قىزىلوردا وبلىسىندا پروكۋراتۋرا تاراپىنان 2021-2022 جىلدارى 134 ملن تەڭگەگە بيۋدجەت قاراجاتىن جىمقىرۋدىڭ 5 دەرەگى بويىنشا سوتقا دەيىنگى تەرگەپ-تەكسەرۋ باستالدى, دەپ حابارلايدى Egemen.kz.
قىزىلوردا وبلىسىندا پروكۋراتۋرا تاراپىنان جۇرگىزىلگەن ءىس-شارالار ناتيجەسىندە 2021 جانە 2022 جىلدارى مەملەكەتتىك ساتىپ الۋدىڭ بارلىق ساتىسىندا زاڭ بۇزۋشىلىقتارعا جول بەرىلگەنى انىقتالدى. مۇنداي كەلەڭسىزدىكتەر قاتارىندا قۇرىلىس نىسانىنىڭ جوبالاۋ-سمەتالىق قۇجاتتامالارىن ازىرلەۋدەن باستاپ, مەملەكەتتىك ساتىپ الۋدى وتكىزۋ, قۇرىلىس جۇمىستارىن جۇرگىزۋ جانە نىساندى قابىلداۋ پروتسەسستەرىندە تىركەلگەن جاعدايلار بار.
«قۇرىلىس بارىسىندا جوبالاۋ-سمەتالىق قۇجاتتامادان جەكەلەگەن جۇمىستاردى الىپ تاستاپ, ورنىنا نەگىزسىز قىمبات ماتەريالداردى قوسۋ دەرەكتەرى كەزدەستى. پروكۋراتۋرا تاراپىنان 2021-2022 جىلدارى 134 ملن تەڭگەگە بيۋدجەت قاراجاتىن جىمقىرۋدىڭ 5 دەرەگى بويىنشا سوتقا دەيىنگى تەرگەپ-تەكسەرۋ باستالدى», دەپ ءتۇسىندىردى قىزىلوردا وبلىسى پروكۋراتۋراسىنىڭ باسقارما باسشىسى ايدوس ابدىباەۆ.
ۆەدومستۆو ۇسىنعان مالىمەتكە سايكەس, 2021 جىلى قازالى اۋدانى اكىمدىگى عيماراتىنىڭ قۇرىلىس جۇمىستارىندا مەردىگەر مەكەمە تاراپىنان 6 ملن تەڭگەنىڭ جۇمىسى اتقارىلماي قالعان. بۇل بويىنشا اۋداننىڭ قۇرىلىس ءبولىمىنىڭ باسشىسى قر قىلمىستىق كودەكسىنىڭ 361-بابىنىڭ 4-بولىگىمەن جاۋاپتىلىققا تارتىلعان.
«وسىنداي تاعى ءبىر دەرەك قىزىلوردا قالاسىنداعى سىرداريا وزەنىنىڭ سول جاعالاۋ بولىگىندەگى «شىركەيلى» ارناسى ارقىلى كوپىردى سالۋ كەزىندە تىركەلگەن. وندا 30 ملن تەڭگەنىڭ جۇمىستارى جاسالماعانى انىقتالدى. بۇل بويىنشا بيىل 13 مامىردا وبلىس پروكۋراتۋرا تاراپىنان قر قىلمىستىق كودەكسىنىڭ 189-بابىنىڭ 4-بولىگىمەن سوتقا دەيىنگى تەرگەپ-تەكسەرۋ تىركەلدى», دەدى ايدوس ابدىباەۆ.