بيىلعى ءۇش ايدا ەلدەگى قۇرىلىس سەكتورى 9,5%-كە ءوستى. بۇل تۋرالى ۇلتتىق ەكونوميكا ءمينيسترى الىبەك قۋانتىروۆ ايتتى, دەپ حابارلايدى Egemen.kz.
«بيىلعى ءۇش ايدا قۇرىلىس سەكتورى جوعارى ءوسۋ قارقىنىن كورسەتىپ, ورىندالعان قۇرىلىس جۇمىستارىنىڭ كولەمى 9,5%-كە ءوستى. كورسەتكىشتىڭ وڭ ءوسىمى 15 وڭىردە تىركەلگەن. قۇرىلىس-مونتاجداۋ جۇمىستارىنىڭ ەڭ جوعارى ءوسىمى اقمولا وبلىسىندا, سونداي-اق الماتى جانە نۇر-سۇلتان قالالارىندا بايقالۋدا», دەدى ءا. قۋانتىروۆ ۇكىمەت وتىرىسىندا.
بيىلعى قاڭتار-ءساۋىر ايلارىنىڭ قورىتىندىسى بويىنشا تۇرعىن ءۇيدى پايدالانۋعا بەرۋ 2,4%-كە ءوسىپ, 3,6 ملن شارشى مەترگە جەتكەن. وڭ ديناميكا 13 وڭىردە تىركەلگەن, ولاردىڭ اراسىندا ەڭ جوعارعى كورسەتكىش شىمكەنت قالاسىندا, الماتى جانە پاۆلودار وبلىستارىندا بايقالۋدا.
ايتا كەتەيىك, جىل باسىنان بەرى قازاقستان ەكونوميكاسىنىڭ ءوسۋ قارقىنى 4,4%-كە جەتكەن. ناقتى سەكتورداعى ءوسىم 5,1%, قىزمەت كورسەتۋ سالاسىندا ىسكەرلىك بەلسەندىلىك 3,4%-كە دەيىن ۇلعايعان.
ەلدەگى وڭدەۋ ونەركاسىبى سالالارى بويىنشا ماشينا جاساۋ ءوندىرىسىنىڭ 9,4%-كە, ونىڭ ىشىندە كومپيۋتەر, ەلەكتروندى جانە وپتيكا قۇرالدار جاساۋدىڭ – 19,7%-كە, اۆتوموبيل جاساۋدىڭ – 18,6%-كە ءوسۋى بايقالدى.
سونداي-اق قۇرىلىس ماتەريالدارى – 9,5%-كە, سۋسىندار – 18,7%-كە, پلاستماسسا بۇيىمدارى – 14,3%-كە, دايىن مەتالل بۇيىمدارى – 10,8%-كە, فارماتسەۆتيكا ونىمدەرى – 6,4%-كە, كيىم ءوندىرىسىنىڭ – 13,8%-كە ءوسۋى قامتاماسىز ەتىلدى. تاۋ-كەن ونەركاسىبىندە ءوندىرىس كولەمى 4,4%-كە ۇلعايدى.