ۇلتتىق قۇرىلتايدىڭ تۇڭعىش جيىنى ۇلىتاۋدا وتەدى

ەل ومىرىندەگى ماڭىزدى ماسەلەلەردى تالقىلايتىن القالى جيىن العاش رەت ۇيىمداستىرىلعالى وتىر. مەملەكەت باسشىسىنىڭ 16 ناۋرىزداعى حالىققا ارناعان جولداۋىنان كەيىن قۇرىلعان بۇل كونسۋلتاتيۆتىك-كەڭەسشى ورگاننىڭ قۇرامىنا پارلامەنت دەپۋتاتتارى, قازاق­ستان حالقى اسسامبلەياسىنىڭ, ازاماتتىق قوعام مەن ساياسي پارتيالاردىڭ وكىلدەرى, كاسىپ­كەرلەر مەن بىلىكتى ساراپشىلار, سون­داي-اق قوعامدىق كەڭەس مۇشە­لەرى كىرەدى. ۇلتتىق قۇرىلتايدىڭ الدىنا قويعان ەڭ ماڭىزدى مىندەتتەرىنىڭ ءبىرى – قو­عامدىق بىرىگۋدى ودان ءارى دامىتۋ بويىنشا يدەيالار ۇسىنىپ, ناقتى قادامدار جاساۋ.

ەستەرىڭىزدە بولسا, جولداۋدا پرەزي­دەنت ۇلتتىق قۇرىلتاي قۇرۋ تۋرالى باستاما كوتەرىپ, بۇل جونىندە «بابالا­رى­مىز ەل تاعدىرىن ايقىندايتىن تاري­حي شەشىمدەردى بۇكىل حالىق بولىپ اقىل­داسىپ, بىرگە قابىلداعان. ۇلىتاۋدا, وردا­باسى مەن كۇلتوبەدە وتكەن ۇلى باسقو­سۋلار – سونىڭ ايقىن دالەلى. كەلەلى جيىن­دا ايتىلعان كەسىمدى سوزگە التى الاش­تىڭ بالاسى تۇگەل توقتاعان. ءبىز بىرلىك­تىڭ باستاۋى بولعان وسى دالا دەمو­كرا­تيا­سىنىڭ ءداستۇرىن جاڭعىرتۋىمىز كەرەك», دەگەن ەدى.

دەموكراتيالىق جولمەن دامۋدى تاڭداپ, ادىلەتتى, جاڭا قازاقستان قۇرۋعا بەت العان ەلدە ۇلتتىڭ بىرلىگىن ساقتاۋ ما­سەلەسى ەڭ الدىڭعى قاتارعا شىعاتىنى ءسوزسىز. ال بۇل ماقساتتى جۇزەگە اسىرۋدىڭ ناقتى جولدارى مەن مەحانيزمدەرى وسى القالى باسقوسۋدا ايتىلارى حاق.

ۇلتتىق قۇرىلتايدىڭ العاشقى جيىنى ۇلت ۇياسى – ۇلىتاۋدا وتەتىنى جايلى پرە­زيدەنت قاسىم-جومارت توقاەۆ كونستي­تۋ­تسياعا وزگەرىستەر مەن تولىقتىرۋلار ەنگىزۋ جونىندەگى رەفەرەندۋمنان كەيىن قازاقستان حالقىنا ۇندەۋىندە ايتتى. «قاستەرلى تا­ۋەلسىزدىگىمىزدى, ەل بىرلىگىن جانە قوعامدىق كەلىسىمدى نىعايتۋ – ءبىزدىڭ نەگىزگى مىندەتىمىز. بۇل رەفورمالار قۇر اتاق-ابىروي ءۇشىن قولعا الىنعان جوق. مۇنىڭ ءبارىن جاڭا, ادىلەتتى قازاقستان قۇرۋ ءۇشىن جاساپ جاتىرمىز. حالقىمىزدا «كەڭەسىپ پىشكەن تون كەلتە بولمايدى» دەگەن ءسوز بار. بابالارىمىز ماڭىزدى ماسەلەنى القالى جيىندا شەشكەن. مەن وسى ءداستۇردى جاڭعىرتىپ, ۇلتتىق قۇرىلتاي قۇرۋ تۋرالى باستاما كوتەردىم. وعان قوعامنىڭ ءتۇرلى توپ وكىلدەرى, بەدەلدى ءارى بەلسەندى ازاماتتار شاقىرىلادى», دەدى مەملەكەت باسشىسى.

« ۇلىتاۋ – حالقىمىزدىڭ ەل بولىپ قالىپتاسۋىنا, بىرلىك-تىرلىگىنە دىڭگەك بولعان, ءيىسى قازاقتىڭ اينالىپ سوعار ءتۇپ قازىعىنداي قاسيەتتى مەكەن. ۇلىتاۋ قازاق­تىڭ ەرتە كەزدەگى ساياسي ورتالىعى رەتىندە ماڭىزدى بولعاندىعىنا ءبىر دالەل قازاق ۇلىسىنىڭ نەگىزىن قۇرعان باستى-باستى تايپالاردىڭ بارلىعىنىڭ جەرى وسى ۇلىتاۋدان تاراعان». بۇل – ايگىلى اكادەميك الكەي مارعۇلاننىڭ كيەلى مە­كەن تۋرالى جازباسى. قارت تاريح قازاق ەلىنىڭ حالىق بولىپ قالىپتاسۋىنىڭ ءتۇپ-توركىنى وسى ۇلىتاۋدان باستاۋ الاتى­نىنا كۋا. ەندەشە, العاشقى ۇلتتىق قۇرىل­تايدىڭ وسىناۋ قاسيەتتى مەكەننەن باستاۋ العانى دا تاريحي زاڭدىلىق بولار.

ۇلىتاۋدا وتەتىن ۇلتتىق قۇرىلتاي وتىرىسىنا ءتۇرلى توپ وكىلدەرى, بەدەلدى ءارى بەلسەندى ازاماتتار قاتىسادى دەپ جوس­پار­لانىپ وتىر. سونداي-اق مەملەكەت باسشىسى قاسىم-جومارت توقاەۆ ماۋسىمنىڭ 17-ءسى كۇنى رەسەي پرەزيدەنتى ۆلاديمير ءپۋتين­­نىڭ شا­قىرۋىمەن پەتەربور حالىق­ارالىق ەكو­نوميكالىق فورۋمىنىڭ 25-مەرەيتويلىق جيىنىنا قاتىسادى.

مەملەكەت باسشىسى فورۋمنىڭ پلەن­ار­لىق وتىرىسىنا قاتىسىپ, بىرقاتار ەكىجاقتى كەزدەسۋ وتكىزەدى دەپ جوس­پار­لانعان. 15-18 ماۋسىمدا وتكىزىلەدى دەپ بە­كىتىلگەن XXV پەتەربور حالىق­ارالىق ەكونوميكالىق فورۋمىنىڭ ىسكەر­لىك باعدارلاماسى ءداستۇرلى تۇردە جاھان­دىق جانە رەسەيلىك ەكونوميكا ماسەلە­لەرىنە, الەۋمەتتىك ماسەلەلەر مەن تەحنو­لو­گيالاردى دامىتۋعا ارنالادى.

پرەزيدەنتتىڭ ءباسپاسوز قىزمەتى جاريا­لاعان مەملەكەت باسشىسىنىڭ وسى اپتا­داعى جۇمىس كەستەسىنە سايكەس 19 ماۋسىمدا قازاقستان پرەزيدەنتى يران يسلام رەسپۋب­ليكاسىنىڭ پرەزيدەنتى يبراحيم ءراي­سيدىڭ شاقىرۋىمەن يرانعا رەسمي ساپار­مەن بارادى. تەگەراندا جوعارى دەڭ­گەيدە ەكىجاقتى كەزدەسۋلەر وتكىزۋ جانە بىرقاتار ۇكىمەتارالىق قۇجاتقا قول قويۋ جوسپارلانىپ وتىر.