مۇنايلى ءوڭىردىڭ شارۋالارىن شالعىن كوبەلەگىنىڭ شىرعالاڭى الاڭداتىپ وتىر. وبلىس اكىمىنىڭ ورىنباسارى قايرات نۇرلىباەۆتىڭ ايتۋىنشا, يندەر, ماحامبەت اۋداندارى مەن اتىراۋ قالاسىنىڭ ماڭىنداعى ەگىن القاپتارىن, جايىلىمداردى شالعىن كوبەلەگى قاپتاپ, زيانىن تيگىزىپ جاتىر.
– ەگىن القاپتارىن قۇرت, كوبەلەكتەردىڭ قاپتاۋى 30 جىلدان كەيىن قايتالانىپ وتىر. قازىر باتىس قازاقستان وبلىسىنان ۋلاۋ جۇمىستارىن جۇرگىزەتىن ارنايى مەكەمە مەن ماماندار شاقىرىلدى. ەگىن القاپتارىن ۋلاۋ جۇمىسى باستالدى. قۇرت, كوبەلەكتەردىڭ قانشا گەكتار اۋماققا جايىلعانى بەلگىسىز. بۇل انىقتالىپ جاتىر. ءبىزدىڭ باستى ماقساتىمىز – زيانكەستەن ەگىنشىلەردىڭ ەگىن القابىن, ودان كەيىن جايىلىمدىق جەردى قورعاۋ. جالپى قۇرت, كوبەلەكتەر 2020 جىلعا دەيىن وڭدەلەتىن زيانكەس جاندىكتەردىڭ تىزبەسىندە بولعان ەدى. سول جىلى ونى تىزبەدەن الىپ تاستادى. بيىل زيانكەستەر تىزبەسىنە قايتا قوسۋ ماسەلەسى قاراستىرىلىپ وتىر. ەگەر وڭدەلەتىن زيانكەستەر تىزبەسىنە ەنگىزىلەتىن بولسا, جەرگىلىكتى بيۋدجەتتەن قارجى ءبولۋ ماسەلەسى قاراستىرىلادى, – دەيدى قايرات نۇرلىباەۆ.
ونىڭ مالىمەتىنە سۇيەنسەك, وڭىردە ەگىن ەگۋمەن اينالىساتىن 300-دەن استام شارۋاشىلىق بار. قازىر ونىڭ 100-گە جۋىعى شالعىن كوبەلەگىنەن زارداپ شەككەن.
– اۋدانداردا قالىپتاسقان جاعدايعا بايلانىستى زيانكەستەردىڭ زاردابىن جەدەل جويۋ جۇمىسى قولعا الىندى. ورال قالاسىنان كەلگەن ۋلاۋ ءدارى-دارمەگىن شاشۋمەن اينالىساتىن 2 كولىك كۇنىنە شامامەن 1000 گەكتاردان استام اۋماقتى قامتيدى. اتالعان جۇمىسقا جەرگىلىكتى بيۋدجەتتەن شامامەن 8-10 ملن تەڭگە كولەمىندە قارجى ءبولۋ قاراستىرىلىپ وتىر. ەگەر ۋلايتىن اۋماقتىڭ كولەمى ارتسا, قوسىمشا قارجى ءبولۋ ماسەلەسى پىسىقتالادى, – دەيدى وبلىس اكىمىنىڭ ورىنباسارى.
وسىعان ۇقساس جايت مامىر ايىندا قىزىلقوعا اۋدانىندا تىركەلگەن ەدى. مۇندا جۋسان قۇرتىنان 800 گەكتار جايىلىم زاقىمداندى. اگروونەركاسىپ كەشەنىندەگى مەملەكەتتىك ينسپەكتسيا كوميتەتى اتىراۋ وبلىستىق اۋماقتىق ينسپەكتسياسىنىڭ ءبولىم باسشىسى ءابيلا قازيەۆانىڭ ايتۋىنشا, بۇل اۋداندا ءار جىلدارى مۇنداي زيانكەس كەزدەسىپ ءجۇر.
– الايدا جايىلىمعا زيانكەستەردىڭ زيانى تيمەگەن ەدى. ال بيىل 800 گەكتار جايىلىمدا جۋسان جەمىرىنىڭ دەرناسىلى ءارتۇرلى جاس ساتىسىندا ەكەنى انىقتالدى. ماسەلەن, ساعىز اۋىلدىق وكرۋگىندەگى «انەت», «الىپ انا» شارۋا قوجالىقتارىنىڭ ارقايسىسىنا تيەسىلى – 200, «توششي» شارۋا قوجالىعىنىڭ – 100, مۇقىر اۋىلدىق وكرۋگىندە تىركەلگەن «قىزىل بۇلاق» شارۋا قوجالىعىنىڭ 100 گەكتار جايىلىمى جۋسان جەمىرىنەن زاقىمدانعانى انىقتالىپ وتىر. سونداي-اق «ساعىز – ميالى» باعىتىنداعى جولدىڭ بويىندا ورنالاسقان سارقۋجاق ۋچاسكەسىندە دە 100 گەكتار جايىلىمدىق القاپقا زيان كەلدى, – دەيدى ءابيلا قازيەۆا.
ونىڭ ايتۋىنا قاراعاندا, شارۋا قوجالىقتارى مۇنداي زيانكەستەرگە قارسى كۇرەس ءىس-شاراسىن ءوز قاراجاتى ەسەبىنەن جۇرگىزۋى كەرەك.
اتىراۋ وبلىسى