قىزىلجار وڭىرىندە سۋ باسۋ قاۋپى سانالاتىن اۋدانداردىڭ ءبىرى – ءۋاليحانوۆ. بيىل دا كورشىلەس اقمولا وبلىسىنا قاراستى سىلەتى سۋ قويماسىنان تىرشىلىك ءنارىنىڭ كوپ بوساتىلۋىنا بايلانىستى سۋ دەڭگەيى كۇرت كوتەرىلىپ, قاراتال جانە قۋلىكول اۋىلدارىن بايلانىستىراتىن اۆتوكولىك جولىن سۋ شايىپ كەتتى. توتەنشە جاعدايلار دەپارتامەنتى, سۋدا قۇتقارۋ قىزمەتى جانە جەرگىلىكتى بيلىك ورىندارى جۇدىرىقتاي جۇمىلا وتىرىپ, اپاتتىڭ الدىن الۋ شارالارىن ۇيىمداستىردى. قاراتال اۋىلىنىڭ ەكى جۇزگە جۋىق تۇرعىندارى قۋلىكول اۋىلىنا كوشىرىلدى. بۇل ماقسات ءۇشىن بىرنەشە موتورلى قايىق پايدالانىلدى.
ۇزىلگەن جولدى قالپىنا كەلتىرۋ ءۇشىن ينەرتتى ماتەريالدار توسەۋ جۇمىستارى دەرەۋ قولعا الىنىپ, ونداعان تەحنيكا بىرلىگى جۇمىلدىرىلدى. سۋ باسۋ قاۋپى سەيىلگەن سوڭ قاراتالدىقتار ەكى كۇننەن كەيىن اۋىلدارىنا كەلدى. قۋلىكول ەلدى مەكەنىنىڭ شەتكى كوشەلەرىنەن ورتالىققا قونىس اۋدارعان 226 تۇرعىن دا ورالدى.
ەسىل وزەنى بويىندا ورنالاسقان سەرگەەۆ سۋ قويماسىنىڭ جوبالىق سىيىمدىلىعى 693 ميلليون تەكشە مەترگە شاقتالسا, كۇن وتكەن سايىن سۋ دەڭگەيى كوتەرىلىپ كەلەدى. بۇگىندە ونىڭ مولشەرى 142 سانتيمەترگە جەتتى. وزەن قويناۋلارىنداعى سۋ كولەمىنىڭ دە مولايا تۇسكەنى بايقالادى. گيدوبەكەتتەردىڭ مالىمەتتەرىنە قاراعاندا, پوكروۆكا, نوۆونيكولسكوە ەلدى مەكەندەرى مەن پەتروپاۆل قالاسى ماڭىندا وراسان سۋ مولشەرى جينالعان.
ايتىپ كەلمەس اپات باستالعاننان بەرى وبلىس بويىنشا تۇرعىن ۇيلەردى سۋ شايۋدىڭ 106 فاكتىسى تىركەلگەن. دەر كەزىندە قولدانىلعان شارالاردىڭ ناتيجەسىندە ەشكىم زارداپ شەككەن جوق. تاسقىن سۋدى بولدىرماۋ, الدىن الۋ جايى اكىمدىكتە بىرنەشە رەت قارالىپ, ايماق باسشىسى سامات ەسكەندىروۆتىڭ ەرەكشە باقىلاۋىندا تۇر.
ءومىر ەسقالي,
«ەگەمەن قازاقستان».
سولتۇستىك قازاقستان وبلىسى.