اقىلى اۆتوتۇراق: پايدا تابا ما, قالتانى قاعا ما؟

ۇلتاراقتاي جەر – اقىلى

اقىلى كولىك تۇراعى جەلىسى ىسكە قوسىلعالى بۇل جوبانىڭ توڭى­رەگىنەن داۋ-داماي ارىلعان ەمەس. اسىرەسە تەمىر تۇلپار تىزگىن­دەگەن قالالىقتار اقىلى اۆتو­تۇ­راقتاردى «اۋىر» قابىلدادى. بۇرىن كولىگىن كەز كەلگەن كو­شەنىڭ بويىنا قاڭتارا سالۋعا ۇيرەنگەن تۇرعىندار قالالىق اكىمدىككە ارىز-شاعىمىن قارشا بوراتتى. جۇرتشىلىقتىڭ پىكى­رىنە قاراعاندا, قاتتى داۋىل مەن قاقاعان ايازدان قورعالماعان اشىق الاڭقايلاردا قاپتاتىپ, اقىلى اۆتوتۇراق بەلگىلەرىن ورناتۋ – اۋادان اقشا جاساۋدىڭ ءبىر ءتۇرى. ءومىرالى بايتاسوۆ ەسىمدى ەلوردا تۇرعىنى: «قالالىق اكىم­دىكتىڭ تۇسىندىرۋىنشە, مۇن­داي اقىلى تۇراقتار قالا كوشە­لەرىندەگى كەپتەلىستى ازايتىپ, جول قوزعالىسىنداعى جۇكتەمەنى تو­مەندەتەدى ەكەن.

جوبانىڭ ىسكە اسىرىلعانىنا ءبىراز جىل بولدى. بىراق اقىلى تۇراقتاردى ەنگىزگەننەن شەشىلىپ كەتكەن كەپتەلىستى كورمەدىم. اياق استىنان اقىلى بولىپ كەتكەن تۇراقتار تسەلينوگراد كەزىنەن بار. بۇل – جول شەتىنە ارنايى سالىنعان دايىن تۇراقتار. ەگەر تۇراقتاردى بىرەۋ اقشا شىعارىپ, اق تەر, كوك تەر بولىپ سالىپ بەرسە ءبىر ءجون. ال ەلدىڭ باياعىدان پايدالانىپ, كولىگىن قويىپ جۇرگەن تۇراعىنا كولدەنەڭنەن يەلىك ەتۋ, جوق جەردەن اقشا جاساۋ – حا­لىق­تى قاناۋ دەپ بىلەمىن», دەيدى.

ەكى-ءۇش اي بۇرىن ەلوردانىڭ مىڭ­داعان تۇرعىنى اقىلى اۆتو­تۇر­اقتاردى الىپ تاستاۋ تۋرا­لى egov.press رەسۋرسىندا پەتي­تسيا جاريالاعان ەدى. الەۋ­مەت­تىك جەلىلەرگە تاراپ كەتكەن جا­ريا­لانىمعا باس-اياعى 8 مىڭنان استام ادام قول قويعان. «اقىلى اۆتو­تۇراقتار – ءسىز بەن ءبىزدىڭ اقشا­مىز­دان پايدا تابۋدىڭ ءبىر ءتاسىلى. جول قوزعالىسىنداعى جۇكتەمەنى قو­سىمشا پاركينگتەر سالۋ ارقىلى شەشۋگە دە بولار ەدى. حالىق سانى كوبەيگەن سايىن كولىك تە كوبەيەتىنى زاڭدىلىق. تۇراقتاردى جاپپاي اقىلى ەتۋ ماسەلەنى شەش­پەي­دى. كونستيتۋتسياعا سايكەس قا­زاقستاننىڭ ءاربىر ازاماتى ەل اۋ­ماعىندا ەمىن-ەركىن قوزعالۋعا قۇقى بار. ال اقىلى اۆتوتۇراقتار وسى قۇقىمىزدى شەكتەپ وتىر» دەلىنگەن پەتيتسيا ماتىنىندە.

اسىلبەك قوڭىراي اتتى تاعى ءبىر قالا تۇرعىنى ەسىلدىڭ سول جاعالاۋىنان كولىك قوياتىن ورىن تابۋ قيىن ەكەنىن, سوندىقتان جۇمىستان قالماس ءۇشىن «تەمىر تۇلپارىن» اقىلى اۆتوتۇراققا كۇندە قويۋعا ءماجبۇر ەكەنىن جەت­كىزدى. «اقىلى تۇراقتىڭ ءبىر سا­عا­تى – 100 تەڭگە. مەن اپتانىڭ بەس كۇنىندە اۆتوتۇراق ءۇشىن ورتا ەسەپپەن 4-5 مىڭ تەڭگە تولەيمىن. وسىلايشا, ايلىعىمنىڭ 20 مىڭدايى تەك تۇراققا كەتەدى. اقى تولەگەنىمىزگە ساي كولىگىمىز قور­عالسا عوي. مىسالى, دامىعان مەم­لەكەتتەردە اۆتوتۇراقتاردىڭ كوبى ءجىتى كۇزەتىلەدى. دەمەك, زاقىم كەلۋدەن, تونالۋدان امان بولادى. ال بىزدە ونداي تۇسىنىك جوق. اقشاسىن الادى, بىراق كولىگىمىز «كۇل بولماسا, پۇل بولسىن», ەشكىم جاۋاپكەرشىگىنە المايدى», دەيدى قالا تۇرعىنى.

راسىمەن اشىق اسپان استىن­دا­عى اقىلى تۇراقتارعا قويىل­عان كولىكتەردىڭ قاۋىپ­سىز­دى­گىنە اكىم­دىك تە, جوبانىڭ وپەراتورى – «استانا تۇراق كەڭىستىگى» جشس-ءى دە جاۋاپ بەرمەيدى. مۇنى سەرىك­تەس­تىك ديرەكتورى شىڭعىس دوسى­باەۆ­تىڭ ءوزى دە مويىنداپ وتىر.

– ءبىزدىڭ كاسىپورىن كولىكتەردىڭ قاۋىپسىزدىگىنە, بۇتىندىگىنە جاۋاپ بەرمەيدى. ەگەر تۇراققا قويىلعان كولىكتەر ساقتاندىرىلعان بولسا, ونىڭ اقىسى ساعاتىنا 100 تەڭگە ەمەس, ودان دا قىمبات بولار ەدى. ويت­كەنى ول ءۇشىن كولىك تۇراققا قان­داي جاعدايدا قويىلدى, ودان كەيىن قانداي جاي-كۇيدە يەسىنە تاپ­سىرىلدى – بارىنە تالداۋ جاساپ وتىرۋعا تۋرا كەلەدى. اشىق الاڭداعى كولىكتەرگە مۇنداي تەكسەرۋ جۇرگىزۋ مۇمكىن ەمەس. جابىق پاركينگتەردە عانا بۇل – ءوزىن ءوزى اقتايتىن ءىس, – دەيدى ديرەكتور جۋرناليستەرگە بەرگەن سۇحباتىندا.

«جىرى» كوپ جوبا

اقىلى اۆتوتۇراقتار جەلىسىن ەن­گىزۋ جوباسى دا Astana LRT سياق­تى باستالماي جاتىپ باسىنا «بۇلت ۇيىرىلگەن» جوبا بولدى: ءبىر ۇيىمنان ەكىنشى ۇيىمنىڭ قولىنا ءوتتى, بىرەسە ينۆەستوردىڭ يەلىگىنە بەرىلىپ, ەندى بىردە قاي­تا­­دان قالانىڭ كوممۋنالدىق مەن­­شىگىنە قاي­تارىلدى. جوباعا بو­لىنگەن قاراجاتقا بايلانىستى دا داۋ شى­عىپ, وعان جاۋاپتى لاۋا­زىم­دى تۇل­عا­لار كۇدىككە ءىلىندى.

«الماتى تۇراقتارى» سايتىن­دا­عى مالىمەتكە سۇيەنسەك, ەلىمىز­دە­گى العاشقى اقىلى اۆتوتۇراق جە­لىسىن سالۋ ماسەلەسى 1997 جىلى قو­ز­عالىپ, جوبانى الماتىدا قول­­عا الۋ ماسەلەسى كوتەرىلگەن. بىراق 2015 جىلعا دەيىن وعان بو­لىن­گەن قارجى باعىتىنان «اداسىپ», «كولەڭكەگە» كەتكەن. قولعا الىنعان ءۇش جوبانىڭ ۇشەۋى دە ءساتسىز اياقتالعان.

2012 جىلى الماتى قالاسىن 2013-2023 جىلدارعا دامىتۋدىڭ ستراتە­گياسى قابىلدانىپ, بۇل قۇ­جاتتا دا اقىلى تۇراق سالۋ ماسە­لە­سى ءسوز بولدى. كەيىن اۆتو­تۇ­راق­قا تولەنەتىن اقشانى قولما-قول الۋعا موراتوري جاريا­لانادى. 2016 جىلى عانا اۆتومات­تان­دى­رىلعان اقىلى تۇراق جۇيەسى قانات­قاقتى جوبا رەتىندە ىسكە قو­­سىلدى. بۇل جۇيەنىڭ وپەراتورى رەتىندە Alan Parking جشس تا­نىلدى. ولار مەگاپوليستەگى 12 مىڭ اۆتوتۇراقتى قاراۋىنا ال­عان. بىراق بيىل ءساۋىر ايىندا AlanParking جشس باس ديرەكتورى ۋاقىتشا قاماۋعا الىن­عا­نى جو­نىن­دە حابار جەتتى.

نۇر-سۇلتان قالاسىنداعى اقى­لى اۆتو­تۇراقتاردىڭ دا «جى­رى» كوپ. ونىڭ تاريحى 2016 جىل­­­دان باس­تاۋ الادى. 2020 جىلى بۇل جوبا ۇلكەن داۋعا اينالدى. جوباعا تاپسىرىس بەرگەن قالا اكىم­­دىگى قالا تۇرعىندارىنا «نۇر­جول» بۋل­ۆا­رىنان باسقا جەر­­­دەگى پار­كو­مات­تاردىڭ زاڭ­سىز جۇمىس ىستەپ تۇرعانىن, وعان جۇرت­شىلىق اقشا تولەۋگە ءتيىس ەمەس ەكەنىن مالىمدەدى. «پار­كو­مات­تاردى پايدالانۋعا رۇق­­سات الىنباعاندىقتان قالالىق بيۋد­جەتكە قاراجات تۇسپەگەن, ال رۇقسات ەتىلمەگەن پاركوماتتارعا تولەن­گەن اقشا سەرىكتەستىكتىڭ وزىنە اۋدا­رىلعان», دەلىندى ەلوردا اكىم­­دىگىنىڭ رەسمي حابارلاماسىن­دا. قىزا-قىزا كەلە, اكىمدىك وكىل­­­دەرى مەملەكەتتىك كىرىستەر دەپار­تا­­مەن­تىنە «استانا تۇراق كەڭىس­تىگى» جشس-نا قاتىستى قا­زاق­­ستان رەسپۋبليكاسىنىڭ زاڭ­­نا­ماسىنا سايكەس ءتيىستى شارالار قابىلداۋ ماق­ساتىندا حات جول­­داعانىن, ءتىپ­تى كەلىسىمشارت مىندەتتەمەلەرىن ورىن­داماعانى جانە تالاپتاردى ەلە­مەگەنى ءۇشىن جشس ۇستى­نەن سوتقا كەلىسىمشارتتى بۇزۋ جونىن­دە ارىز بەرگەنىن مالىمدەدى. ال مەردىگەر كومپانيا وزدەرىنىڭ رەس­مي سايتىندا اكىمدىكتىڭ شارت­تى بۇزۋ تۋرالى سوتقا ارىز بە­رىل­­گەنى تۋرالى مالىمدەمەسىن جوققا شىعارىپ, 2020 جىلعى 6 قاراشاداعى جاعداي بويىنشا اكىمدىك تاراپىنان ءمجا شارتىن بۇزۋعا قاتىستى رەسمي حابارلامالار بولماعانىن ايتىپ اقتالدى. «ەلوردانى تۇراقتى دامىتۋ جوسپارىنا سايكەس ءبىزدىڭ كومپانيا, نە ورنىمىزدا باسقا كومپانيا بولسا دا اقىلى كولىك تۇراقتارىنىڭ اۋماعى ۇلعاياتىن بولادى. «استانا تۇراق كەڭىستىگى» جشس شارتتا بەكىتىلگەن كەستەگە سايكەس ءمجا جوباسىن جۇزە­گە اسىراتىنىن رەسمي تۇردە مالىم­دەيدى. بارلىق اقشالاي قارا­جات پەن سالىقتار ءمجا شار­تى­نا سايكەس قالا بيۋدجەتىنە تولەن­دى. ءبىزدىڭ كومپانيا جەر ۋچاس­كەلە­رىنىڭ مەنشىك يەسى بولىپ تا­بىل­مايدى, ولار – نۇر-سۇلتان قالاسىنىڭ كوشە-جول جەلىسىنىڭ بولىگى. جوبادا بيۋدجەت قاراجاتى جوق», دەپ جازدى جشس رەسمي رەسۋرسىندا. «استانانىڭ كولىك تۇراعى كەڭىستىگى» جشس ءبارىن دە كە­لىسىمشارت نەگىزىندە ات­قار­عا­نىن, سوندىقتان اقىلى اۆتو­تۇراق­تاردىڭ اقشاسى تۇرعىن­دار­عا قاي­تارىلمايتىنىن دا قوسىمشا حابارلادى.

جاقىندا «قازاقستاندىق مەم­­لە­كەت-جەكەمەنشىك ارىپ­تەس­تىك ور­تا­لىعى» اق ماماندارى دا اقى­لى اۆتوتۇراقتار ماسەلەسىن تاعى كوتەرىپ, مەردىگەر كومپانيا­نى سىنعا الدى. «قازاقستاندىق مەم­لەكەت-جەكەمەنشىك ارىپ­تەس­­تىك ورتا­لى­عى» اق جوبالار­دى زەرتتەۋ جانە باعالاۋ دە­پار­تامەنتىنىڭ ساراپ­شى­سى تالانت مىقتىبەكوۆتىڭ ايتۋىن­شا, 2019 جانە 2021 جىلدار ارالىعىندا اقىلى تۇراق ورىندارى بويىنشا جەكە ارىپتەس سانالاتىن «استانا تۇراق كەڭىستىگى» جشس اتىنا باعالاۋ قورتىندىلارى تۋرالى 3 حابارلاما جىبەرىلگەن. «وكىنىشكە قاراي, بۇل جوبا تۇ­راق ورىندارىنىڭ تاپشىلىعى ماسەلەسىن شەشە المادى. ويتكەنى تۇ­راق كەڭىستىگى قولدانىستاعى ينف­ر­ا­قۇرىلىمدا تۇراق جەلىسىن كە­ڭەيت­پەستەن جابدىقتالعان. اقى­لى تۇراق ورىندارىنىڭ نە­گىز­­­گى بولىگى ازاماتتاردىڭ تۇر­عىن ۇي­لە­رىنىڭ جانىندا, تۇرعىن ۇي­لەر اراسىنداعى اۋماقتا ورنا­لاس­­قان. ال بۇل حالىقتىڭ بالامالى تەگىن تۇراق ورىندارىنا قول­جە­تىم­دىلىگىن ايتارلىقتاي تو­مە­ن­دەتتى. جالپى العاندا, جوبانى ىسكە اسىرۋ پروتسەسىندە جىبە­رىل­­گەن قاتە شەشىمدەر جوبانىڭ الدى­نا قويىلعان مىندەتتەر مەن ماق­سات­تار­عا قول جەتكىزۋگە مۇم­كىن­دىك بەر­مەدى», دەدى ساراپشى رەس­مي مالىم­دە­مەسىندە.

بۇل سىنعا دا جوبا وپەراتورى كەلىسپەيتىنىن جەتكىزدى.

«قازاقستاندىق مەملەكەت-جە­كە­مەنشىك ارىپتەستىك ورتا­لى­عى» اق بىزگە قالاي سىن ايتا الادى؟ جوبا تۋرالى كۇماندى اق­پارات تاراتىپ وتىرعان مجƏ ورتا­لى­عى­نىڭ ءوزى – وسى اقىلى تۇراقتار جوباسىنىڭ نەگىزگى əزىرلەۋشىسى. بىزگە باعىت-باعدار بەرىپ, ءجون كورسەتكەن دە وسى ورتالىقتىڭ ساراپ­شىلارى. ولار بىزگە اقىلى تۇراق­تار قۇرۋ شارتى جوباسىنىڭ تۇجىرىمداماسىن əزىرلەۋگە كو­مەك­تەسىپ, ارنايى وقىتىپ, ۇسى­نىمدار بەردى. تۇجىرىمداما نە­گىزىندە مجƏ شارتى جاسالدى. ەندى قالاي جوبانى ءتيىمسىز دەپ وتىر؟», دەيدى جشس ديرەكتورى شىڭعىس دوسىباەۆ YouTube كانا­لىن­داعى سۇحباتىندا.

ونىڭ ايتۋىنشا, تۇراقتاردىڭ ناقتى قايدا ورنالاسۋ كەرەكتىگىن جەرگىلىكتى اكىمدىك شەشەدى. مەر­دىگەر كومپانيا ءوز بىلگەنىمەن قا­لا­­عان جەرىنە اقىلى اۆتوتۇراق بەل­گىسىن ورناتا المايدى.

«ال تۇرعىن ءۇي اۋلالارىنداعى, الەۋ­مەتتىك نىساندار تۇسىنداعى اقى­لى تۇراقتار ماسەلەسىنە كەل­سەك, بۇگىندە تۇرعىن ءۇي ما­ڭىن­­داعى اۋماقتاردا اقىلى تۇراق­تار جوق. تۇراقتار كوشە-جول جە­لىسىنىڭ شەكاراسىندا ورنا­لاس­­قان. جوبا, ەڭ الدىمەن قالا تۇر­عىن­دارىنىڭ مۇددەسىن ەسكەرۋ ءۇشىن قولعا الىنعان. سوندىقتان ونى ءبىز ءتيىمسىز جوبا دەپ ايتپاس ەدىك. اقىلى تۇراقتار جوباسى əلەۋمەتتىك ماڭىزى بار مəلە­لە­لەر­دى جəنە تۇراق ورىن­دا­رىنىڭ تاپشىلىعى مəسەلەسىن شەشۋگە كو­مەكتەسەدى. ءبىر عانا مىسال, بۇ­رىن جوبانى ەنگىزگەنگە دەيىن «نۇرجول» بۋلۆارىندا تۇرۋ ۋا­قىت­ى ورتاشا ەسەپپەن 4 ساعاتتى الاتىن ەدى. ال قازىر بۇل مەرزىم ورتا ەسەپپەن 40 مينۋتقا دەيىن قىس­قارىپ, تۇراق ورىندارىنىڭ اي­نالىمى 6 ەسەگە ءوستى. مۇنىڭ ءوزى – جاقسى كورسەتكىش», دەيدى ديرەكتور.

ول سونداي-اق اقىلى تۇراقتار جو­باسى جەرگىلىكتى بيۋدجەت تۇسىم­دە­رىنە اجەپتاۋىر پايدا اكەلىپ وتىرعانىن, ءتورت جىلدا اقىلى تۇراقتاردان 100 ملن تەڭگە تۇسسە, ايىپپۇلدىڭ ەسەبىنەن مەملەكەت قورجىنىنا 1 ملرد تەڭگەدەن استام قارجى تۇسكەنىن ايتتى.

اقى تولەمەسەڭىز, ايىپپۇل ارقالايسىز

بۇگىندە ەلوردادا اقىلى اۆتو­تۇ­راقتار كوك ءتۇستى جولاقپەن بەل­گى­لەنە باستادى. قاناتقاقتى جوبا رە­تىندە العاش رەت ەنگىزىلىپ وتىر­عان بۇل سىزىق الدىمەن «نۇر­جول» بۋلۆارىندا ىسكە قو­سىل­دى. «جاڭا جولاق ءتۇسى جۇر­گىزۋ­شى­­لەرگە ىڭ­عاي­لى بولۋ ءۇشىن­ قا­­راس­­­تىرىلعان. ­كوك جو­لاق ­جۇر­­­­­­­­گىزۋشىلەرگە اقىلى تۇراق كە­­­­ڭى­س­­­­تى­گىنىڭ شەكارالارىن­ جاق­سى­­راق جانە جىلدام انىق­تاۋ­عا كومەك­تەسە­دى. اشىق كوك سىزىق­تار اقىلى اي­­ماقتى ءبولىپ, جۇر­گى­زۋ­شى­لەردىڭ نازا­رىن اۋدارۋى كەرەك. ەگەر بۇل جا­ڭالىقتى قالا بيلىگى ماقۇلداسا, بولاشاقتا ەل­ور­دانىڭ بارلىق اقىلى تۇراق ايماعى كوك جولاقپەن بولىنەتىن بولادى», دەپ حابارلادى «استانا تۇ­راق كەڭىس­تى­گى» جشس ماماندارى رەسمي سايتىندا.

مەردىگەر كاسىپورىننىڭ ما­لىم­دەمەسىنە سۇيەنسەك, اقىلى تۇ­راق­تار نۇر-سۇلتان قالاسى اكىم­دىگى بەكىتكەن ەرەجەگە سايكەس تەك الدىن الا تولەم جاساۋ نەگى­زىن­دە جۇمىس ىستەيدى. اۆتو­تۇ­راقتىڭ اقىسى اۆتو­كولىكتى تۇراق­قا قوي­عا­ن­نان كەيىن 30 مينۋت ىشىن­دە تولەنۋگە ءتيىس. ال اقى تولەن­گەن ۋاقىت اياقتالعاننان كەيىن كو­لىك يەسى 10 مينۋتتان كەشىك­پەي, تۇ­راقتان شىعىپ كەتۋى كەرەك. ايتپەسە ايىپپۇل سالىنۋى مۇم­كىن.

جالپى, تۇراقتى پايدالانۋ كە­­زىندە مىناداي جاعدايلاردا ايىپ­پۇل سالىنادى: تۇراق اقىسىن تولەمەگەنىڭىز ءۇشىن, اقىسى تولىق ەمەس تولەنگەن جاعدايدا, تولەماقى اۆتوكولىكتى تۇراققا قويعاننان كە­يىن 30 مينۋتتان كەيىن جاسالسا, اقىلى اۆتوتۇراقتار اۋماعىندا كولىك قۇرالدارىن توقتاتۋ نەمەسە قويۋ ەرەجەلەرى بۇزىلعان جاع­دايدا, اقىلى اۆتوتۇراقتار اۋماعىندا جول بەلگىلەرىمەن بەلگىلەنگەن تالاپتار ساقتالماسا.

كولىكتى توقتاتۋ نەمەسە قويۋ ەرەجەسىن بۇزعانى ءۇشىن ايىپپۇل 3 ايلىق ەسەپتىك كورسەتكىش مول­ش­ە­رىن قۇرايدى. قۇقىق بۇزۋ فاكتىلەرى نۇر-سۇلتان قالاسىنىڭ اكىمشىلىك پوليتسيا بولىمىنە جىبەرىلەدى. ايىپپۇلدى تولەۋ تۋرالى جازبا اۆتوماتتى تۇردە ما­لىمەتتەر بازاسىنا كەلىپ تىركە­لە­تىندىكتەن ازاماتتارعا ىشكى ىستەر ورگاندارىنا تۇبىرتەك ۇسىنۋدىڭ قاجەتى جوق.

زاڭ بويىنشا ايىپپۇل بۇي­رىق شىققان كۇننەن باستاپ 30 كۇن­نەن كەشىكتىرىلمەي تولەن­ۋى ءتيىس. ايىپپۇل ۋاقىتىندا تولەن­بەگەن جاعدايدا, قازاقستان رەس­پۋب­ليكاسىنىڭ قولدانىستاعى اكىم­شىلىك زاڭناماسىنىڭ نورمالارىنا سايكەس ماجبۇرلەۋ شارالارى قولدانىلادى. ال ەگەر ايىپپۇلمەن كەلىسپەي جاتساڭىز, نۇر-سۇلتان قالاسى اكىمشىلىك پوليتسيا بولىمىنە شاعىمدانۋىڭىزعا بولادى. مەكەنجايى: 20-40 كوشە, 4 ءۇي. تەلەفون: 8 (7172) 67 75 75.

ايتپاقشى, اقىلى اتوتۇراق­تار­دى تەگىن پايدالانا الاتىن ازاماتتاردىڭ توبى دا بار. ولار: ۇلى وتان سوعىسىنىڭ اردا­گەر­لە­رى, اسكەر قۇرامىنا كىرەتىن اسكەري بولىمدەردە, شتابتار مەن مەكە­مەلەردە قىزمەت ەتكەن اس­كەري قىز­مەت­شىلەر, جاۋىنگەرلىك ارە­كەت­تەر ار­داگەرلەرى, بالا كەزى­نەن مۇگە­دەك­تەر, I جانە II توپ­تاعى مۇگە­دەكتەر, سونداي-اق مۇ­گەدەك با­لا­­نىڭ زاڭدى وكىل­دە­رىنە (سوت شە­شىمى بويىنشا قام­قور­شىلارعا) تىركەلگەن كولىك قۇ­رال­دارى, «التىن قىران» جانە «حا­لىق قاھارمانى» وردەن­دە­­رىمەن ماراپاتتالعان تۇل­عا­لار, «التىن القا» جانە «كۇ­مىس القا» القالارىمەن مارا­پات­تالعان كوپبالالى انالار, سەمەي پوليگونىنداعى يادرولىق سىناق­تاردىڭ سالدارىنان راديا­تسيا­لىق اسەرگە ۇشىراعان ادامدار, اۋعان­ستاننىڭ ارداگەرلەرى جانە جەر­گى­لىك­تى جاۋىنگەرلىك ارە­كەت­تەرىنىڭ ينتەرناتسيونالدىق جاۋىن­گەرلەرى.

ءبىر ەسكەرەرلىك جايت, كولىك جە­ڭىلدىك الۋشىنىڭ اتىنا راسىم­دەل­گەن بولۋى قاجەت. ولاردىڭ اتى­نان بەرىلگەن ءۇشىنشى تۇلعانىڭ وتىنىمدەرى قابىلدانبايدى. ءوتى­نىش بەرۋ ءۇشىن astanapark.kz ساي­تىندا تىركەلىپ, ودان كەيىن سايتتىڭ «جەڭىلدىكتەر» بولىمىنە ءوتۋ كەرەك. جەڭىلدىكتى راسىمدەۋ ءۇشىن تەك ءتورت قۇجات قاجەت: ءوتى­نىش, جەكە كۋا­لىك, تەح­نيكالىق تول­قۇجات جانە جە­ڭىل­دىك قۇقىن راس­تايتىن قۇجات.

«استانا تۇراق كەڭىستىگى» جشس پاي­دالانۋشىلاردى قول­داۋ ءبو­لى­مىنىڭ باسشىسى لاۋرا سابيت­قى­زى­نىڭ ايتۋىنشا, ءوتىنىش­تى ۇيدەن شىقپاي-اق بەرۋگە بولادى. ول ءۇشىن جوبا وپەراتورىنىڭ سايتىندا ورنالاسقان ارنايى فورمانى تولتىرىپ, جىبەرۋ كەرەك.

ءوتىنىش 10 كۇننىڭ ىشىندە قارا­لادى, سودان كەيىن ءوتىنىش بەرۋ­شى­گە راستاۋ نەمەسە دالەلدى باس تار­تۋ تۋرالى ەلەكتروندى حات جى­بە­­رىلەدى.

اقىلى اۆتوتۇراققا ىرگەلەس ورنا­لاسقان ۇيلەردىڭ تۇرعىندارى ءۇشىن ماڭايداعى اقىلى تۇراق­تار­دى پايدالانۋعا بولاتىن جە­ڭىلدىك شارتتارى بار. ول ءۇشىن كا­سىپ­ورىنمەن رەزيدەنتتىك كەلىسىم جاسالۋى كەرەك. وعان قاجەتتى قۇ­جاتت­ار ءتىزىمى مەن تىركەۋ بويىن­شا نۇسقاۋلىق astanapark.kz ساي­تىنىڭ «تۇرعىندار» بولىمىندە ورنا­لاس­قا­نىن ەسكەرتە كەتەيىك.

جەڭىلدىك ساناتىنا جاتپايتىن ازاماتتار ءۇشىن تۇراق كۇن سايىن ساعات 20:00-گە دەيىن اقىلى. جۇ­مىس كۇندەرى ونىڭ قۇنى ساعاتىنا – 100 تەڭگە. ال دەمالىس جانە مەرەكە كۇندەرى تۇراقتى پايدالانۋ تەگىن.