ورتالىق رەفەرەندۋم كوميسسياسى وفلاين جانە ونلاين فورماتتا وقىتۋ سەمينارلارىنىڭ سەرياسىن جالعاستىرۋدا. بۇل جولعى سەمينار قوعامدىق بىرلەستىكتەردىڭ وكىلدەرىنە ارنالىپ, وندا مۇگەدەك جانداردىڭ ماسەلەلەرى قارالدى.
رەفەرەندۋمدى ۇيىمداستىرۋدىڭ قۇقىقتىق نەگىزدەرىن, «قازاقستان رەسپۋبليكاسىنىڭ كونستيتۋتسياسىنا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن, رەسپۋبليكالىق رەفەرەندۋم الدىنداعى ۇگىت جۇمىستارىن جۇرگىزۋ ءتارتىبىن ءتۇسىندىرۋدى ماقسات تۇتقان سەمينار جۇمىسىنا 150-دەن استام ادام قاتىستى. سونداي-اق جيىندا بۇۇ مۇگەدەك جانداردىڭ قۇقىقتارى تۋرالى كونۆەنتسياسىنىڭ نەگىزگى قاعيداتتارى تۋرالى حاباردار ەتۋ, رەسپۋبليكالىق رەفەرەندۋم وتكىزۋ كەزىندە مۇمكىندىگى شەكتەۋلى ازاماتتاردىڭ قۇقىقتارىن ىسكە اسىرۋدى قامتاماسىز ەتۋ ماسەلەلەرى تالقىلاندى.
وقىتۋ سەمينارىنىڭ جۇمىسىنا ورك مۇشەلەرى, قازاقستانداعى بۇۇ دامۋ باعدارلاماسىنىڭ وكىلى, ورك جانىنداعى مۇگەدەكتەردىڭ قۇقىقتارىن ىسكە اسىرۋ جونىندەگى جۇمىس توبىنىڭ مۇشەلەرى, ەڭبەك جانە الەۋمەتتىك قورعاۋ, ادىلەت مينيسترلىكتەرىنىڭ, سونداي-اق مۇگەدەك جانداردىڭ قوعامدىق بىرلەستىكتەرىنىڭ وكىلدەرى قاتىستى. سونداي-اق بەينەكونفەرەنتسيا بايلانىسى رەجىمىندە ءىس-شاراعا مۇگەدەك جانداردىڭ قۇقىقتارىن قورعاۋ جونىندەگى وڭىرلىك ۇەۇ وكىلدەرى, اۋماقتىق كوميسسيالاردىڭ مۇشەلەرى جانە مۇمكىندىكتەرى شەكتەۋلى ادامدارمەن جۇمىس ىستەۋگە جاۋاپتى جەرگىلىكتى اتقارۋشى ورگانداردىڭ وكىلدەرى قاتىستى.
ءىس-شارانىڭ مودەراتورى – ورتالىق رەفەرەندۋم كوميسسياسىنىڭ مۇشەسى شاۆحات وتەمىسوۆ كوميسسيانىڭ ماڭىزدى مىندەتتەرىنىڭ ءبىرى مۇمكىندىگى شەكتەۋلى ازاماتتاردىڭ قۇقىقتارىن قامتاماسىز ەتۋ بويىنشا بارلىق قاجەتتى جاعدايدى ىسكە اسىرۋ ەكەنىن اتاپ ءوتتى.
جەرگىلىكتى اتقارۋشى ورگاندارعا سايلاۋ ۋچاسكەسىندە داۋىس بەرۋگە ارنالعان ءۇي-جايدى, داۋىس بەرۋگە ارنالعان پۋنكتتى جاراقتاندىرۋ جونىندەگى نۇسقاۋلىققا سايكەس, رەفەرەندۋم ۋچاسكەلەرىندە مۇگەدەك ادامدارعا جاعداي جاساۋدى قامتاماسىز ەتۋ جونىندە قاجەتتى شارالار قابىلداۋ تاپسىرىلدى. قازىرگى تاڭدا رەفەرەندۋمنىڭ 10013 ۋچاسكەسىنىڭ باسىم كوپشىلىگى پاندۋستار جانە تاكتيلدى كورسەتكىشتەرمەن جابدىقتالعان. ءىس جۇزىندە بارلىعىنا كرەسلو-اربالاردى پايدالاناتىن ازاماتتاردىڭ قاجەتتىلىكتەرىن ەسكەرە وتىرىپ, داۋىس بەرۋگە ارنالعان كابينالار قاراستىرىلعان.
داۋىس بەرۋ كۇنىنە ۋچاسكەلەردىڭ دايىندىعى ماسەلەلەرىن باقىلاۋدا ۇستاۋ, ونىڭ ىشىندە ينۆاتاكسي, سۋردواۋدارماشىلاردى تارتۋ جانە ت.ب. سياقتى مۇگەدەكتىگى بار ازاماتتارعا ىڭعايلى بولۋ ءۇشىن قوسىمشا شارالار ازىرلەۋ تاپسىرىلدى.
كوميسسيا مۇشەسى شاۆحات وتەمىسوۆ مۇگەدەك جانداردىڭ قۇقىقتارىن قامتاماسىز ەتۋ ماسەلەلەرىمەن اينالىساتىن بارلىق قوعامدىق بىرلەستىكتى جەرگىلىكتى اتقارۋشى ورگانداردىڭ ۋچاسكەلەردى جاراقتاندىرۋدىڭ قوسىمشا شارالارىن قابىلداۋعا شاقىردى.
جيىندا بۇۇ دامۋ باعدارلاماسىنىڭ قازاقستانداعى تۇراقتى وكىلىنىڭ ورىنباسارى ۆ.ۆرەميش, ورك جانىنداعى مۇگەدەكتەردىڭ قۇقىقتارىن قامتاماسىز ەتۋ جونىندەگى جۇمىس توبىنىڭ مۇشەسى, سەنات دەپۋتاتى ل.قالتاەۆا, ەڭبەك جانە حالىقتى الەۋمەتتىك قورعاۋ مينيسترلىگىنىڭ كوميتەت توراعاسى ە.نۇرعاليەۆ, ادىلەت مينيسترلىگىنىڭ دەپارتامەنت ديرەكتورى ن.جامالادين, «اربا» تىرەك-قيمىل اپپاراتىنىڭ قىزمەتى بۇزىلعان مۇگەدەكتەر ازاماتتاردى قولداۋ قوعامى» قب توراعاسى, باتىس قازاقستان وبلىستىق ءماسليحاتىنىڭ دەپۋتاتى گ.باتپاقۇلوۆا, «پاندۋس وك» جشس قۇرىلتايشىسى, اقتوبە قالالىق ءماسليحاتىنىڭ دەپۋتاتى ش.جۇلدىزباەۆ, سونداي-اق مۇگەدەكتەردىڭ قوعامدىق بىرلەستىكتەرىنىڭ, جەرگىلىكتى اتقارۋشى ورگانداردىڭ باسقا دا وكىلدەرى ءسوز سويلەدى.
سونداي-اق ءىس-شارا شەڭبەرىندە ورتالىق رەفەرەندۋم كوميسسياسى اپپاراتىنىڭ قىزمەتكەرلەرى «رەسپۋبليكالىق رەفەرەندۋم الدىنداعى ۇگىت», «رەفەرەندۋم وتكىزۋدى ۇيىمداستىرۋ», «رەفەرەندۋمدى ۇيىمداستىرۋ مەن وتكىزۋدىڭ قۇقىقتىق نەگىزدەرى» تاقىرىبىندا بايانداما جاسادى.