اۋەلگى باسىمدىق بالالارعا بەرىلەدى

ايتا كەتۋ قاجەت, ەلىمىزدە 18 جاسقا دەيىنگى بالالار مەملەكەت ەسەبىنەن مىندەتتى الەۋمەتتىك مەديتسينالىق ساقتاندىرۋ جۇيە­سىندە جەڭىلدىككە يە ساناتتىڭ ءبىرى رەتىندە ساقتاندىرىلادى. ولار ءمامس ەسەبىنەن جوسپار­لى جانە شۇعىل تۇردەگى ستوماتولوگيالىق كومەك الۋعا قۇقىلى. الەۋمەتتىك مەديتسينالىق ساقتاندىرۋ قورى بيىلعى 1-توقساننىڭ قورى­تىن­دىسىنا سايكەس بالالارعا 2,77 ملن-نان استام ستوماتولوگيالىق قىزمەت كورسەتتى.

جالپى, ەلىمىزدە بالالاردىڭ مۇددەسىن قورعاۋ جانە قۇقىقتارىن قامتاماسىز ەتۋ – مەملەكەتتىك ساياساتتىڭ باسىم مىندەتتەرىنىڭ ءبىرى سانالادى. سونىڭ جارقىن دالەلى رەتىندە 2022 جىلدى مەم­لەكەت باسشىسى قاسىم-جومارت توقاەۆ بالالار جىلى دەپ جاريالادى. وسىعان بايلانىستى, ەلىمىزدە ءارتۇرلى جارقىن جوبالار مەن ىلكىمدى ءىس-شارالار جۇزەگە اسىرىلىپ جاتىر. ماسەلەن, قازاقستاندا 16 مامىر مەن 16 ماۋسىم ارالىعىندا «بالالارعا كۇلكى سىيلا!» رەسپۋبليكالىق اكتسياسى وتۋدە. وسى اكتسيانىڭ اياسىندا الەۋمەتتىك مەديتسينالىق ساقتاندىرۋ قورىنىڭ فيليال­دارى دەنساۋلىق ساقتاۋ باسقار­مالارىمەن, مەديتسينالىق ۇيىم­دارمەن جانە باسقا دا مۇددەلى قۇرىلىمدارمەن بىرلەسىپ با­لالارعا پروفيلاكتيكالىق ستو­ما­تولوگيالىق تەكسەرۋلەر جۇر­­گىزەدى. بۇل رەتتە ين­تەر­نات­تاردىڭ, بالالار ۇيلەرىنىڭ, مەديتسينالىق-الەۋمەتتىك مەكە­مە­لەر­دىڭ 18 جاسقا تولماعان تاربيەلەنۋشىلەرىنە, از قامتىلعان وتباسىلاردىڭ بالالارىنا ءجىتى كوڭىل بولىنەدى.

– بۇگىندە بالالار اراسىندا ءتىستىڭ جەتىلۋىنە قاتىستى اقاۋلار ءجيى كەزدەسەدى. اسىرەسە, پۋلپيت ءجيى ۇشىراسادى. تىستەرى كەش شىعىپ, قيسىق وسەدى. مۇنىڭ بارىنە اتا-انانىڭ بالاعا تاماقتىڭ قاتتى تۇرلەرىن بەرمەۋى سەبەپ بولىپ وتىر. بالا الما, ءسابىز, پەچەنە, قۇرت, ەت سياقتى قاتتى تاعامداردى قانشالىقتى كوپ جەيتىن بولسا, ءتىس تە سوعۇرلىم جاقسى جەتىلەدى. اتا-انالار كوبىنەسە بالالارعا جۇمساق تاماق بەرەدى. بالالار پيۋرە, يوگۋرت سەكىلدى تاعامداردى شايناماي جۇتادى. بۇل ءتىس-جاق جۇيەسىنىڭ دامۋىنا زيانىن تيگىزەدى. سونىمەن قاتار بالالار فاست-فۋد, تەز دايىندالاتىن تاعام, گازدالعان ءتاتتى سۋسىنداردى جاقسى كورەدى. بۇل تاعام تۇرلەرى ءتىستىڭ ەرتە بۇزىلۋىنا اكەلىپ سو­عادى. سوندىقتان ادامنىڭ ساۋ تىستەرى ۇزاق ساقتالۋى ءۇشىن بالا كەزدەن دۇرىس ستوماتولوگيالىق كۇتىمدى ساقتاۋ كەرەك, – دەدى «با­لالارعا كۇلكى سىيلا!» اكتسياسىنا قاتىسۋشى, استانالىق ەr-Stom ستوماتولوگيالىق كلينيكاسىنىڭ ستوماتولوگ دارىگەرى اينۇر نۇر­عاليەۆا.

الەۋمەتتىك مەديتسينالىق ساقتاندىرۋ قورى 18 جاسقا تول­ماعان بالالار جەڭىلدىك ساناتىنا كىرەتىنىن جانە ولار ءۇشىن ءمامس جارنالارىن مەملەكەت تولەيتىنىن ەسكە سالادى. ءمامس جۇيەسىندە بالالار شۇعىل جانە جوسپارلى ستوماتولوگيالىق كومەكپەن قامتىلادى. ماسەلەن, بيىلعى 1-توقساندا بالالارعا باس-اياعى 8 ملرد تەڭگەگە ستوماتولوگيالىق قىزمەت كورسەتىلدى. 

ستوماتولوگيالىق كومەك پا­تسيەنت­تىڭ مەديتسينالىق ۇيىمدى ەركىن تاڭداۋى نەگىزىندە ىسكە اسادى. ياعني ۋچاسكەلىك دارىگەردىڭ جولداماسى تالاپ ەتىلمەيدى. قىز­مەتتەردى الۋ ءۇشىن قورمەن كەلى­سىمشارتى بار جەكە ستوماتولوگيانى تاڭداۋعا نەمەسە ءوز ەمحاناڭىزدىڭ ستوماتولوگيالىق كابينەتىنە جۇگىنۋگە بولادى. ەلىمىزدە ءمامس اياسىندا 600-دەن استام مەديتسينالىق ۇيىم ستوماتولوگيالىق قىزمەت كور­سەتەدى. ال ءمامس بويىنشا ستو­ماتولوگيالىق كومەكتى كىم الا الادى؟ ونى دا ايتايىق. بۇگىندە جوس­پارلى ستوماتولوگيالىق كومەك ءمامس پاكەتىمەن بالالار, جۇكتى ايەلدەر ءۇشىن قاراستىرىلىپ وتىر.

شۇعىل ستوماتولوگيالىق كو­مەك الا الاتىن ازاماتتار قاتا­رىندا 18 جاسقا تولماعان بالالار, جۇكتى ايەلدەر, ۇوس قاتىسۋشىلار جانە ولارعا تەڭەستىرىلگەن تۇل­عالار, I, II, III توپتاعى مۇگەدەكتەر, «التىن القا» جانە «كۇمىس القا» يەسى سانالاتىن كوپبالالى انالار, اتاۋلى الەۋمەتتىك كومەك الۋشىلار, جاسى بويىنشا زەينەتكەرلەر بار. سونىمەن قاتار شۇعىل ستوماتولوگيالىق كومەكتى جۇقپالى جانە الەۋمەتتىك ماڭىزى بار, اينالاسىنداعىلارعا قاۋىپ توندىرەتىن اۋرۋلارمەن اۋىراتىن ناۋقاستار, ەرەكشە قاجەتتىلىكتەرى بار بالاعا نەمەسە بالا كەزىنەن

I توپتاعى مۇگەدەككە كۇتىم جاساي­تىن (جۇمىس ىستەمەيتىن) قازاق­ستاندىقتار الا الادى.

ال ءمامس-تە  پاتسيەنتتەردىڭ وسى ساناتتارى ءۇشىن انەستەزيا, جاق نەمەسە ءتىس رەنتگەنوگرافياسى, ءتىس جۇلۋ, پلومبانى دايىنداۋ جانە سالۋ, پەريوستوتوميا, پۋلپيت, پەريودونتيت, ءستوماتيتتىڭ جەدەل تۇرلەرىن, الۆەوليتتى ەمدەۋ, ابستسەسستى اشۋ قىزمەتتەرى تەگىن كور­سەتىلەدى.