حالقىمىز تالانتقا دا, تالاپتىعا دا كەندە بولىپ كورگەن جوق. بۇگىندە ءبىر-بىرىنەن اسىپ جارقىراۋشى ونەر ساڭلاقتارى سونىڭ ايعاعى بولسا, ءبىرازى قاراعاندىلىقتارعا دا جاقسى تانىمال. ورتالارىنان ءجيى تابىلاتىندارى بار, ونەرى سىرتتاي باۋراپ, ساحنادان جۇزبە-ءجۇز جۇزدەسۋگە تىلەنەتىندەرى بار. سوندايعى جانكۇيەر جۇيرىك ءبىرىنىڭ ادەمى اندەرىن كوزبە-كوز تىڭداپ, قۇلاق تەربەتىپ, كوڭىل حوشىن كوتەرۋگە دەگەن اڭساۋشىلىق بولار, كەنشىلەر مادەنيەت سارايىنا كەلۋشىلەر شوعىرلى بولعان ەدى.
ءيا, بەلگىلى سازگەر جالعاس كەڭەسوۆتىڭ «بولاشاققا قارايمىن نۇرلى كوزبەن» اتتى شىعارماشىلىق كەشى كۇتىلسە كۇتىلگەندەي, ءجۇرەككە قونسا قونعانداي بولىپ, تىڭداۋشىلار كوكىرەك كورىگىن مارحاباتتاندىرىپ, شۋاعىنا شالقىتتى. ساۋساق بۇگىپ سانارلىقتاي ەمەس, جۇزدەن استام ءاننىڭ شىعارۋشىسى ءارى ورىنداۋشى رەتىندە دە قوس تالانت قونعان جىگىت ونەر قىرىن تانىتۋشىلاردىڭ ءدويى ايگىلى نۇرعالي ءنۇسىپجانوۆ سىندى ساڭلاقتىڭ ءوزى بولۋى جۇرتتى ءتىپتى ءسۇيسىندىردى.
كەش اشىلۋىندا «بۇگىنگى كونتسەرتتىك كەزدەسۋ سىزدەردىڭ الدارىڭىزداعى شىعارماشىلىق ەسەبىم سياقتى. سارىارقا ءتورى – قاراعاندى توپىراعىنىڭ ونەرسۇيەر قاۋىمىمەن قاۋىشۋدىڭ العاش رەت ءساتى تۇسۋىنە وراي, ارنايى تارتۋمەن كەلدىم. اقىندار سەرىكزات دۇيسەنعازىنىڭ, تەمىر مىڭجاستىڭ, تۇرعانبەك كانەەۆتىڭ ولەڭدەرىنە شىعارعان «استانا», «اپا, سەن قارتايمايسىڭ», «سۇلۋىم» اتتى اندەرىمنىڭ تۇساۋى كەسىلەدى قازىر» دەگەن ول كەش جالعاسىن كۇمىس كومەي دوسىمجان تاڭاتاروۆ, گۇلزيرا بوكەيحان, گۇلداۋرەن جيدەباەۆاعا بەرۋىنەن كەيىن-اق شىعارماشىلىق شىرايى جايىلدى.
– جالعاس كەڭەسوۆتىڭ اندەرىن وتباسىمىزبەن سۇيسىنە تىڭدايمىز. مىنا كەش ۇلكەن اسەرگە بولەدى», – دەگەن قاراعاندى مەديتسينالىق كوللەدجىنىڭ ديرەكتورى امانجول نۇربەكوۆ ويى تىڭداۋشىلاردىڭ ورتاق كوڭىل سەزىمىن ءبىلدىردى.
ايقىن نەسىپباي,
«ەگەمەن قازاقستان».
قاراعاندى.