رەفەرەندۋم جاڭا مۇمكىندىكتەرگە جول اشادى. بۇل جاي عانا ساياسي ءىس-ارەكەت نەمەسە ۋاقىتتى بوسقا جوعالتۋ ەمەس. ءبىز ءۇشىن الداعى باعىت-باعدارىمىزدى ايقىندايتىن ءسات كەلدى.
ەلىمىزدە بولعان كۇردەلى وقيعالار حالىقتىڭ بىرلىگى مەن مىقتىلىعىن سىناپ كوردى. سىرتقى كۇشتەردىڭ شابۋىلىنا ۇشىرادىق. قوردالانىپ قالعان ماسەلەلەر بۇگىن شەشۋدى قاجەت ەتەدى. ءادىل كونستيتۋتسيا عانا حالىقتىڭ تالاپ-تىلەگىنە نەگىزدەلمەك. ءبىز ەندى ەلدىڭ جاسامپازدىق كۇشىن ورتاق ماقسات جولىنا بۇرعىمىز كەلەدى. رەفەرەندۋمدا بارلىق تاراپتىڭ ءۇنىن ەستيتىن بولامىز.
دەموكراتيانى, اشىق قوعام مەن ادىلدىكتى ورناتۋدا ءاربىر قازاقستاندىقتىڭ مۇمكىندىگى بولۋى كەرەك. رەفەرەندۋم قوعام تالابىنا جاۋاپ بەرەدى. كونستيتۋتسيانىڭ جاڭا رەداكتسياسى بيلىكتىڭ بارلىق دەڭگەيىندە ساياسي كونفيگۋراتسيانى تۇبەگەيلى وزگەرتەدى. قازاقستان مەن ونىڭ حالقى عانا وزگەرىسسىز قالادى. حالىق پەن مەملەكەتتىڭ مۇددەسى ساقتالادى. رەفەرەندۋمنان كەيىن ءبىز مەملەكەت پەن ازاماتتارىمىزدىڭ ءوزارا جاۋاپكەرشىلىگىنىڭ ناقتى الگوريتمىنە قول جەتكىزەمىز. اتا زاڭعا ەنگىزىلەتىن تۇزەتۋلەردى قولداپ, بارىنشا بەلسەندىلىك تانىتۋىمىز كەرەك.
بۇل تەك وزىمىزگە عانا ەمەس, نيەتتەس جانە الىس-جاقىن ەلدەرگە, بارشا الەمگە بەرگەن جاۋابىمىز بولماق. دۇنيەجۇزى ءبىزدىڭ بىرلىگىمىزدى, مەملەكەت باسشىسى قاسىم-جومارت توقاەۆتىڭ ۇستانعان باعىتىن قولدايتىنىمىزدى كورەتىن بولادى. قازاقستاننىڭ كوپۇلتتى بولۋى ءبىزدىڭ ستراتەگيالىق رەسۋرسىمىز ەكەنى انىق. ەندەشە, ەلىمىزدىڭ ماقساتى ايقىن, ىنتىماعى بەرىك ەكەنىن دالەلدەيتىن ءسات تۋىپ تۇر.
احمەت مۇرادوۆ,
قوعام قايراتكەرى,
قازاقستاننىڭ «ۆايناح» چەشەن جانە ينگۋشتار قاۋىمداستىعىنىڭ تەڭ توراعاسى,
قازاقستان حالقى اسسامبلەياسى كەڭەسىنىڭ مۇشەسى