تۇركىستاندا وتباسىمەن ۇيىمداسىپ ۇرلىق جاساعاندار ۇستالدى

قىلمىستىق توپ ءوڭىردىڭ قازىعۇرت, كەلەس, ورداباسى جانە سارىاعاش اۋداندارىنداعى 70 پاتەردى توناعان. ءتارتىپ ساقشىلارى ۇرىلاردى لومباردتارعا وتكىزگەن تاۋارلارى ارقىلى تاپقان.

تەرگەۋ بارىسىندا بۇرىن وسىنداي قىلمىستارى ءۇشىن سوتتالعان 26 جاستاعى ەر ادام انىقتالدى. ول ءوزىنىڭ تانىستارى مەن تۋىستارىنان توپ قۇراپ, ارقايسىنا تاپسىرما بەرىپ وتىرعان. ۇرلىق جاساعان كەزدە ولار مىندەتتى تۇردە پاتەر يەلەرىنىڭ جوقتىعىنا كوز جەتكىزىپ, ءۇي ەرەكشەلىكتەرىن ەسكەرىپ وتىرعان. ۇرلىق جاساعان سوڭ, سەزىكتىنى كۇيەۋ بالاسى كولىگىمەن بىردەن الىپ كەتىپ وتىرعان. ءارى قاراي ۇيىمداستىرۋشىنىڭ اناسى مەن جۇبايى ۇرلانعان اشەكەي بۇيىمداردى پۇلداپ, تۇسكەن پايداسىن ءوزارا بولىسكەن.

تۇركىستاندىقتارعا كەلتىرىلگەن زالالدىڭ جالپى سوماسى 100 ملن تەڭگەدەن استى. ءتىنتۋ بارىسىندا بۇزۋعا ارنالعان 32 ءتۇرلى مونتاج-قۇرىلعىلار, كىلتتەر, 52 زەرگەرلىك بۇيىم, 106 كەپىل بيلەتى جانە كۇدىكتىلەر ۇرلاعان زاتتارىن تاسىمالداعان اۆتوكولىك تاركىلەندى.

ۇيىمداستىرۋشى جانە توپتىڭ ەكى مۇشەسى تۇركىستان وبلىسى پد قازىعۇرت اۋداندىق پب ۋۇي-عا قامالدى. تاعى ءبىر كۇدىكتىگە قاتىستى ەشقايدا كەتپەۋ تۋرالى قولحات بۇلتارتپاۋ شاراسى قولدانىلدى.

قازىرگى ۋاقىتتا قىلمىستىق ءىستى سوتقا جىبەرۋ ءۇشىن تەرگەۋ-جەدەل ءىس-شارالار كەشەنى جۇرگىزىلۋدە.

سالتانات كەنجەباي