قازاقستاننىڭ رەسەيدەگى ەلشىسى ومبى قازاقتارىمەن كەزدەستى

ءوڭىر گۋبەرناتورى الەكساندر بۋركوۆپەن كەزدەسۋ بارىسىندا ىنتىماقتاستىقتىڭ بارلىق سالالارى بويىنشا كەڭ اۋقىمدى ماسەلەلەر, ونىڭ ىشىندە ومبى وبلىسى دەلەگاتسياسىنىڭ ءساۋىر ايىنداعى قازاقستانعا ساپارى كەزىندە قول جەتكىزىلگەن ۋاعدالاستىقتار جانە مەملەكەت باسشىسى قاسىم-جومارت توقاەۆپەن جۇرگىزىلگەن كەلىسسوزدەر تالقىلاندى.

سوڭعى جىلدارى ەكى جاقتى ىنتىماقتاستىق جاڭا ساپالى دەڭگەيگە كوتەرىلىپ, وعان ومبى وبلىسىنىڭ ايتارلىقتاي ۇلەس قوسىپ جاتقانى ايتىلدى. ماسەلەن, 2021 جىلى وبلىس پەن قازاقستان اراسىنداعى تاۋار اينالىمىنىڭ كولەمى 402,1 دوللارعا جەتىپ, 2020 جىلمەن سالىستىرعاندا 12,3 پايىزعا ارتتى.

تاراپتار ەكى جاقتى بايلانىستاردىڭ الەۋەتىنىڭ ماڭىزدىلىعىن جانە ولاردى ارتتىرۋ مۇمكىندىكتەرىن اتاپ ءوتتى. اتاپ ايتقاندا, اۋىل شارۋاشىلىعى ماشينا جاساۋ, دەنساۋلىق ساقتاۋ, اگروونەركاسىپتىك كەشەن, حيميا ونەركاسىبى جانە تۋريزم سالالارىندا ءوزارا ءتيىمدى ىنتىماقتاستىق پەن بىرلەسكەن جوبالاردى جۇزەگە اسىرۋ ءۇشىن جاقسى مۇمكىندىكتەر اشىلۋدا.

مادەني-گۋمانيتارلىق ىنتىماقتاستىق تا قارقىندى دامۋدا. ومبى وبلىسىندا قازاق مادەنيەتىن ناسيحاتتايتىن ءىس-شارالار, جەتەكشى كاسىبي شىعارماشىلىق ۇجىمداردىڭ قاتىسۋىمەن فەستيۆالدەر, تەاترلار مەن فيلارمونيالاردىڭ گاسترولدەرى وتكىزىلەدى. حالىق ساناعىنىڭ قورىتىندىسى بويىنشا وڭىردەگى سانى شامامەن 78-80 مىڭ ادامدى قۇرايتىن قازاق دياسپوراسى قازاقستانمەن رۋحاني كوپىر بولىپ وتىر. وسىعان وراي ەرمەك كوشەرباەۆ جەرلەستەرىمىزگە مادەنيەت پەن ءتىلدىڭ ساقتالۋى مەن دامۋىنا كومەكتەسكەنى ءۇشىن الەكساندر بۋركوۆقا العىسىن ءبىلدىرىپ, وبلىس اكىمىنە ءىى دارەجەلى «دوستىق» وردەنىن تابىس ەتتى.

ساپار اياسىندا ەلشى ومبى وبلىسىنداعى قازاق قوعامدىق بىرلەستىكتەرىنىڭ جەتەكشىلەرىمەن كەزدەستى. ەڭ الدىمەن قازاق ءتىلىن ۇيرەنۋگە قاتىستى وتانداستاردى تولعاندىرىپ جۇرگەن وزەكتى ماسەلەلەر, بىرلەسكەن گۋمانيتارلىق جوبالار ءسوز بولدى. ەلشى قازاق ورتالىقتارى بار جەرگىلىكتى مەكتەپتەردىڭ ديرەكتورلارىمەن دە وسى تاقىرىپتاردى تالقىلادى.

ومبىدا ەرمەك كوشەرباەۆ شوقان ءۋاليحانوۆتىڭ ەسكەرتكىشى مەن كەمەل توقاەۆقا ارنالعان مەموريالدىق تاقتاعا گۇل شوقتارىن قويدى.