قالام ۇستاعان قاۋىمنىڭ قىزىعى تالاي اق پاراقتارعا جۇك بولا بەرەر. سەبەبى, قاي جەردە دە ماقالالارعا ارقاۋ بولار كەيىپكەر ىزدەپ جۇرگەنىڭ. كەيدە ارنايى ىزدەپ بارساڭ, كەيدە كەيىپكەرىڭ ءوزى جولىعا كەتەدى. ليۋبامەن دە اياق استىنان ساپارلاس بولدىق. قىزىعى, ارىپتەس بولىپ شىقتىق.
قازاق ءباسپاسوزىنىڭ قاراشاڭىراعىنا 90 جىل تولعان جىلى, قىسقى دەمالىستى اۋىلدا وتكىزەيىن دەپ, ەلگە بەت الدىم. اۋىلعا تۋرا بيلەت تابىلماي, اقتوبە ارقىلى قايتاتىن بولدىم. جول قىسقارتۋ ءۇشىن حرومتاۋدان ءتۇسىپ, اقتوبەگە باراتىن ءبىر توپ جولاۋشى كولىك جالدادىق. مەن قاتارلى اپالى-ءسىڭلىلى ەكى ورىس قىزى ۇشەۋمىز ءبىر كولىككە وتىردىق. جول قىسقارتايىق دەپ, ءجون سۇراستىق. «ەگەمەندە» ىستەيتىنىمدى ايتقانىم سول ەدى, سول جاعىمداعى وتىرعان سۇيكىمدى سارى قىز «ساشا اعايدى بىلەمىن عوي», دەگەنى جىميىپ. بىردەن تۇسىنە كەتتىم, «ساشا اعايى» – الەكساندر تاسبولاتوۆ. سۇيكىمدى سارى قىزدىڭ قازاقشا سويلەگەنىنە كوڭىلىم جىلىپ, قايدا ىستەيتىنىن سۇرادىم. توتەنشە جاعدايلار مينيسترلىگىنىڭ ءباسپاسوز قىزمەتىنىڭ رەسمي وكىلىمىن, ارىپتەسىڭمىن دەپ قويدى. ەل باسىلىمىنىڭ 90 جىلدىق مەرەيتويىمەن قۇتتىقتاپ, وتكىزىلىپ جاتقان شارالاردان حاباردار ەكەندىگىن اڭعارتتى. دىتتەگەن جەرگە جەتكەن سوڭ سۇيكىمدى سارى قىزبەن تەلەفون الماسىپ, قوش ايتىستىق.
سول كەزدەسۋدەن 5 جىل وتكەن سوڭ ليۋبامەن اڭگىمەلەسۋدىڭ ءساتى ءتۇستى. سويتسەم, ليۋبوۆ ىرعىزدىڭ تۋماسى ەكەن. «مەن اقتوبە وبلىسىنداعى ىبىراي التىنسارين اتامىز العاش مەكتەپ اشقان, ۇلى اباي بابامىزدىڭ اتاسىنىڭ كىندىك قانى تامعان ىرعىز دەگەن كيەلى جەردە شاپوشنيكوۆتار اۋلەتىندە دۇنيەگە كەلدىم. وتباسىمىزدا مەنەن وزگە نادەجدا ەسىمدى اپام بار. مەكتەپكە دەيىن قازاق بالاباقشاسىنا باردىم, بالالىق شاعىم قازاق بالالارىنىڭ اراسىندا ءوتتى. كەيىن ىرعىز ورىس ورتا مەكتەبىن ءبىتىردىم. مەكتەپتە وقىپ جۇرگەن كەزىمدە «قازاق ءتىلى جانە ادەبيەتى» پانىنەن اۋداندىق, وبلىستىق, رەسپۋبليكالىق وليمپيادالاردا, سايىستاردا جۇلدەگەر اتانىپ ءجۇردىم. مەكتەپ بىتىرگەن سوڭ قازاق-رەسەي ۋنيۆەرسيتەتىنىڭ پسيحولوگ ماماندىعىن تاڭداپ, وقۋعا ءتۇسىپ كەتتىم. 2006 جىلى رەسپۋبليكالىق «ماقساتىم – ءتىل ۇستارتىپ, ونەر شاشپاق» اتتى اباي وقۋلارى بايقاۋىندا جۇلدەگەر اتانىپ, كەيىن توتەنشە جاعدايلار مينيسترلىگى جاريالاعان كاستينگ ارقىلى تالايعا ارمان بولعان ەلوردامىزعا كەلدىم. مينيسترلىكتىڭ رەسمي وكىلى رەتىندە قىزمەت اتقاردىم, بۇگىنگى كۇنى اتالمىش مينيسترلىكتىڭ جۇيەسىندەگى رەسپۋبليكالىق داعدارىس ورتالىعىندا جۇمىس ىستەيمىن. تجم-گە قىزمەت ەتە ءجۇرىپ, كوكشەتاۋ تەحنيكالىق ينستيتۋتىندا ءورت قاۋىپسىزدىگى ماماندىعى بويىنشا ءبىلىم الدىم. 2011 جىلى قارۋلى كۇشتەر ۆەدومستۆولارىنىڭ ايەل قىزمەتكەرلەرى اراسىنداعى تاۋەلسىزدىكتىڭ 20 جىلدىعىنا ارنالعان العاشقى «جاس قىران» بايقاۋىندا جۇلدەلى ورىنعا يە بولدىم. 2012 جىلى ءدام ايداپ, باقىت ەسىمدى قازاق جىگىتىنە تۇرمىسقا شىقتىم. جۇبايىم باقىت كوپبالالى وتباسىنان شىققان. اتا-ەنەم الماتى قالاسىندا تۇرادى. قازاق حالقىنىڭ سالت-ءداستۇرى مەن ءجون-جورالعىسىمەن قۇدا ءتۇسىپ, ۇزاتۋ تويى جاسالىپ, كەلىن بولىپ ءتۇستىم. 2013 جىلى وتباسىمىز قۋانىشقا بولەندى. ءماريام ەسىمدى بوپەمىز دۇنيەگە كەلدى. انانىڭ بالاسىنا دەگەن سەزىمىن ەشبىر سوزبەن جەتكىزۋ مۇمكىن ەمەس ەكەن. باقىت تا تجم ازاماتتىق قورعانىس دەپارتامەنتىندە اعا وفيتسەر لاۋازىمىندا قىزمەت ەتەدى. اتا-انالارىمىزدىڭ قۇدا-جەكجات بولىپ, سىيلاستىقپەن تۇسىنىسكەنىن كورىپ شۇكىرشىلىك ەتىپ, ءوسىپ-ءونىپ جاتىرمىز. ەكى ۇلتتىڭ دا داستۇرلەرىن قۇرمەتتەيمىز. ءوز مەملەكەتىن سۇيەتىن وتباسىندا ءوسىپ كەلە جاتقان كىشكەنتاي ءماريامنىڭ دا ءوز ەلىنىڭ پاتريوتى بولىپ وسەتىنىنە سەنىمىم كامىل. تۋعان ەلىم قازاقستان, مەملەكەتتىك ءتىلدى ءبىلۋ اركىمنىڭ پارىزى دەپ سانايمىن. ويتكەنى, ەلىمىزدىڭ بولاشاعى ەل تىلىمەن بىرگە كوركەيمەك.
اكە-شەشەمنىڭ اتا-باباسى ازاماتتىق سوعىستان كەيىن ورىنبور گۋبەرنياسىنان كەلگەن ەكەن. ال اتا-انام وسى ىرعىزدا تۋىپ-وسكەن, تازا ىرعىزدىقتار. ءالى كۇنگە دەيىن سول ىرعىزدا تۇرىپ جاتىر. ال اتامنىڭ ۇلى وتان سوعىسىنا قاتىسقانىن ماقتانىشپەن ايتا الامىن. اجەم موردوۆيادان كەلگەن. قازاق توپىراعىندا ءوسىپ, جاپىراق جايعان شاپوشنيكوۆتار اۋلەتىنەن تاراعان ۇرپاقپىن. باقىتتى شاڭىراعىمىز ەل دامۋىنىڭ ءبىر سيپاتى شىعار دەپ ويلايمىن. ويتكەنى, تىنىش ەلدە باقىتتى عۇمىر كەشىپ جاتىرمىز. ادەمى الەمىمىزدى ەشقاشان كىر شالماسىن دەپ تىلەيمىن. ۇرپاق سانالى بولسا, ۇلت دامۋى ىلگەرىلەيدى. ال بۇل ءۇشىن بارلىعىمىز جاۋاپكەرشىلىكتى بولۋىمىز قاجەت. قوعام دۇرىس باعىتتا دامۋى ءۇشىن اركىم ءوز-وزىنە جاۋاپ بەرسە ءجون, دەيدى ليۋبا قىز. مەن ىشتەي جەڭگەمە ءسۇيسىندىم. ءار قازاقستاندىق وسىنداي بولسا يگى.
ۆەنەرا تۇگەلباي,
ەگەمەن قازاقستان.