قازاقستان رەسپۋبليكاسىنىڭ اەروۇتقىر اسكەرلەرىندە بريگادالىق-تاكتيكالىق جاتتىعۋلار ءجۇرىپ جاتىر
قازاقستان قارۋلى كۇشتەرىنىڭ اەروۇتقىر اسكەرلەرىندە بريگادالىق-تاكتيكالىق جاتتىعۋلار ءوتىپ جاتىر. قۇرلىق اسكەرلەرىنىڭ جاۋىنگەرلىك دايارلىق جوسپارىنا سايكەس بريگادالىق-تاكتيكالىق وقۋ-جاتتىعۋلار 18 ساۋىرگە دەيىن سوزىلادى. ول بىرنەشە كەزەڭنەن تۇرادى. اۋەلى اەروۇتقىر اسكەرلەرى تولىق جاۋىنگەرلىك ازىرلىككە كەلتىرىلدى جانە شارتتى جاۋىنگەرلىك ءىس-قيمىل اۋداندارىنا جەتكىزىلدى. جاۋىنگەرلىك اۋداندارعا مارش جاساۋ بارىسىندا دەسانتشىلار باسقارۋ, ءوزارا ارەكەت ەتۋ, بولىمشەلەردىڭ اۋىزبىرلىگى ماسەلەلەرى شەشىلەدى جانە تۇندە ىلە وزەنىنەن ءجۇزىپ وتەدى. اەروۇتقىر ءاسكەرلەرىنىڭ ءتورت گارنيزونى ءۇش باعىت بويىنشا كوپشاقىرىمدى مارش جاسايدى. – وتكىزىلىپ جاتقان وقۋ-جاتتىعۋدىڭ ەرەكشەلىگى قازاقستان رەسپۋبليكاسى قارۋلى كۇشتەرىنىڭ تاريحىندا تۇڭعىش رەت تەحنيكانى وزەن ارقىلى تۇندە الىپ ءوتۋ بولىپ تابىلادى. وقۋ-جاتتىعۋلارعا بارلىعى 2 مىڭنان استام اسكەري قىزمەتشى, 500 بىرلىك جاۋىنگەرلىك ماشينا قاتىسادى, ولاردىڭ ىشىندە 100-ءى بروندى تەحنيكا, – دەپ اتاپ ءوتتى قۇرلىق اسكەرلەرى باس قولباسشىسىنىڭ ورىنباسارى – قر قك قا باس شتابىنىڭ باستىعى گەنەرال-مايور ادىلبەك الدابەرگەنوۆ. سۋ بوگەتىن باسىپ وتپەستەن بۇرىن بولىمشەلەر قارسىلاستىڭ كۇشىن انىقتاۋ ماقساتىندا جەرگىلىكتى جەرگە بارلاۋ جۇرگىزەدى. سودان كەيىن ينجەنەرلىك-ساپەرلەر بريگاداسىنىڭ ماماندارى جاعالاۋ ايماعىن مينادان ارىلتۋ جۇمىستارىن جۇرگىزەدى. شارتتى قارسىلاستىڭ تىلىنا تىكۇشاقتان پاراشيۋتپەن اۋە دەسانتتارى تۇسىرىلەدى. قاراما-قارسى جاعادا ورنالاسۋ جانە نەگىزگى كۇشتەردى تاستاۋ ءۇشىن جايلى جاعداي جاساۋ ماقساتىندا اسكەري بارلاۋ جانە دەسانتتىق-شابۋىلداۋ باتالونى بتر-80 ىلە وزەنىن كەسىپ وتەدى. اۋىر جانە دوڭگەلەكتى تەحنيكا ينجەنەرلىك بولىمشەلەر بەكىتكەن قالقىمالى كوپىر ارقىلى الىپ وتىلەدى. ەرتەڭ وقۋ-جاتتىعۋدىڭ بەلسەندى فازاسى بارىسىندا اەروۇتقىر اسكەرلەرىنىڭ باتالونى اسكەري ءىس-قيمىلداردى تاۋدا وتكىزەدى, پيلوتسىز ۇشۋ اپپاراتتارىن قولدانا وتىرىپ, رەيدتىك ىزدەستىرۋ جۇمىستارىن, اتالعان اۋدانداردا تازالاۋ جۇمىستارىن جۇرگىزەدى. «ەگەمەن-اقپارات».