ەل كارتاسىنا جەكە ءوڭىر بولىپ ەنگەن جەتىسۋ وبلىسىنداعى اكىمشىلىك شەكارا ءبولىنىسى مەن اتقارۋشى بيلىك قۇرىلىمىن قالىپتاستىرۋ ءۇردىسى تولىقتاي اياقتالدى دەۋگە بولادى. ەندىگى جەردە ءوڭىردىڭ قالىپتى وركەندەۋى مەن الەۋمەتتىك-ەكونوميكالىق دامۋىنا قاتىستى جۇمىس كۇن تارتىبىنە شىعاتىنى ايان. بۇل تۇرعىدا كۇنى كەشە وبلىس باسشىسى بولىپ تاعايىندالعان بەيبىت يساباەۆتىڭ اكىم رەتىندە اتقاراتىن ءىسى قىرۋار.
جاقىندا جەتىسۋ وبلىسىنداعى بەلسەندى قاۋىممەن كەزدەسكەن پرەمەر-مينيستر ءاليحان سمايىلوۆ وبلىستىڭ جاڭا باسشىسىنا باسقارۋ ورگاندارى مەن مەملەكەتتىك مەكەمەلەردىڭ تۇراقتى جۇمىسىن قالىپتاستىرۋدى مىندەتتەگەن ەدى. ۇكىمەت باسشىسى سونداي-اق جاڭا ينۆەستيتسيالىق جوبالاردى ىسكە اسىرۋ, جاڭا جۇمىس ورىندارىن كەڭىنەن اشۋ كەرەكتىگىن دە باسا ايتتى.
رەتى كەلگەندە ءبىز ۇكىمەت باسشىسى اتاپ وتكەن تالدىقورعان قالاسىنداعى يندۋستريالدى ايماقتىڭ قازىرگى جاي-كۇيىن تىلگە تيەك ەتپەكپىز. جالپى, «تالدىقورعان» يندۋستريالدى ايماعىنىڭ اۋماعى 594,9 گەكتار جەردى الىپ جاتىر ەكەن. 2016 جىلى قازىعى قاعىلعان ايماقتىڭ قۇرىلىس جۇمىستارىن كەزەڭ-كەزەڭگە ءبولىپ جۇرگىزۋ جوسپارلانعان بولاتىن. مۇندا قازىر ينجەنەرلىك جۇيەلەر تارتىلىپ, قاجەتتى جۇمىستىڭ باسىم بولىگى اياقتالعان. ال يندۋستريالدى ايماقتىڭ قۇرىلىسىنا رەسپۋبليكالىق بيۋدجەتتەن 2,9 ملرد تەڭگە قاراجات بولىنگەن بولاتىن. بۇگىندە ينۆەستورلاردىڭ العاشقى لەگى ءوز ءوندىرىس ورىندارىن وسى ايماققا كوشىرىپ, جۇمىسىن باستاپ كەتكەن. ياعني وسى ساتتە «تالدىقورعان» يندۋستريالدى ايماعىنىڭ اۋماعىندا 6 كاسىپورىن ورنالاستى. مۇنداعى وندىرىستە ءتورت جۇزدەي ادام جۇمىس ىستەيدى. تاعى 3 ينۆەستيتسيالىق جوبا قولعا الىنىپ جاتقان كورىنەدى.
سولاردىڭ قاتارىندا جاقىندا وبلىس اكىمدىگىمەن كەلىسىمشارتقا قول قويعان «تك «گازوبلوك» كومپانياسى مەن «المپلاست» سەرىكتەستىگىنىڭ جوبالارى بار. مەموراندۋم اياسىندا قۇرىلىس سالاسىنداعى 5 جاڭا جوبا قولعا الىنباق. ماسەلەن, «تك «گازوبلوك» كومپانياسى ىلە اۋدانىندا 3 زاۋىت, تالدىقورعاندا 1 زاۋىت سالۋعا نيەتتى. بۇل كاسىپورىندار گازبلوكتار, تسەمەنت پانەلدەردىڭ تالشىقتارىن, شىنى ماقتالارىن شىعاراتىن بولادى. جوبالار جەتى جىلعا جوسپارلانعان. شامامەن 26 ملرد تەڭگە ينۆەستيتسيا تارتىلىپ, 240 جۇمىس ورنى اشىلادى.
– ءبىز شىعاراتىن قۇرىلىس ماتەريالدارى نەگىزىنەن سىرت ەلدەردەن اكەلىنەدى. قىسقاشا ايتقاندا, يمپورتقا تاۋەلدى. سوندىقتان ءبىز ىشكى نارىقتىڭ سۇرانىسىن وتاندىق ونىمدەرمەن تولىقتىرۋدى ماقسات ەتىپ وتىرمىز, – دەيدى «تك «گازوبلوك» كومپانياسىنىڭ باس ديرەكتورى ماكسيم كيم.
ال «المپلاست» جشس «تالدىقورعان» يندۋستريالدى ايماعىندا ديامەترى 20- 1 200 مم پلاستيك قۇبىرلار شىعاراتىن ءوندىرىس ورنىن اشادى. جوبا 2022-2023 جىلدارى ىسكە اسىرىلادى. تارتىلاتىن ينۆەستيتسيا كولەمى – 2,6 ملرد تەڭگە شاماسىندا, ناتيجەسىندە, 37 جۇمىس ورنى قۇرىلادى. جوبانىڭ جىلدىق قۋاتى – 16,8 مىڭ توننا. بۇل جوبالار قۇرىلىس يندۋسترياسىنىڭ دامۋىنا جاڭا سەرپىن بەرىپ, ەل نارىعىنا وتاندىق قۇرىلىس ماتەريالدارىن كوپتەپ شىعارۋعا ۇلەس قوسپاق.
جالپى, تالدىقورعان قالاسى بويىنشا ينۆەستورلاردى تارتۋ جۇمىسى ءالى دە جانداندىرۋدى قاجەت ەتەدى ەكەن. ياعني وبلىس ورتالىعىندا كاسىپكەرلىكتى دامىتۋ جونىندەگى ۇلتتىق جوبا مەن «بيزنەستىڭ جول كارتاسى» اياسىندا كاسىپكەرلەرگە قولداۋ كورسەتۋ جۇمىسىن كۇشەيتۋ ءبىرىنشى مىندەت بولىپ وتىر. ونىڭ ۇستىنە, بىلتىر تالدىقورعان بويىنشا شاعىن جانە ورتا بيزنەستە جۇمىس ىستەيتىندەر سانى مەن بيۋدجەتكە قۇيىلاتىن سالىق ءتۇسىمى ازايعان. ال تالدىقورعان ءوڭىرىن جانە قالانى دامىتۋ جوسپارلارىنا سايكەس 2025 جىلعا دەيىن 14 مىڭ جۇمىس ورنىن قۇراتىن 1,8 ترلن تەڭگەگە 316 ينۆەستيتسيالىق جوبادان تۇراتىن پۋل قۇرىلعان. سونىڭ ىشىندە تالدىقورعان وڭىرىندە 6,6 مىڭ جۇمىس ورنى بولاتىن جالپى سوماسى 1 ترلن تەڭگەلىك 186 جوبانى ىسكە اسىرۋ كوزدەلىپ وتىر. بيىلدىڭ وزىندە قالادا ينۆەستيتسيا سوماسى 7,8 ملرد تەڭگەنى قۇرايتىن, 281 جۇمىس ورنى اشىلاتىن 5 جوبا ىسكە قوسىلادى دەپ بولجانعان. بىراق 200 مىڭعا جۋىق تۇرعىنى بار قالا ءۇشىن بۇل جەتكىلىكسىز ەكەنى انىق.
جەتىسۋ وبلىسى