ۇلتتىق ەكونوميكا ءمينيسترى الىبەك قۋانتىروۆ جىل باسىنان بەرى ەلدەگى كولىك ءوندىرىسىنىڭ كولەمى 5,8%-عا ارتقانىن ايتتى, دەپ حابارلايدى Egemen.kz.
«وڭدەۋ ونەركاسىبىندە سەرپىندى ءوسۋ ءۇردىسى بايقالۋدا. وسى جىلدىڭ قاڭتار-ءساۋىر ايلارىندا ءوندىرىس كولەمى 5,8%-عا ءوستى. بارلىق ءوڭىر بويىنشا وڭ ءوسۋ كورسەتكىشى تىركەلدى. ەڭ جوعارعى ءوسۋ الماتى قالاسىندا, سونداي-اق اتىراۋ جانە جامبىل وبلىستارىندا بايقالۋدا», دەدى الىبەك قۋانتىروۆ ۇكىمەت وتىرىسىندا.
ءمينيستردىڭ ايتۋىنشا, وڭدەۋ ونەركاسىبى سالالارى بويىنشا ماشينا جاساۋ ءوندىرىسىنىڭ 9,4%-عا, ونىڭ ىشىندە كومپيۋتەر, ەلەكتروندى جانە وپتيكا قۇرالدار جاساۋدىڭ – 19,7%-عا, اۆتوموبيل جاساۋدىڭ – 18,6%-عا ءوسۋى بايقالدى.
سونداي-اق قۇرىلىس ماتەريالدارى – 9,5%-عا, پلاستماسسا بۇيىمدارى – 14,3%-عا, دايىن مەتالل بۇيىمدارى – 10,8%-عا, فارماتسەۆتيكا ونىمدەرى – 6,4%-عا, كيىم ءوندىرىسىنىڭ – 13,8%-عا ءوسۋى قامتاماسىز ەتىلدى.
تاۋ-كەن ونەركاسىبىندە ءوندىرىس كولەمى 4,4%-عا ۇلعايدى. سالالار بولىنىسىندەگى ءوسىم تاۋ-كەن ونەركاسىبىندە قىزمەت كورسەتۋدە – 16,9%-دى, گاز وندىرۋدە – 6,4%-دى, شيكى مۇناي وندىرۋدە 5%-دى, وزگە دە پايدالى قازبالاردى وندىرۋدە – 4,2%-دى, مەتالل كەندەرىن وندىرۋدە – 1,8%-دى, كومىر وندىرۋدە – 1,7%-دى قۇرادى.
ايتا كەتسەك, جىل باسىنان بەرى قازاقستان ەكونوميكاسىنىڭ ءوسۋ قارقىنى 4,4%-عا جەتكەن. ناقتى سەكتورداعى ءوسىم 5,1%, قىزمەت كورسەتۋ سالاسىندا ىسكەرلىك بەلسەندىلىك 3,4%-عا دەيىن ۇلعايعان.