الماتى قالالىق «شىڭعا ورلەۋ» الەۋمەتتىك كلۋبىنىڭ جەتىسۋ اۋداندىق بولىمىندە كورنەكتى عالىم, فيلوسوفيا عىلىمدارىنىڭ دوكتورى, ۇلتتىق عىلىم اكادەمياسىنىڭ اكادەميگى, كسرو جوعارى مەكتەبىنىڭ ەڭبەك سىڭىرگەن قايراتكەرى دوسمۇحامبەت كىشىبەكوۆپەن كەزدەسۋ ۇيىمداستىرىلدى. عاسىرعا جۋىق عۇمىرىندا قازاق ەلىنىڭ باسىنا تۇسكەن ءبىراز ناۋبەتتى كوزىمەن كورىپ, ولاردان امان وتكەن ابىز قاريانىڭ ۇرپاققا ايتار ونەگەلى ەستەلىكتەرى مولىنان ەكەنىنە ەشكىمنىڭ دە كۇمانى بولعان جوق.
سان ۇرپاقتىڭ اتاسى, ۇستازداردىڭ ۇستازى ءوزىنىڭ 97-گە كەلگەن جاسىنا قاراماي, سارا كوڭىلىمەن, دانا كوكىرەگىمەن-اق ءوزىن قورشاي جاۋدىرەپ وتىرعانداردىڭ التى-توعىز جاسار بالدىرعاندار ەكەنىن بىردەن باعدارلاپ, سول جاس دەڭگەيىندەگىلەردىڭ تۇيسىگىنە قونىمدى ءدارىسىن باستاپ جىبەردى. ال اتا ءسوزىنىڭ الدىندا كلۋبتىڭ ۇستاز تالىمگەرى گۇلزيا اۋقاشوۆا عىلىم عانا ەمەس, سوعىس جانە ەڭبەك ارداگەرىنىڭ قايتالانباس عۇمىرناماسىن تاربيەلەنۋشىلەرگە بايانداپ وتكەن ەدى.
ء«بىزدىڭ حالقىمىز – الەمدەگى ەڭ ومىرشەڭ, ويشىل دا وزىق حالىق. ونىڭ بۇكىل دۇنيەتانىمى, سالتى, ءداستۇرى, ۇستانىمى, تىنىس-تىرشىلىگى – تۇنىپ تۇرعان فيلوسوفيا. سەندەردىڭ وسىنداي كلۋبتا وزدەرىڭنىڭ اجەلەرىڭدەي ۇستاز-تالىمگەرلەردەن ءتالىم الىپ جاتقاندارىڭنىڭ ءوزى ۇلتتىق سانانىڭ, ۇلتتىق فيلوسوفيانىڭ جەمىسى», دەدى ابىز قاريا. ءوز كەزەكتەرىندە بالدىرعاندار دا جامىراي سۇراق قويىسىپ, ۇعىنىقتى جاۋاپتارىن الدى.
كەزدەسۋ سوڭىندا كلۋب تاربيەلەنۋشىلەرى وزدەرىنىڭ بولاشاقتا كىم بولعىسى كەلەتىندەرىن, قانداي ماماندىقتى, كاسىپتى قالايتىندارىن كەزەك-كەزەك ورىندارىنان تۇرىپ ايتىپ شىققان سوڭ, اتالارىنان باتا سۇرادى. «جاۋىنمەن جەر كوگەرەدى, باتامەن ەر كوگەرەدى» دەيدى دانا حالقىمىز. قىزىر سيپاتتى قوناعىمىز باتاسىن «ەندى ءبىر جيىرما جىلدان كەيىن سەندەر ەل مەن جەردىڭ ءبىر-ءبىر تۇلعاسى بولاسىڭدار», دەپ تۇيىندەدى. بالدىرعاندار بولسا, جۇزدەرى بال-بۇل جانىپ, اتالارىمەن ەستەلىك سۋرەتكە ءتۇستى.
گۇلنار كەنجەعۇلقىزى,
الماتى قالالىق «شىڭعا ورلەۋ» الەۋمەتتىك كلۋبى
جەتىسۋ ءبولىمىنىڭ مەڭگەرۋشىسى