭ ماڭدايالدى ازاماتتارى, عىلىم, ءبىلىم, سپورت, ونەر سالاسىنا ەڭبەگى سىڭگەن, مەملەكەتتىك مارتەبەگە يە بولعان قايراتكەرلەردىڭ ءومىر تاريحى, فوتوسۋرەتتەرى, شىعارمالارى ورنالاسقان.
ۇستىمىزدەگى جىلدىڭ العاشقى توقسانىندا مۋزەي تاراپىنان ۇيىمداستىرىلعان ەكسكۋرسيا سانى 13-كە جەتسە, لەكتسيالار سانى 9-دى قۇرادى. 8 كورمە وتكىزىلىپ, وعان قاتىسۋشىلار 370 ادامدى قۇراسا, مۋزەي قورىنا ەسەپكە الىناتىن ەكسپوناتتار سانى 15-كە جەتتى.
«مۇراجايى مەن مۇراعاتى بار ەل – كەلەشەگىن ويلاعان ەل», – دەيدى. وسىدان بىرنەشە جىل بۇرىن ەلىمىزدە باستاۋ العان «اۋىل – ەل بەسىگى» جوباسى اياسىندا 3 ملن 372 مىڭ تەڭگەگە مۋزەي عيماراتىنا قوسىمشا ەكى بولمە سالىنىپ بەرىلدى. مەكەمە الدى اباتتاندىرىلىپ, اربا مەن ديىرمەن تاستار, بالبالتاستار قويىلدى. كورنەكىلىك قۇرالدارى – «لايتبوكس», ستەلا ءىلىنىپ, اۋدان ورتالىعىنىڭ اجارىن اشا ءتۇستى. سونىمەن قاتار مۋزەيدەگى جادىگەرلەرگە QR-كود ورناتىلعان.
بۇل دەگەنىمىز, مۋزەيگە كەلۋشىلەر بۇدان بىلاي پلانشەت, سمارتفون, ايفون سەكىلدى گادجەتتەردەگى ارنايى باعدارلامانى سكانەرلەپ, قازاق, ورىس تىلدەرىندە جادىگەرلەر جايلى تولىق ماعلۇمات الا الادى. ال جۋىردا مۋزەيىمىزدە جاعىمدى جاڭالىق بولدى. بىزدە ەندى «اۋديوگيد» قىزمەتى جۇمىس ىستەيدى. ياعني كەلۋشىلەر ءوز قالاۋى بويىنشا اۋديوگيد قىزمەتىنە جۇگىنە وتىرىپ, مۋزەي ءىشىن ارالاۋلارىنا بولادى. مۇنىمەن قوسا «بايزاق بابا», «ايشا ءبيبى», «قاراحان بابا», «تەكتۇرماس» كەسەنەلەرىنىڭ شاعىن ماكەتتەرىن جاساتتىق.
سونىمەن قاتار وسى سالادا تاجىريبەلەرى بار ارداگەر اعا-اپالارىمىز ءابۋتالىپ كوشباەۆ, تامارا ميراموۆا, د.تولەپبەرگەنوۆ جانە وكىنىشكە قاراي جاقىندا عانا ارامىزدان كەتكەن, جاقسى ازامات ساپار قالمۇراتوۆتىڭ ەڭبەگى زور. مىنە, سول كىسىلەردىڭ ءىزىن جالعاي مۋزەيىمىزدە بىلىكتى ماماندار تولە نارجانوۆ, سانيا مەكەمتاسقىزى, ايدانا شوتباسوۆا, ايناگۇل مامىتبەكوۆا, جامال ابدراحمانوۆا ەلەۋلى ەڭبەك ەتىپ كەلەدى. سونىمەن قاتار جىل سايىن «مۋزەيگە سىي» اكتسياسىن ۇيىمداستىرىپ, وسىنىڭ نەگىزىندە تۇرعىندار وزدەرى كەلىپ, جادىگەرلەرىن تاپسىرىپ جاتىر. وسى رەتتە, اكتسياعا قولداۋ كورسەتكەن, اتاپ ايتقاندا, زاتەكۇل مولداباەۆا, سەرىك بالابەكوۆ, ماراتباي وسكەنباي ۇلى, ايات ابىلداەۆ, گۇلناز الىمقۇلوۆا, ءتولجان راحمانوۆ سىندى مۋزەي جاناشىرلارىنا شىنايى العىسىمىزدى بىلدىرەمىز.
وسەر نۇرباەۆ,
بايزاق اۋداندىق تاريحي-ولكەتانۋ مۋزەيىنىڭ ديرەكتورى
جامبىل وبلىسى