ماجىلىستە «قر كەيبىر زاڭنامالىق اكتىلەرىنە كولىك ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ءبىرىنشى وقىلىمعا شىعارىلدى, دەپ حابارلايدى Egemen.kz.
قر يندۋستريا جانە ينفراقۇرىلىمدىق دامۋ ءمينيسترى قايىربەك وسكەنباەۆ ماجىلىستە زاڭ جوباسىن تانىستىردى. ونىڭ ايتۋىنشا, قۇجات قازاقستان رەسپۋبليكاسىنىڭ 4 كودەكسى جانە 16 زاڭىنا وزگەرتۋلەر مەن تولىقتىرۋلار ەنگىزۋدى كوزدەيدى.
«زاڭ جوباسىنىڭ نەگىزگى ماقساتتارى: جولداردا كولىكتىك باقىلاۋدى اۆتوماتتاندىرۋ; تەڭىز كولىگى سالاسىنداعى حالىقارالىق شارتتاردىڭ نورمالارىن يمپلەمەنتاتسيالاۋ; تەمىرجول كولىگىندەگى وقيعالاردى جانە كەمەلەرمەن بولعان اۆاريالىق جاعدايلاردى تەرگەۋ ءتارتىبىن جەتىلدىرۋ; قازاقستان رەسپۋبليكاسى زاڭناماسىن حالىقارالىق ازاماتتىق اۆياتسيا ۇيىمى ستاندارتتارىنىڭ تالاپتارىنا جانە ەۋروپالىق وداقتىڭ اۆياتسيالىق تالاپتارىنا كەلتىرۋ; اۋەايلاق ماڭىنداعى اۋماقتا قىزمەتتى جۇزەگە اسىرۋعا رۇقسات الۋ تەتىگىن رەتتەۋ», دەپ ءتۇسىندىردى قايىربەك وسكەنباەۆ.
جۇكتى اۆتوكولىكپەن تاسىمالداۋدىڭ قارقىنى جوعارى, جول توسەمىنىڭ مەرزىمىنەن بۇرىن بۇزىلۋ ماسەلەسى تۇبەگەيلى شارا قابىلداۋدى تالاپ ەتەدى. وسى ماقساتتا «نۇرلى جول» باعدارلاماسى بويىنشا جولدا كولىك قۇرالدارىنىڭ سالماقتىق جانە گاباريتتىك پارامەترلەرىن ولشەيتىن اۆتوماتتاندىرىلعان ستانسالاردى ورناتۋ جوسپارلانعان.
«زاڭ جوباسىندا اۆتوماتتاندىرىلعان ولشەۋ ستانسالارىن ورناتۋ جانە ولاردىڭ جۇمىس ءتارتىبىن ايقىندايتىن نورمالار كوزدەلگەن. بۇل رەتتە ستانسالار ادامنىڭ قاتىسۋىنسىز «سەرگەك» جۇيەسى قاعيداتى بويىنشا جۇمىس ىستەيتىنىن اتاپ وتكەن ءجون. ۇسىنىلىپ وتىرعان شارالار اۆتوجولداردىڭ ساقتالۋىن قامتاماسىز ەتۋگە جانە كولىكتىك باقىلاۋ جۇرگىزۋ كەزىندە ادامي فاكتوردى بولدىرماۋعا مۇمكىندىك بەرەدى», دەدى مينيستر.
گۇلدانا ەلۋباي