الماتى. 22 ءساۋىر. كەشە الماتىداعى 28 پانفيلوۆشىلار اتىنداعى ساياباقتا ۇلى وتان جانە اۋعان سوعىستارىنىڭ ارداگەرلەرى جينالىپ, «اڭىز ادام» جۋرنالىنىڭ ساۋىردەگى ءنومىرىن ورتەدى. جۋرنالدىڭ بۇل سانى ادولف گيتلەردىڭ بەينەسىن سومداعان ەكەن. بۇل تۋرالى «ەكسپرەسس ك» حابارلادى.
«اڭىز ادامعا» نارازىلىق بىلدىرگەندىڭ ءبىرى – اۋعانستان سوعىسى ارداگەرلەرى قوعامدىق بىرلەستىگىنىڭ توراعاسى مۇرات ابدىشۇكىروۆ جينالعاندار الدىندا: «جۋرنالدا جاريالانعان ماقالا اۆتورى فاشيستىك گەرمانيانىڭ ميلليونداردىڭ ءومىرىن قيعان, جازىقسىز جانداردى لاگەرلەردە ازاپتاپ ولتىرگەن قانقۇيلى ارەكەتتەرىن اقتاعىسى كەلگەن. بۇل - ەكىنشى دۇنيەجۇزىلىك سوعىستا قازا بولعان كەڭەستىك جاۋىنگەرلەردى, سولاردىڭ ىشىندەگى قازاقستاندىق بوزداقتاردى قورلاۋ. مۇنداي بۇرا تارتقان ماتەريالدىڭ جەڭىس كۇنى قارساڭىندا جاريالانۋى -ارداگەرلەرىمىزدى سىيلاماۋدىڭ بەلگىسى. ەگەر گيتلەردى جاقتاپ جازعان اۆتور جازالانباسا, وندا قارتتارىمىز قاتتى وكپەلەيدى», – دەدى.
ال گەنەرال پانفيلوۆتىڭ نەمەرەسى ايگۇل بايقاداموۆا: «جۋرنالدىڭ رەداكتورى جارىلقاپ قالىبايدى زاڭدىق تۇرعىدا جاۋاپقا تارقان ءجون. ءبىز گيتلەردىڭ قىلمىسىن اقتاعىسى كەلگەن ماقالالاردىڭ باسىلعانىنا قاتتى ىزامىز كەلدى. «اڭىز ادامدى» جابۋ كەرەك», – دەپ ءوز رەنىشىن ءبىلدىردى.
جولدىباي بازار.
دەرەككوز: «ەكسپرەسس ك».
فوتو: express-k.kz.