شىمكەنتتەگى ۋاقىتشا ۇستاۋ اباقتىسىنىڭ 17 قىزمەتكەرى ءوز مىندەتتەرىن بۇزعانى ءۇشىن قاتاڭ تارتىپتىك جازاعا تارتىلدى. بۇل شارا جۋىردا اباقتىدان كۇدىكتىنىڭ قاشىپ كەتۋىنە بايلانىستى قولدانىلىپ وتىر, دەپ حابارلايدى Egemen.kz شىمكەنت قالاسى جانە تۇركىستان وبلىسى بويىنشا قىلمىستىق-اتقارۋ جۇيەسى دەپارتامەنتىنە سىلتەمە جاساپ.
اتالعان دەپارتامەنتتىڭ ءباسپاسوز قىزمەتى مالىمەتىنشە, 17 قىزمەتكەردەن بولەك, اتالعان اباقتىنىڭ تاعى 1 قىزمەتكەرى جۇمىسىنان بوساتىلدى.
«شىمكەنت قالاسىنىڭ پوليتسيا دەپارتامەنتى اتالعان فاكتى بويىنشا قازاقستان رەسپۋبليكاسى قىلمىستىق كودەكسىنىڭ 426-بابى بويىنشا سوتقا دەيىنگى تەرگەۋ باستادى. ال شىمكەنت قالاسى جانە تۇركىستان وبلىسى بويىنشا قىلمىستىق-اتقارۋ جۇيەسى دەپارتامەنتى قىزمەتتىك تەكسەرۋ جۇرگىزۋدە. قر قىجك 201-بابىنا سايكەس سوتقا دەيىنگى تەرگەپ-تەكسەرۋدىڭ قالعان دەرەكتەرى جاريا ەتۋگە جاتپايدى», دەلىنگەن دەپارتامەنتتىڭ حابارلاماسىندا.