جاز قاباعى جادىراي قويماسا دا, كەنە شاعۋ دەرەگى كۇن سايىن دەرلىك تىركەلۋدە. ەپيدەميالىق كەزەڭ باستالعالى وبلىستا كەنە شاعۋدىڭ 90 دەرەگى تىركەلگەن. ءبىر وكىنىشتىسى, وقىس وقيعانىڭ جارتىسىنا جۋىعى 14 جاسقا دەيىنگى بالالار اراسىندا ورىن الىپ وتىر.
وتكەن جىلعى سايكەس مەرزىممەن سالىستىرعاندا, كەنە شاعۋ كەساپاتىنىڭ 1,8 ەسەگە كوبەيىپ, بالالار اراسىندا 2,9 ەسە ۇلعايعانىن ايتا كەتكەن ارتىق بولماس. وڭىردە ورىن العان وقيعالاردىڭ دەنى بۋراباي, زەرەندى جانە ساندىقتاۋ اۋداندارىنىڭ ەنشىسىندە.
– كەنە ەنتسەفاليتى بويىنشا ەپيدەميالىق احۋال ساندىقتاۋ اۋدانىندا ۋشىعىپ تۇر. بۇل اۋداندا سوڭعى ەكى جىلدا بىرنەشە دەرەك تىركەلدى. جىل سايىن سەلولىق وكرۋگتەر ماڭىندا زيانكەستەردى ۋلاپ, جويۋ جۇمىستارى جۇرگىزىلگەنىمەن, ناتيجەسى كوڭىل كونشىتپەيدى, – دەيدى وبلىستىڭ باس سانيتارلىق دارىگەرى ايناگۇل مۋسينا.
كەنەدەن كەسەل كەلمەس ءۇشىن وسى جىلى 1 200 سىناما زەرتتەلىپ, ناتيجەلەرى دۇرىس بولدى. ارينە دەنەڭىزگە ۋلى جاندىكتىڭ تۇمسىعى تيسە, بىردەن مەديتسينالىق كومەككە جۇگىنگەن ءجون. وندا دا مامانداردىڭ ايتۋىنا قاراعاندا, كەشىكپەگەن ابزال. ءساۋىر ايىنان بەرى قاپىلىستا كەنە شاعىپ, زارداپ شەككەن ونداعان ادام مەديتسينالىق كومەككە جۇگىنىپ, 67-ءسى يممۋنوگلوبۋلينمەن الدىن الۋ ەمدەرىن جاساعان. ءوز دەنساۋلىعىنا نەمكەتتى قاراپ, ەم قابىلداۋدان باس تارتاتىندار دا كەزدەسەدى. بۇل ارادا وقىرماننىڭ ەسىنە سالا كەتەتىن ءبىر جاي, ەگەر كەنە جۇقپالى اۋرۋدى تاسىمالداۋشى بولسا, وندا ادام اۋىر ناۋقاستارعا شالدىعۋى ابدەن مۇمكىن. تۇسىنىكتى بولۋى ءۇشىن ءسال تاراتىپ ايتا كەتەلىك. مامانداردىڭ ايتۋىنا قاراعاندا, كەنە ەنتسەفاليتى وتە قاۋىپتى. ادام اعزاسىندا جىلدام دامىپ, جۇيكە جۇيەسىن زاقىمداۋى ابدەن ىقتيمال. العاشقى بەلگىلەرى اپتا ارالاتىپ قانا پايدا بولادى ەكەن.
تابيعات اياسىندا دەمالۋشىلاردىڭ قاپەرىندە قورعانىش ماسەلەلەرى جۇرگەنى ءجون. ال اۋىل شارۋاشىلىعىنىڭ ەڭبەككەرلەرى وسى قاۋىپتىڭ بەل ورتاسىندا ءجۇر. كەنەدەن كەلەر كەساپاتتان ساۋ قالۋ ءۇشىن ساقتانۋ ارتىقتىق ەتپەيدى.
اقمولا وبلىسى