اتىراۋ وبلىسىندا بۇگىنگى رەفەرەندۋمدا 396 923 ادام داۋىس بەرەدى, دەپ حابارلايدى Egemen.kz.
وبلىستىق اۋماقتىق رەفەرەندۋم كوميسسياسىنىڭ مالىمەتىنە سۇيەنسەك, قازىر وڭىردە 9 اۋماقتىق, 261 ۋچاسكەلىك رەفەرەندۋم كوميسسياسى جۇمىس ىستەپ تۇر. كوميسسيالاردىڭ قۇرامىندا 1 968 مۇشە بار.
«وبلىستا رەسپۋبليكالىق رەفەرەندۋمعا قاتىسۋعا قۇقىعى بار 396 323 ادام تىركەلدى. داۋىس بەرۋشىلەر 261 رەفەرەندۋم ۋچاسكەسىندە داۋىس بەرەدى. ال اۋرۋحانالار, ۋاقىتشا قاماۋ ورىندارى مەن اسكەري بولىمشەلەردە 11 جابىق ۋچاسكە اشىلدى», دەپ ءمالىم ەتتى اۋماقتىق رەفەرەندۋم كوميسسياسىنان.
وڭىردەگى 255 رەفەرەندۋم ۋچاسكەسىندە پاندۋس ورناتىلعان. بۇل ۋچاسكەلەردىڭ ءبارى تاكتيلدىك بەلگىلەرمەن, كوزى ناشار كورەتىن ادامدار اۋديونۇسقانى تىڭداعاننان كەيىن بيۋللەتەندى تولتىرۋ ءۇشىن ترافارەتتەرمەن قامتىلعان.
«اتىراۋ قالاسى مەن اۋداندار ورتالىقتارىندا 39 ينۆاتاكسي مۇمكىندىگى شەكتەۋلى ادامدارعا قىزمەت كورسەتەدى. قۇلاعى ەستىمەيتىن ادامدار ءۇشىن 12 سۋردواۋدارماشى بار», دەپ حابارلادى اۋماقتىق رەفەرەندۋم كوميسسياسىنان.
سونداي-اق اتىراۋ قالاسىندا, جىلىوي, يساتاي, قۇرمانعازى, قىزىلقوعا, ماقات اۋداندارىندا ۆاحتالىق ادىسپەن جۇمىس ىستەيتىندەر بار. ولار 43 ۋچاسكەلىك كوميسسيادا داۋىس بەرەدى.