قر ءبىلىم جانە عىلىم ءمينيسترى اسحات ايماعامبەتوۆ مۇعالىمدەرگە ساعات سانى بويىنشا اقى تولەۋ جۇيەسىنەن كەتۋ ماسەلەسىنە قاتىستى پىكىر ءبىلدىردى, دەپ حابارلايدى Egemen.kz.
«دۇنيە جۇزىندەگى بۇكىل ءبىلىم بەرۋ جۇيەلەرىن قاراساڭىزدار, ساعاتقا باعىتتاپ ەمەس, وكلاد جۇيەسى بويىنشا جۇمىس تىستەيدى. ساعات سانى بويىنشا جۇمىس ىستەيتىن بىرنەشە مەملەكەت قانا قالدى. سوندىقتان بۇل – دۇنيەجۇزىلىك تاجىريبە. بىراق قازاقستاندا وسى ءسىز ايتقان جۇيەگە قاتىستى ناقتى شەشىم قابىلدانعان جوق. كوشىپ جاتىرمىز دەپ ءبىز ءالى ايتا المايمىز. جالپى, بۇل ماسەلە قازىر زەرتتەلىپ, زەردەلەنىپ جاتىر. سوندىقتان شەشىم تەك قانا وسى زەرتتەۋلەردىڭ نەگىزىندە قابىلدانادى», دەدى مينيستر ۇكىمەت وتىرىسىنان كەيىن باق وكىلدەرىنە.
ۆەدومستۆو باسشىسى بۇل ماسەلەنىڭ تالايدان بەرى كوتەرىلىپ كەلە جاتقانىن ەسكە سالدى.
«جاسىرۋعا بولمايدى, بىرنەشە جىلدان بەرى ءتۇرلى ساراپشىلار, ءارتۇرلى حالىقارالىق جانە ءوزىمىزدىڭ عالىمدار ۇسىنىس ايتىپ جاتىر. دەگەنمەن, بۇل ماسەلەنى تالقىلاۋ كەرەك. ويتكەنى ءبىلىم جۇيەسىندە تەز, ويلانباي شەشىم قابىلداۋعا بولمايدى. تالقىلانىپ, ءتيىستى شەشىم شىققاندا قوسىمشا حابارلايمىز», دەدى مينيستر.