ەڭ ءبىرىنشى كەزەكتە ۇرپاق قامىن ويلايىق

سونىمەن قاتار ءبىز مۇنداي يدەيالاردىڭ, ەڭ الدىمەن, مەملەكەت قۇراۋشى ۇلت ءۇشىن كەرەك ەكەنىن ەرەكشە ەسكەرۋگە ءتيىسپىز. ەڭ باستىسى, قازاق مۇددەسى وزگە ۇلتتارعا قاراعاندا الدىڭعى قاتارعا شىعۋى كەرەك.

قازاقستانداعى جالپى بالا سانى 5 ميلليوننان اسادى ەكەن. ونىڭ ىشىندە 120 مىڭ بالعىننىڭ مۇمكىندىگى شەكتەۋلى, 16 مىڭنان استام جەتكىنشەكتىڭ اقىل-ەسى دۇرىس ەمەس, ال 17 مىڭعا جۋىق بالا جەتىمدەر ساناتىندا كورىنەدى. سونىمەن قاتار قازىر ەلىمىزدەگى 6 ميلليوننان استام تۇرعىنعا اعزاعا قاجەتتى دارۋمەندەر جەتىسپەسە, وكىنىشتىسى سول, 47 پايىز­ى بالالارعا تيەسىلى ەكەن. سونداي-اق قازاقستان انا مەن بالا ءولىمى بويىنشا الەمدە 87 ورىندا دەگەن مالىمەت بار. سوڭعى 15 جىلدا انەميا دەرتى اياعى اۋىر انالاردا 20 پايىزدان 40 پايىزعا كوتەرىلىپتى. كوپتەگەن جاس انا, وكىنىشكە قاراي, اياعى اۋىر كەزدە نەمەسە بوسانۋ ۋاقىتىندا قايتىس بولاتىن كورىنەدى. جاس انانىڭ اجالىن تۋعان-تۋىستارى كوپ جاعدايدا مامانداردىڭ جاۋاپسىزدىعىنان كورەدى... اجالدىڭ اياقاستىنان ەكەنىمەن ەشكىمنىڭ ءىسى جوق. قان ازدىق, تەمىر مەن فولي قىشقىلىنىڭ جەتىسپەۋشىلىگى ايتىپ كەلمەيتىن اجالعا سوقتىرىپ جاتىر. قانى از انالاردىڭ 74,7 پايىزى العاشقى اپتادا-اق ءسابيىن جوعالتادى. ال انالاردىڭ 43,7 پايىزىنىڭ ءسابيى ءبىر اي عانا ءومىر سۇرەدى. اعزاعا تەمىر جەتىسپەۋشىلىگى سالدارىنان سابيلەردىڭ 40-60 پايىزىنىڭ اقىل-ەسىنە نۇقسان كەلىپ, ساباققا دەگەن ىنتاسى ناشارلايدى ەكەن. مەن 50 جىلدىق تاجىريبەسى بار دارىگەر-بالا حيرۋرگى رەتىندە ايتايىن, وسىنىڭ بارلىعى حالىقتىڭ ءال-اۋقاتىنىڭ ناشارلىعىنىڭ كورسەتكىشى...

ويلانا قاراساق, بالا – مەملەكەتتىڭ باستى بايلىعى, قازىناسى جانە بولاشاق تىرەگى. دەمەك ونى باعىپ-قاعۋ – تەك اتا-انانىڭ عانا ەمەس, مەملەكەتتىڭ دە باستى مىندەتى. بالا دا قارتتار مەن مۇگەدەكتەر سەكىلدى قوعامنىڭ قورعانسىز مۇشەسى, سوندىقتان ءار بالانى باعىپ-قاعىپ وسىرۋگە, تاربيەلەۋگە ۇكىمەت قاجەتىنشە جاردەم بەرىپ وتىرسا, انالار دا بالا تۋدان باس تارتپاس ەدى جانە بالالاردىڭ دا دەنساۋلىقتارى اناعۇرلىم جاقسارار ەدى. ال مۇنىڭ ءوزى دەنى ساۋ, ءبىلىمدى, بىلىكتى ۇرپاق ءوسىرۋدى قامتاماسىز ەتەتىنى دە داۋسىز.

ءابدىسابىر ومەش ۇلى,

بالالار حيرۋرگى, پروفەسسور

الماتى