وتكەن اپتادا الماتىدا قاينار ۋنيۆەرسيتەتىنىڭ ۇيىمداستىرۋىمەن قازاقستاننىڭ ەڭبەك سىڭىرگەن قايراتكەرى, زاڭ عىلىمدارىنىڭ دوكتورى, ۇلى وتان سوعىسىنىڭ ارداگەرى زايىرحان اشيتوۆتىڭ 90 جاسقا تولۋىنا ارنالعان «قازاقستان-2050» ستراتەگياسى مىندەتتەرىنەن تۋىندايتىن قۇقىقتىق ءبىلىم بەرۋ سالاسىن دامىتۋدىڭ وزەكتى ماسەلەلەرى» اتتى رەسپۋبليكالىق عىلىمي كونفەرەنتسيا بولىپ ءوتتى.
كونفەرەنتسيا جۇمىسىن كىرىسپە سوزبەن اشقان قاينار ۋنيۆەرسيتەتىنىڭ رەكتورى, پروفەسسور ەرەنعايىپ وماروۆ ستۋدەنت جاستارعا قۇقىقتىق ءبىلىم بەرۋدە, قۇقىقتىق تاربيەنى جەتىلدىرۋدە ەلىمىزدىڭ جوعارى وقۋ ورىندارىنىڭ الدىندا تۇرعان مىندەتتەردى اتاپ ءوتىپ, وسىناۋ كوكەيتەستى ماسەلەلەردى شەشۋدە وتاندىق زاڭگەرلەردىڭ ءرولى ەرەكشە ەكەندىگىنە كەڭىنەن توقتالدى.
– كونفەرەنتسيانىڭ پروفەسسور قايىرحان اشيتوۆتىڭ 90 جىلدىق مەرەيتويىنا ورايلاستىرىلىپ وتكىزىلۋىنىڭ ءوزى دە زاڭگەر عالىمنىڭ تاۋەلسىز قازاقستاننىڭ قۇقىعى بويىنشا جازىلعان 10-نان استام مونوگرافيالىق ەڭبەكتەر مەن وقۋلىقتاردىڭ اۆتورى رەتىندە جاستاردىڭ قۇقىقتىق ساۋاتتىلىعىن ارتتىرۋدا اتقارعان ەڭبەكتەرىنە دەگەن قۇرمەتتىڭ ءبىر كورىنىسى , – دەپ ءسوزىن اياقتادى, شەشەن.
كونفەرەنتسيادا, «قۇقىقتىق ءبىلىم بەرۋ ماسەلەلەرىن شەشۋ جولدارى» اتتى بايانداما جاساعان ۇلتتىق عىلىم اكادەمياسىنىڭ كوررەسپوندەنت-مۇشەسى, پروفەسسور كارىمبەك قۇرماناليەۆ ءاربىر قازاقستان ازاماتى ءوز قۇقىقتارى مەن مىندەتتەرىن جاقسى ءبىلۋ قاجەتتىگىن, ازاماتتىق كودەكسكە جاڭادان ەنگىزىلگەن باپتاردى ەلگە حاباردار ەتۋ قۇقىق سالاسى قىزمەتكەرلەرىنىڭ, اسىرەسە, زاڭگەر عالىمداردىڭ ءبىرىنشى كەزەكتەگى مىندەتى ەكەندىگىن ايتتى.
عىلىمي وتىرىسقا قازاقستان رەسپۋبليكاسى كونستيتۋتسيالىق كەڭەسىنىڭ توراعاسى, زاڭ عىلىمدارىنىڭ دوكتورى, پروفەسسور يگور روگوۆ, اكادەميكتەر سۇلتان سارتاەۆ, مايدان سۇلەيمەنوۆ, ابدىمالىك نىسانباەۆ, ءومىرزاق ايتباەۆ, شورا سارىباەۆ جانە باسقا دا بەلگىلى عالىمدار قاتىسىپ, ستراتەگيادا كورسەتىلگەن ەلىمىزدە قولعا الىنار قۇقىقتىق سالاداعى رەفورمالار جونىندە وي قوزعادى.
قانات ەسكەندىر,
«ەگەمەن قازاقستان».