قازاقستان رەسپۋبليكاسىنىڭ رەسەي فەدەراتسياسىنداعى ساۋدا وكىلى بورامباەۆ نۇرلان ورالبەك ۇلى 52 جاسقا قاراعان شاعىندا ومىردەن وزدى, دەپ حابارلايدى Egemen.kz قازاقستاننىڭ رەسەي فەدەراتسياسىنداعى ساۋدا وكىلدىگىنىڭ حابارلاماسىنا سىلتەمە جاساپ.
نۇرلان ورالبەك ۇلى – اقمولا ءوڭىرىنىڭ تۋماسى. ەڭبەك جولىن قازاقستان رەسپۋبليكاسىنىڭ مەملەكەتتىك قارجىلىق باقىلاۋ ورگاندارىندا باستادى. مينيسترلىكتەر مەن ۆەدومستۆولاردا, كوممەرتسيالىق ۇيىمداردا قىزمەت ەتتى.
2006 جىلدان باستاپ قر پرەزيدەنتىنىڭ ءىس باسقارماسى جۇيەسىندە لاۋازىمدى قىزمەتتەر اتقاردى.
2019 جىلدىڭ شىلدە ايىنان بەرى قازاقستان مەن رەسەي اراسىندا ساۋدا-ەكونوميكالىق ىنتىماقتاستىقتى نىعايتۋعا اتسالىستى. ول باسشىلىق ەتكەن جىلدارى ساۋدا وكىلدىگى قازاقستان مەن رەسەي اراسىندا ايتارلىقتاي وڭ ناتيجەلەرگە قول جەتكىزىلدى.
«قازاقستان رەسپۋبليكاسىنىڭ رەسەي فەدەراتسياسىنداعى ساۋدا وكىلدىگى 9 ماۋسىمدا ۇزاققا سوزىلعان دەرتتەن قر-نىڭ رەسەي فەدەراتسياسىنداعى ساۋدا وكىلى بورامباەۆ نۇرلان ورالبەك ۇلى 52 جاسقا قاراعان شاعىندا دۇنيەدەن وتكەنىن قايعىرا حابارلايدى. نۇرلان ورالبەك ۇلى – تاجىريبەلى مامان, پايىم-پاراساتى بيىك بىلىكتى باسشى. ومىرلىك ۇستانىمى, مىزعىماس مورالدىق-ەتيكالىق قاعيداسى بار تۇلعا. قازاقستان رەسپۋبليكاسىنىڭ رەسەي فەدەراتسياسىنداعى ەلشىلىگى, ەكى ەلدىڭ ساۋدا جانە ينتەگراتسيا مينيسترلىكتەرىندەگى ارىپتەستەرىنىڭ الدىندا بەت-بەدەلى بيىك, ابىرويى اسقاق. ول قاراماعىنداعى قىزمەتكەرلەرگە لايىقتى باسشى بولا بىلگەن, جانى جايساڭ ازامات. مارقۇمنىڭ وتباسىنا, جاقىندارى مەن تۋعان-تۋىستارىنا قايعىرا كوڭىل ايتامىز. الدى پەيىش, ارتى كەنىش بولسىن. ارتىندا قالعان ۇرپاعىنا اماندىق تىلەيمىز», دەپ جازىلعان ۆەدومستۆو حابارلاماسىندا.