رەسپۋبليكالىق رەفەرەندۋمنىڭ جامبىل وبلىسى بويىنشا قۇرىلعان 492 ۋچاسكەسىندە داۋىستاردى ساناۋ اياقتالىپ, قورىتىندىسى جاريالاندى. بۇل تۋرالى اۋماقتىق رەفەرەندۋم كوميسسياسىنىڭ توراعاسى سەرعالي ايداپكەلوۆ وڭىرلىك كوممۋنيكاتسيالار قىزمەتىنىڭ الاڭىندا وتكەن بريفينگتە مالىمدەدى, دەپ حابارلايدى Egemen.kz.
كوميسسيا توراعاسى ءوز سوزىندە رەفەرەندۋمعا قاتىسۋ قۇقىعى بار قازاقستان رەسپۋبليكاسى ازاماتتارىنىڭ جالپى سانى 688 مىڭ 369 ادامدى قۇراعانىن اتاپ ءوتتى.
«داۋىس بەرۋگە قاتىسقان ازاماتتاردىڭ سانى 477 مىڭ 290 ادامدى نەمەسە رەفەرەندۋمعا قاتىسۋ قۇقىعى بار ازاماتتار سانىنىڭ 69,39 پايىزىن قۇرادى. رەفەرەندۋمعا قويىلعان ماسەلەنىڭ وڭ شەشىمىن جاقتاپ داۋىس بەرگەن ازاماتتاردىڭ سانى ەلىمىزدىڭ بارلىق وڭىرلەرىندە داۋىس بەرۋگە قاتىسقانداردىڭ 78,63 پايىزىن نەمەسە 375 مىڭ 277 ادامدى قۇرادى. كونستيتۋتسيالىق تۇزەتۋلەرگە قارسى داۋىس بەرگەن ازاماتتاردىڭ سانى 17,85 پايىزدى نەمەسە داۋىس بەرۋگە قاتىسقاندار سانىنىڭ 85,173 ادامىن قۇرايدى. جاۋاپتاردىڭ ەكى نۇسقاسى دا تاڭداپ الىنعان, ياعني, جارامدى دەپ تانىلعان. الايدا داۋىستاردى ساناۋ كەزىندە ەسكەرىلمەيتىن بيۋللەتەندەر سانى 1,65 مىڭ نەمەسە 7 مىڭ 854 بيۋللەتەندى قۇرادى», دەدى سەرعالي ايداپكەلوۆ.
سونداي-اق كوميسسيا توراعاسىنىڭ ايتۋىنشا, داۋىس بەرۋشىلەردىڭ ەرىك ءبىلدىرۋىن انىقتاۋ مۇمكىن بولمايتىن جانە جارامسىز دەپ تانىلعان بەلگىلەنبەگەن ۇلگىدەگى بيۋللەتەندەر سانى 1,89 پايىزدى نەمەسە 8,986 بيۋللەتەندى قۇراعان.
ال, وبلىستاعى بارلىق رەفەرەندۋم ۋچاسكەلەرىندە رەسپۋبليكالىق قوعامدىق ۇيىمداردان 2283 وكىل قاتىسقان. ۋچاسكەدە داۋىس بەرۋگە قاتىسقان ەرەكشە قاجەتتىلىكتەرى بار ازاماتتار سانى 1067 ادام بولسا, 1128 ازامات ۇيدە داۋىس بەرگەن.