بۇل تۋرالى قر پرەزيدەنتى جانىنداعى شەتەلدىك ينۆەستورلار كەڭەسىنىڭ 34-جالپى وتىرىسىندا مەملەكەت باسشىسى قاسىم-جومارت توقاەۆ ايتتى, دەپ حابارلايدى Egemen.kz.
«بۇگىنگى كەڭەس وتىرىسى جاھاندىق لوگيستيكالىق تىزبەكتەردىڭ ءۇزىلۋى, ساۋدا سوعىستارى, تەڭدەسسىز ينفلياتسيالىق قىسىم سىندى بارىنشا كۇردەلى احۋال اياسىندا ءوتىپ جاتىر. مۇنىڭ بارلىعى - بۇگىنگى كۇننىڭ وبەكتيۆتى شىندىعى. مۇنداي احۋالدا مەملەكەتكە دە, بيزنەسكە دە ويىننىڭ جاڭا ەرەجەلەرىنە جەدەل بەيىمدەلۋ تالاپ ەتىلەدى. تەك سولاي عانا باسەكەگە قابىلەتتىلىكتى ساقتاپ قالا الامىز. قازاقستان ءوز دامۋىنىڭ جاڭا كەزەڭىنە ءوتتى. ەلدە مەن ۇسىنعان دەموكراتيالىق رەفورمالاردىڭ اۋقىمدى باعدارلاماسى رەت-رەتىمەن جۇزەگە اسىرىلۋدا. 5 ماۋسىمدا جالپىۇلتتىق رەفەرەندۋم ءوتىپ, وندا ازاماتتار كونستيتۋتسياعا وزگەرتۋلەر مەن تولىقتىرۋلار جوباسىن قولدادى», دەدى قازاقستان پرەزيدەنتى.
مەملەكەت باسشىسى داۋىس بەرۋ ناتيجەسىندە اتا زاڭنىڭ ۇشتەن بىرىنە تۇزەتۋلەر ەنگىزىلگەنىن اتاپ ءوتتى. ولاردىڭ قاتارىندا پرەزيدەنت وكىلەتتىگىن قايتا قاراۋ, ساياسي پارتيالاردىڭ دامۋى ءۇشىن مۇمكىندىكتەردى كەڭەيتۋ, سايلاۋ پروتسەسىن جەتىلدىرۋ, ازاماتتاردىڭ قۇقىقتارى مەن بوستاندىقتارىن قورعاۋ جۇيەسىن نىعايتۋ بار.
«بۇعان قوسا, ءبىز جۇزەگە اسىرىلىپ جاتقان ساياسي رەفورمالار كەشەندى ەكونوميكالىق تۇرلەنۋمەن قاتار ءجۇرۋى ءتيىس دەگەن سەنىمدەمىز. ءدال وسىنداي ءادىس بىزگە ورتاشا كىرىس قاقپانىنان سىتىلىپ شىعۋعا جانە كەلەسى دامۋ دەڭگەيىنە كوشۋگە مۇمكىندىك بەرەدى», دەدى قاسىم-جومارت توقاەۆ.