بۇل تۋرالى قر سىبايلاس جەمقورلىققا قارسى ءىس-قيمىل اگەنتتىگى توراعاسىنىڭ ورىنباسارى ۇلان سارقۇلوۆ ايتتى, دەپ حابارلايدى Egemen.kz.
«سىبايلاس جەمقورلىقتىڭ تاعى ءبىر ماڭىزدى فاكتورى – مەملەكەتتىك ساتىپ الۋدى جوسپارلاۋ كەزىندە باعانىڭ نەگىزسىز قىمبات بولۋى. بۇل اقشا الدىن الا پارا ءۇشىن دە, جاقسى پايدا تابۋ ءۇشىن دە ەسەپتەلىپ جازىلادى. اگەنتتىك «اتامەكەن» ۇلتتىق پالاتاسىمەن بىرلەسىپ جۇيەلى نەگىزدە قىمبات باعالارعا مونيتورينگ جۇرگىزىپ جاتىر. جىل باسىنان بەرى ءبىزدىڭ ۇسىنىستارىمىزبەن مەملەكەتتىك ورگاندار ءوز ساتىپ الۋلارىن قايتا قاراپ, بيۋدجەتتەن 5 ملرد تەڭگەگە جۋىق قارجى ۇنەمدەدى», دەدى ۇ. سارقۇلوۆ ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا.
سپيكەردىڭ ايتۋىنشا, 2 جىل ىشىندە شامامەن 74 ملرد تەڭگە ۇنەمدەلگەن.
«وسىنداي باعانى كوتەرۋ كەزىندە لاۋازىمدى تۇلعالارعا ەش جاۋاپكەرشىلىك ارتىلمايتىنى انىقتالدى. ءبىز قارجى مينيسترلىگىنە ۇقىپسىز شەنەۋنىكتەردى اكىمشىلىك تارتىپتە جازالاۋدى ۇسىنىپ, ۇسىنىستار ەنگىزدىك», دەدى ۇلان سارقۇلوۆ.
سونىمەن بىرگە سىبايلاس جەمقورلىقتىڭ تاعى ءبىر سەبەبى – كەيبىر ساتىپ الۋ راسىمدەرىنىڭ جابىق بولۋى.
«تاپسىرىس بەرۋشى «اقپاراتتى شەكتەپ تاراتۋ» بەلگىسىمەن ساتىپ الۋدى جابادى جانە ءىس جۇزىندە ونى سىبايلاس جەمقورلىق اۋماعىنا ەنگىزەدى. مۇنداي ساتىپ الۋ تەك قاعاز جۇزىندە عانا ىسكە اسادى جانە قوعامدىق باقىلاۋدان تىس قالادى. ناتيجەسىندە بۇل ساتىپ الۋعا ۇلەستەس كومپانيالار قاتىسادى, باعالار نەگىزسىز كوتەرىلەدى جانە قاجەتسىز جۇمىستار مەن قىزمەتتەر ساتىپ الىنادى. مىسالى, كەيبىر ايماقتاردا قايىرىمدىلىققا باعىتتالۋى كەرەك الەۋمەتتىك ماڭىزدى شارالار تۇرىندە كونتسەرتتەر, كەرەمەت شوۋلار جانە جەكە اۆتورلىق كەشتەر ساتىپ الىنعان. ءبىر عانا وڭىردە بۇل ماقساتتارعا 1,7 ملرد تەڭگە جۇمسالعان. قازىر مەملەكەتتىك ساتىپ الۋ جۇيەسىن وسى باعىتتا قايتا فورماتتاۋ قاجەت بولىپ وتىر», دەپ ءتۇسىندىردى اگەنتتىك وكىلى.