بيىل تۇركىستان وبلىسىنا كەلەتىن ىشكى تۋريستەر سانىن 261 000 مىڭنان, شەتەلدىك تۋريستەر سانىن 7 200-دەن اسىرۋ, كەلۋشىلەر سانىن 1 ملن 300 مىڭ ادامعا دەيىن جەتكىزۋ مىندەتى جۇكتەلگەن بولاتىن. مىندەتتەمەنى ارتىعىمەن ورىنداۋ ماقساتىندا اتقارىلعان ءىس از ەمەس.
وبلىستىق تۋريزم باسقارماسىنىڭ باسشىسى گ.اقبەرديەۆانىڭ ايتۋىنشا, 4 ايدىڭ قورىتىندىسى بويىنشا «ازىرەت سۇلتانعا» 180 مىڭعا جۋىق ادام كەلگەن. وسى ارقىلى وڭىردەگى ساناتوريلەرگە كەلۋشىلەر دە كوبەيدى. مەرەكەلىك ءىس-شارالاردى ۇيىمداستىرۋ جانە قىزمەت كورسەتۋ ساپاسىن جاقسارتۋ ەسەبىنەن «كەرۋەن سارايعا» كەلەتىن تۋريستەر مەن قوناقتار اعىنى ارتتى. مەرەكە كۇندەرى قوناقۇيلەردىڭ نومىرلىك قورى تولىقتاي ساتىلدى, ناۋرىز جانە ءساۋىر ايلارىندا قوناقۇيلەردىڭ ورتاشا جۇكتەمەسى 41%-عا جەتتى, رەسپۋبليكا بويىنشا ورتاشا جىلدىق جۇكتەمە – 20%. تۋريستىك سالا كاسىپكەرلەرىمەن بايلانىس نىعايىپ, تۋريستىك نىسانداردى الەۋمەتتىك جەلىلەردە ناسيحاتتاۋ كۇشەيگەن. الماتى وبلىسىنىڭ «ليمون» تۋريستىك وپەراتورى ءبىر-ەكى كۇندىك شىعۋ تۋرىن ۇيىمداستىرادى, اپتاسىنا ەكى رەت 50 ادامنان كەلەدى. «ۆيزيت تۇركىستان» تۋروپەراتورى ناۋرىز جانە ءساۋىر ايلارىندا قالا بويىنشا 300-دەن استام ەكسكۋرسيا وتكىزگەن. جالپى, وبلىستا تۋريزم سالاسىنداعى كورسەتكىشتەر ايتارلىقتاي ءوستى. شەكتەۋلەر مەن كارانتيندىك شارالارعا قاراماستان, بىلتىر تۋريزم سالاسىندا كورسەتىلگەن قىزمەتتەر كولەمى 3.85 ملرد تەڭگە بولدى جانە 2019 جىلمەن سالىستىرعاندا 209%-عا وسكەن. بىلتىر ءوڭىردىڭ تۋريزم سالاسىنا 102 ملرد تەڭگە ينۆەستيتسيا تارتىلعان. بۇل كورسەتكىش بويىنشا وبلىس ەل كولەمىندە الدىڭعى قاتاردا.
باسقارما باسشىسى تۇركىستان وبلىسىن دامىتۋدىڭ كەشەندى جوسپارىنا سايكەس وڭىردە ىشكى جانە سىرتقى ءتۋريزمدى دامىتۋ, كەلۋشىلەر مەن تۋريستەر سانىن ارتتىرۋ, سالاعا ينۆەستيتسيا تارتۋ جانە وزگە دە مىندەتتەر جۇكتەلگەنىن ايتادى. ورىندالۋعا ءتيىس مىندەتتەر مەن تاپسىرمالار جانە جوسپارلار دا از ەمەس. وبلىس اكىمى ومىرزاق شوكەەۆتىڭ تاپسىرماسىنا سايكەس تۇركىستاندا مەرەكە كۇندەرى «كەرۋەن سارايدا» اتاۋلى ءىس-شارالار ۇيىمداستىرىلىپ, ەلىمىز بەن شەتەلدىڭ تانىمال انشىلەرى ونەر كورسەتىپ كەلەدى. جىل سوڭىنا دەيىن انشىلەر مەن جۇلدىزدى توپتاردىڭ قاتىسۋىمەن 17 ءىس-شارا ۇيىمداستىرىلماق. ۇكىمەت بەكىتكەن «حالىقتىڭ تابىسىن 2025 جىلعا دەيىن ارتتىرۋ جونىندەگى كەشەندى جوسپارعا» سايكەس «Kazakh Tourism» ۇلتتىق كومپانياسى» اق تاراپىنان 25 ءىس-شارانى وتكىزۋ جوسپارلانۋدا. قازىرگى ۋاقىتتا تۋريزم باسقارماسى «Kazakh Tourism» ۇلتتىق كومپانياسى» اق-ى جانە «كەرۋەن سارايمەن» ءىس-شارالار تىزبەسىن پىسىقتاۋدا. ءىس-شارالار تامىز ايىندا باستالادى دەگەن جوسپار بار. بيىل باسقارما تاراپىنان ءوڭىردىڭ تۋريزم سالاسىن ىلگەرىلەتۋگە باعىتتالعان Karavan Statue Street Art مۇسىندەر فەستيۆالى, Taiqazan گاستروفەستيۆالى, «باتىر باتلس» فەستيۆالى سەكىلدى جوبالاردى جۇزەگە اسىرۋ جوسپارلانۋدا.
تۇركىستاندا قۇرىلىسى ءجۇرىپ جاتقان «تۇركىستان» تۋريستىك-رەكرەاتسيالىق ورتالىعىنىڭ جاعاجاي ءتۋريزمىن دامىتۋعا سەرپىن بەرەرى انىق. اتالعان ورتالىقتا دەمالۋعا, شومىلۋعا, سۋ سپورتى تۇرلەرىمەن اينالىسۋعا مۇمكىندىك جاسالادى. جالپى اۋدانى 85 گەكتار جەردە ورنالاساتىن ەرەكشە كەشەننىڭ قۇرىلىسى ءۇش كەزەڭگە جالعاسادى. جاساندى كولدىڭ سىيىمدىلىعى – 2,5 ملن تەكشە مەترگە جۋىق. نىساننىڭ جەر جۇمىستارى تولىق اياقتالعان. كوكتەمگى سۋدى قابىلدايتىن, سۋ جىبەرەتىن كانالدار دا دايىن. جاعاجايدا ەمدىك قاسيەتكە يە شاعىل قۇم توسەلىپ, اعاش وتىرعىزىلىپ, بالالار دەمالىس اۋماعى, ەليتالىق كوتتەدجدەر مەن قوناقۇيلەر, اكۆاپارك سالىنادى. ال قۇرىلىسى ءجۇرىپ جاتقان ەسكەك ەسۋ بازاسىنا سىناقتان وتكىزۋ ءۇشىن سۋ جىبەرىلە باستادى. وسى ارقىلى ماماندار كانالدى تولىق ساراپتاپ, كەم-كەتىكتەرى بولسا, تولىقتىرادى. بەتكەيلەرىنىڭ بەتونداۋ جۇمىستارى دا اياقتالىپ كەلەدى. ارنايى قۇبىرلارى مەن ارىقتارى ورناتىلدى. سۋ كەلەتىن كانالدار دايىن. قازىر 250 مىڭ تەكشە مەتر سۋ جينالعان, نىسان سۋ قابىلداۋعا دايىن.
سونداي-اق قالا قوناقتارى مەن تۋريستەردىڭ دەمالۋىنا جايلى دا, قولايلى جاعداي جاساۋ ماقساتىندا وبلىس ورتالىعىندا كوگالداندىرۋ جۇمىستارى قۇرىلىسپەن قاتار جۇرگىزىلۋدە. قالاداعى ساياباقتار مەن گۇلزارلار اۋماعى 500 گەكتارعا جەتەدى. اعاش پەن بۇتالار سانى 1 ملن-نان اسادى. كوگال اۋماعى – 3 ملن شارشى مەتر. 70 مىڭ شارشى مەتر جەرگە گۇل ەگىلگەن. تۇركىستان قالاسىنىڭ اكىمى نۇربول تۇراشبەكوۆتىڭ بايانداۋىنشا, بيىل قالا اۋماعىندا 250 مىڭ اعاش كوشەتى مەن 128 گەكتار كوگال ەگىلەتىن بولادى. تۇركىستاندى كوركەيتىپ, اباتتاندىرۋ اياسىندا قالا سەكتورلارعا بولىنگەن. ءار سەكتورعا اۋدان, قالا اكىمدىكتەرى مەن باسقارما باسشىلارى تىكەلەي جاۋاپتى. ياعني تۇركىستان وبلىسىنىڭ بارلىق اۋدان, قالالارى بىرىگىپ, كيەلى قالا اۋماعىن كوركەيتۋدە. كوكتەمدە 100 مىڭنان استام ءتۇپ كوشەت وتىرعىزىلىپ, 130 مىڭ شارشى مەتر اۋماق كوگالداندىرىلدى.
تۇركىستان وبلىسى