جەڭىلدەتىلگەن اۆتونەسيە باعدارلاماسى ارقىلى 34 قازاقستاندىق كولىك ساتىپ الدى. بۇل تۋرالى «ونەركاسىپتى دامىتۋ قورى» اق باسقارما توراعاسىنىڭ ورىنباسارى جانار يبراشەۆا ايتتى, دەپ حابارلايدى Egemen.kz.
«بۇل باعدارلامانىڭ نەگىزگى وپەراتورى – «ونەركاسىپتى دامىتۋ قورى». بۇعان دەيىن وپەراتور قازاقستان دامۋ بانكى بولعان ەدى. وسى باعدارلامانى جۇزەگە اسىرۋ اياسىندا رەۆولۆەرلىك تەتىك ارقىلى 100 ملرد تەڭگە ءبولىندى. ياعني, ەگەر ازاماتتارىمىز ءبىرىنشى كەزەكتە ساتىلىمعا شىعارىلعان ءاۆتوموبيلدى الىپ ۇلگەرمەسە, وندا ولار جەكە تۇلعالاردان قاراجات تۇسكەننەن كەيىن قايتادان بىردەن جۇگىنە الادى. 2-3 اي وتكەن سوڭ جەڭىلدىكپەن اۆتونەسيە الۋعا مۇمكىندىك بولادى», دەدى ول ورتالىق كوممۋنيكاتسيالار قىزمەتىندەگى ءباسپاسوز ءماسليحاتىندا.
ونىڭ اتاپ وتۋىنشە, باعدارلاما اياسىندا 10 مىڭنان استام ازامات كولىك الادى. قازىرگى ۋاقىتتا ءوتىنىمدى «بانك تسەنتركرەديت», «ەۋرازيالىق بانك», «حالىق بانك» ارقىلى بەرۋگە بولادى. بۇگىننەن باستاپ بۇل تىزىمگە «Forte Bank» قوسىلادى.
«باعدارلاما باستالعان ساتتەن بەرى 14 507 ءوتىنىم قابىلداندى. ونىڭ ىشىندە 4 834 جەكە تۇلعاعا 35,7 ملرد تەڭگە ماقۇلداندى. 34 كولىك ساتىپ الىندى: نۇر-سۇلتان – 11, الماتى – 4, اقتوبە وبلىسى – 3, الماتى وبلىسى – 1, باتىس قازاقستان وبلىسى – 1, جامبىل وبلىسى – 4, پاۆلودار وبلىسى – 4, شىمكەنت – 6 اۆتوموبيل», دەدى جانار يبراشەۆا.