رەسەيدە قاراعاندىدان شاقىرىلعان ۇلى وتان سوعىسى جىلدارىندا قازا تاپقان قازاقستاندىق ساربازدىڭ سۇيەگى تابىلدى. جاۋىنگەردى وتانىندا قايتا جەرلەۋ ءۇشىن ونىڭ تۋىستارى ىزدەستىرىلىپ جاتىر, دەپ حابارلايدى Egemen.kz.
قاراعاندى وبلىسى تج دەپارتامەنتىنىڭ اقپاراتىنا سايكەس, سانكت-پەتەربۋرگتىڭ «جاۋىنگەر» ىزدەستىرۋ جاساعى ۇوس قاتىسۋشىسىنىڭ سۇيەگىن اسكەري جەرلەۋ ورنىنان تاپقان.
«بۇرىن بەلگىسىز بولعان اسكەري جەرلەۋدە جەرلەنگەندەردىڭ بىرىنەن پاتروننان گيلزا تۇرىندەگى قولدان جاسالعان ء«ولىم مەدالونى» تابىلدى, وعان قىزىل ارميا جاۋىنگەرى, 330 اتقىشتار پولكىنىڭ ساپەرى, 86 اتقىشتار ديۆيزياسى ماكسيموۆ يۆان اندرەەۆيچتىڭ جازباسى سالىنعان», دەلىنگەن حابارلامادا.
سونىمەن قاتار دەپارتامەنت تاراپىنان قالدىقتاردى جەرلەۋ كارتاسى ۇسىنىلدى.
ۆەدومستۆودا قايتارىمسىز شىعىنداردىڭ اتاۋلى تىزىمىنە سايكەس ي.ا. ماكسيموۆ 1912 جىلى لەنينگراد وبلىسىندا دۇنيەگە كەلگەن, ال 1942 جىلى قاراعاندىدان مايدانعا شاقىرىلعان. ماكسيموۆ 1943 جىلى 15 قاڭتاردا قايتىس بولىپ, نەۆانىڭ سول جاعالاۋىندا جەرلەندى.
قايتا جەرلەۋ ورنىن تۋىستارى انىقتايتىندىقتان, رەسەيلىك ىزدەۋشىلەر تۋىستارىنا جاۋاپ بەرۋدى نەمەسە قايتىس بولعان سارباز تۋرالى اقپارات الۋعا كومەكتەسۋدى سۇرايدى.