پەتروپاۆل. 21 ءساۋىر. سولتۇستىك قازاقستان وبلىسى مەكتەپتەرى 5 وقۋشىسىنىڭ اقش-تا بىلىمدەرىن جەتىلدىرۋ قۇقىعىنا يە بولدى. بۇل تۋرالى egemen.kz ءتىلشىسى حابارلادى.
قازاقستان-امەريكا «FLEX» باعدارلاماسى بويىنشا بيىل ەلىمىزدەن 5000-عا جۋىق ۇمىتكەر سىنعا ءتۇسىپ, ولاردىڭ 83-ءى ىرىكتەۋدەن سۇرىنبەي ءوتتى. وسى سىننان وتكەندەر اراسىنان تابىلعان 5 سولتۇستىكقازاقستاندىق وقۋشى كەلەسى وقۋ جىلىندا اقش-قا ساپار شەگەدى.
پەتروپاۆل قالاسىنداعى «بەست» گيمنازياسىنىڭ وقۋشىلارى اتالمىش باعدارلاماعا 1999 جىلدان بەرى اتسالىسىپ كەلەدى. سودان بەرى 18 وقۋشى جولدامانى جەڭىپ الىپ, بىلىمدەرىن اعىلشىن تىلىندە تەرەڭدەتۋ مۇمكىندىگىنە يە بولدى. بالالاردىڭ مۇحيتتىڭ ارعى جاعىندا وقۋى, تاماعى, جاتىن ورنى تەگىن بولعاندىقتان, «جۇزدەن جۇيرىك, مىڭنان تۇلپار» اتانۋ وڭاي ەمەس. ۇسىنىلعان تاقىرىپقا شىعارما جازۋ, پسيحولوگيالىق تەستەن ءوتۋ, اڭگىمەلەسۋ, وزدەرىن قابىلدايتىن وتباسىلارعا حات جازۋ, كوشباسشىلىق قارىم-قابىلەتىن تانىتۋ, بوگدە ادامدارمەن ءتىل تابىسۋ سەكىلدى سىناقتاردان قينالماي وتكەن قىزىلجارلىق بويجەتكەندەر قازاقستاننىڭ نامىسىن جوعارى ۇستاۋعا سەرت بەرىپ وتىر.
ءومىر ەسقالي.
دەرەككوز: egemen.kz.
فوتو: flex-exchange.ru.