قازاقستان رەسپۋبليكاسى كاسىپوداقتار فەدەراتسياسىنىڭ رەسپۋبليكالىق شتابى العاشقى وتىرىسىن وتكىزىپ, الداعى رەفەرەندۋمنىڭ ماقساتىن, زاڭنامالىق وزگەرىستەردى ءتۇسىندىرۋ ءىس-شارالارى جايىن تالقىلادى.
كاسىپوداقتار فەدەراتسياسىنىڭ جانىنان كونستيتۋتسياعا وزگەرىستەر مەن تولىقتىرۋلار ەنگىزۋ بويىنشا رەفەرەندۋمدى قولداۋ ماقساتىندا بارلىق وبلىس ورتالىعى مەن رەسپۋبليكالىق ماڭىزى بار قالالارداعى ايماقتىق قوعامدىق شتابتاردىڭ جۇمىسىن ۇيلەستىرەتىن رەسپۋبليكالىق شتاب ءوز جۇمىسىن باستاعان بولاتىن.
12 مامىر كۇنى رەسپۋبليكالىق شتاب جەتەكشىسى, فەدەراتسيا توراعاسىنىڭ ورىنباسارى نۇرلان وتەشەۆتىڭ جەتەكشىلىگىمەن شىعىس قازاقستان, باتىس قازاقستان, سولتۇستىك قازاقستان وبلىستارى مەن شىمكەنت قالاسى ايماقتىق شتابتارى ۇيلەستىرۋ كەڭەستەرىنىڭ وتىرىسى ءوتتى.
وتىرىستا اتالعان زاڭنامالىق وزگەرىستەردىڭ كاسىپوداقتار ءۇشىن دە ماڭىزدىلىعى ايتىلىپ, كونستيتۋتسياعا ەنگىزىلەتىن وزگەرىستەر مەن تولىقتىرۋلاردىڭ مازمۇنى تانىستىرىلدى. اتاپ ايتقاندا, قازاقستان كونستيتۋتسياسىنىڭ 33 بابىنا تۇزەتۋلەر ەنگىزۋ كوزدەلىپ وتىر. سونىڭ ىشىندە جەر جانە ونىڭ قويناۋى, سۋ كوزدەرى, وسىمدىكتەر مەن جانۋارلار دۇنيەسى, باسقا دا تابيعي رەسۋرستار حالىققا تيەسىلى بولادى. بۇل – الەۋمەتتىك ادىلەتتىلىك قاعيداسىنا نەگىزدەلگەن قوعامدىق-ساياسي ماڭىزى بار قادام. سونىمەن قاتار كونستيتۋتسيالىق رەفورمانىڭ ناتيجەسىندە بيلىكتىڭ زاڭ شىعارۋشى تارماعى ەلەۋلى وزگەرىسكە ۇشىراماق. ماسەلەن, پرەزيدەنت وكىلەتتىگى قىسقارىپ, پارلامەنتتىڭ جانە ونىڭ پالاتالارىنىڭ ءرولى ەداۋىر كۇشەيىپ, مارتەبەسى ارتادى.
ء«بىز نەگىزگى زاڭعا ۇسىنىلىپ وتىرعان وزگەرىستەر مەن تولىقتىرۋلار ءاربىر ازاماتتىڭ نەگىزگى قۇقىقتارى مەن كەپىلدىكتەرىن, قوعامداعى تۇراقتىلىق پەن بىرلىكتى قورعاۋعا باعىتتالعانىن ناقتى ءتۇسىنۋىمىز ءتيىس. كونستيتۋتسيالىق رەفورما ازاماتتاردىڭ ەلدى باسقارۋ ىسىنە قاتىسۋ مۇمكىندىگىن ارتتىرادى دەگەن سەنىمدەمىز. وسى سەبەپتى, ءبىز كاسىپوداق مۇشەلەرىن لايىقتى ءومىر ءسۇرۋ جانە ەلىمىزدىڭ الەۋەتىن ارتتىرۋ ءۇشىن, ءار ەڭبەككەر ءوز قۇقىعىن قورعاي الۋى ءۇشىن الداعى رەفەرەندۋمعا بەلسەندى قاتىسۋعا شاقىرۋىمىز ءتيىس», دەپ اتاپ ءوتتى رەسپۋبليكالىق شتاب جەتەكشىسى.
وتىرىس بارىسىندا ءسوز العان باتىس قازاقستان وبلىستىق كاسىپوداقتار ورتالىعىنىڭ ءتورايىمى ايگۇل ەسەكەنوۆا رەفەرەندۋم جەكە تۇلعانىڭ ەمەس, حالىقتىڭ پىكىرىن ايقىندايتىنىن جەتكىزدى. سونىمەن قاتار كاسىپوداق مۇشەلەرىن بۇل رەفورمالاردىڭ ماڭىزدىلىعىن تۇسىنە وتىرىپ, رەفەرەندۋمعا بەلسەندى قاتىسۋعا شاقىردى.
كونفەرەنتسيا سوڭىندا رەسپۋبليكالىق شتاب جەتەكشىسى نۇرلان وتەشەۆ ءار قازاقستاندىق ء«بىر جەڭنەن قول, ءبىر جاعادان باس شىعارا وتىرىپ», ازاماتتىق ۇستانىمدارىن تانىتۋ ارقىلى الداعى رەفەرەندۋمعا بەلسەنە قاتىساتىنىنا سەنىم ءبىلدىردى.
باتىس قازاقستان وبلىسى